Kutoka 11

1BWANA alimwambia Musa, “Bado kuna pigo moja litakalokuja. Nitaliachilia juu ya Farao na juu ya Misri, na baada ya hilo atawaacha mwondoke mahali hapa. Atakapowaacha mwende, atawafukuza kutoka hapa kabisa. 2Sasa waambie watu, wote wasikie, kwamba kila mwanamume amwombe jirani yake Mmisri, na kila mwanamke vivyo hivyo, vitu vya fedha na vya dhahabu.” 3BWANA aliwafanya Wamisri wawaangalie watu kwa wema. Musa naye alikuwa mtu mkuu sana katika nchi ya Misri; maafisa wa Farao na watu walimheshimu.

4Kisha Musa alimwambia Farao, “BWANA anasema hivi: ‘Karibu na usiku wa manane nitapita katikati ya Misri. 5Kila mzaliwa wa kwanza katika nchi ya Misri atakufa, tangu mzaliwa wa kwanza wa Farao, anayeketi juu ya kiti chake cha enzi, hadi mzaliwa wa kwanza wa mtumishi wa kike anayesaga nafaka kwa jiwe la kusagia, pamoja na kila mzaliwa wa kwanza wa wanyama. 6Kilio kikuu cha huzuni kitasikika katika nchi yote ya Misri. Hakujawahi kutokea jambo kama hilo, wala halitatokea tena. 7Lakini kati ya Waisraeli hata mbwa hatamngurumia mtu yeyote, awe binadamu au mnyama. Ndipo mtajua kwamba BWANA anawatenga Waisraeli na Wamisri.’ 8Maafisa wako hawa wote watakuja kwangu na kusujudu mpaka chini, nao watasema, ‘Ondoka, wewe na watu wote wanaokufuata!’ Hapo ndipo nitakapoondoka.” Kisha Musa alitoka mbele ya Farao akiwa amewaka hasira.

9BWANA alimwambia Musa, “Farao hatawasikiliza, ili nifanye maajabu mengi zaidi katika nchi ya Misri.” 10Musa na Haruni walifanya maajabu haya yote mbele ya Farao, lakini BWANA aliufanya moyo wa Farao kuwa mkaidi, naye hakuwaachilia Waisraeli watoke katika nchi yake.