Kutoka 15

1Ndipo Musa na Waisraeli wakamwimbia BWANA wimbo huu: “Nitamwimbia BWANA, kwa maana ameinuka juu kwa ushindi; farasi na mpandaji amewavurumisha baharini. 2BWANA ni nguvu yangu na wimbo wangu; amekuja kuniokoa. Huyu ndiye Mungu wangu, nami nitamheshimu kwa sifa; ndiye Mungu wa baba yangu, nami nitamtukuza juu kabisa. 3BWANA ni shujaa wa vita; jina lake ni BWANA. 4Magari ya vita ya Farao na jeshi lake amewavurumisha baharini; maafisa wake bora walizama katika Bahari ya Shamu. 5Maji ya vilindi yaliwafunika; walishuka mpaka chini kama jiwe. 6Ee BWANA, mkono wako wa kuume ni wa ajabu kwa nguvu; Ee BWANA, mkono wako wa kuume ulimvunjavunja adui. 7Kwa adhama yako isiyo na kifani uliwabomoa wale walioinuka dhidi yako; uliiachilia ghadhabu yako, ikawateketeza kama majani makavu. 8Kwa mvumo wa pua zako maji yalirundikwa juu; maji yaliyokuwa yakitiririka yalisimama wima kama rundo, na vilindi vikawa vigumu katikati ya bahari. 9Adui alisema, ‘Nitawafuata na kuwakamata; nitagawa nyara na kujishibisha kwao; nitachomoa upanga, na mkono wangu utawafutilia mbali.’ 10Lakini wewe ulipuliza pumzi, bahari ikawafunika; wakatumbukia chini kama risasi katika maji yenye nguvu. 11Miongoni mwa miungu, ni nani anayelinganishwa na wewe, Ee BWANA? Ni nani aliye kama wewe, mwenye fahari ya utakatifu, wa kutisha kwa matendo yanayostahili sifa, mtenda maajabu? 12Ulinyoosha mkono wako wa kuume, nayo ardhi ikawameza. 13Kwa upendo wako usiokoma uliwaongoza watu uliowakomboa; kwa nguvu zako uliwafikisha kwenye makao yako matakatifu. 14Mataifa yalisikia, yakatetemeka; uchungu mkali uliwashika waliokaa Ufilisti. 15Ndipo wakuu wa koo za Edomu walishikwa na hofu; watawala wa Moabu walikamatwa na kutetemeka; wote waliokaa Kanaani walikufa moyo. 16Woga na hofu kuu viliwashukia; mbele ya uweza wa mkono wako walisimama kimya kama mawe, watu wako walipokuwa wakivuka, Ee BWANA, watu uliowafanya kuwa wako walipokuwa wakivuka. 17Utawaleta ndani na kuwapanda juu ya mlima ulio urithi wako, mahali ulipoandaa pawe makao yako, Ee BWANA, mahali patakatifu, Ee Bwana, ambapo mikono yako yenyewe ilipasimika imara. 18BWANA atatawala milele hata milele!” 19Farasi wa Farao, pamoja na magari yake ya vita na wapanda farasi wake, walikuwa wameingia baharini, na BWANA alikuwa ameyarejesha maji ya bahari juu yao; lakini Waisraeli walikuwa wamevuka katikati ya bahari juu ya ardhi kavu.

20Miriamu nabii wa kike, dada yake Haruni, alichukua tari, na wanawake wote wakatoka nyuma yake wakipiga matari na kucheza. 21Miriamu aliwaongoza katika kiitikio: “Mwimbieni BWANA, kwa maana ameinuka juu kwa ushindi; farasi na mpandaji amewavurumisha baharini.”

22Musa aliwafanya Waisraeli wangoe kambi kutoka Bahari ya Shamu, nao wakaingia nyika ya Shuri. Kwa siku tatu walitembea nyikani bila kukuta maji. 23Walipofika Mara, hawakuweza kuyanywa maji ya pale kwa sababu yalikuwa machungu. Ndiyo sababu mahali hapo paliitwa Mara. 24Watu walimlalamikia Musa. “Tutakunywa nini sasa?” walisema. 25Musa alimlilia BWANA, na BWANA akamwonyesha kipande cha mti. Akakitupa majini, na maji yakawa matamu. Hapo ndipo BWANA alipowawekea kanuni na agizo, na hapo ndipo alipowajaribu. 26Alisema, “Ukisikiliza kwa makini sauti ya BWANA Mungu wako na kufanya yale anayoyaona kuwa sawa, ukizitii amri zake na kushika kanuni zake zote, nitakuepusha na kila mojawapo ya magonjwa niliyowaletea Wamisri. Kwa maana mimi ni BWANA ninayekuponya.”

27Kisha walifika Elimu. Huko kulikuwa na chemchemi kumi na mbili za maji na mitende sabini, nao wakapiga kambi kando ya maji.