Kutoka 10

1BWANA alimwambia Musa, “Nenda kwa Farao. Ni mimi niliyeufanya moyo wake kuwa mgumu, pamoja na mioyo ya maafisa wake, ili nifanye ishara hizi zangu katikati yao, 2na ili uweze kuwasimulia watoto wako na wajukuu wako jinsi nilivyoifanyia Misri mzaha, na ishara nilizozifanya kati yao. Nanyi nyote mtajua kwamba mimi ndimi BWANA.” 3Basi Musa na Haruni waliingia kwa Farao, wakamwambia, “BWANA, Mungu wa Waebrania, anasema hivi: ‘Utaendelea kukataa kujishusha mbele yangu mpaka lini? Waachilie watu wangu, ili wanitumikie. 4Ukikataa kuwaachilia watu wangu, kesho nitaleta nzige ndani ya mipaka yako. 5Watafunika uso wa nchi hata mtu asiweze kuiona ardhi. Watakula kila kitu kilichosalia baada ya mvua ya mawe, vyote mlivyobakiwa navyo, nao watakula kila mti wenu unaoota mashambani. 6Nyumba zako zitajaa nzige, na nyumba za maafisa wako wote na za Wamisri wote. Hilo litakuwa jambo ambalo wazee wako hawajawahi kuliona, wala baba zako wala babu zako, katika muda wote walioishi katika ardhi hii.’” Kisha Musa aligeuka, akatoka mbele ya Farao. 7Maafisa wa Farao walimwambia, “Mtu huyu atakuwa mtego kwetu mpaka lini? Waache wanaume hao waende wakamtumikie BWANA Mungu wao. Je, bado hujatambua kwamba Misri imekwisha?” 8Musa na Haruni walirudishwa kwa Farao, naye akawaambia, “Nendeni mkamtumikie BWANA Mungu wenu. Lakini ni nani hasa watakaokwenda?” 9Musa alijibu, “Tutakwenda sote, vijana kwa wazee. Wana wetu na binti zetu watakwenda, na makundi yetu ya kondoo na ng’ombe pia, kwa sababu tunafanya sikukuu ya BWANA.” 10Farao aliwaambia, “Basi BWANA na awe pamoja nanyi, kama kweli nitawaacha mwende pamoja na watoto wenu wadogo! Ni wazi kwamba mnapanga jambo baya. 11Hapana, si hivyo! Ninyi wanaume mnaweza kwenda kumtumikia BWANA; hilo ndilo mnalotaka hasa.” Basi walifukuzwa mbele ya Farao.

12BWANA alimwambia Musa, “Nyosha mkono wako juu ya nchi ya Misri ili nzige waje. Watakuja juu ya nchi ya Misri na kula mimea yote ya nchi, kila kitu ambacho mvua ya mawe iliacha kimesimama.” 13Basi Musa aliinyosha fimbo yake juu ya nchi ya Misri, na BWANA akavumisha upepo wa mashariki juu ya nchi mchana ule wote na usiku wote. Kulipopambazuka, nzige walikuwa wamefika, wameletwa na upepo wa mashariki. 14Nzige walienea katika nchi yote ya Misri na kutua katika eneo lake lote kwa wingi mno. Hapakuwa na kundi la nzige kama hilo kabla yake, wala halitakuwako baada yake. 15Walifunika uso wa nchi yote hata nchi ikawa giza. Wakala mimea yote ya nchi na matunda yote ya miti ambayo mvua ya mawe ilikuwa imeyaacha. Katika nchi yote ya Misri hapakubaki jani bichi hata moja juu ya mti wala juu ya mmea wa shambani. 16Farao aliwaita Musa na Haruni upesi. Akasema, “Nimetenda dhambi dhidi ya BWANA Mungu wenu, na dhidi yenu pia. 17Sasa tafadhali unisamehe dhambi yangu, mara hii moja tu. Mwombeni BWANA Mungu wenu aniondolee kifo hiki, angalau hicho tu.” 18Musa alitoka mbele ya Farao, akamwomba BWANA. 19Kisha BWANA aliugeuza upepo. Upepo mkali sana ulivuma kutoka magharibi, ukawainua nzige na kuwapeleka mpaka Bahari ya Shamu. Katika eneo lote la Misri hakubaki nzige hata mmoja. 20Hata hivyo BWANA alimfanya Farao kuwa mkaidi, naye hakuwaachilia Waisraeli.

21BWANA alimwambia Musa, “Inua mkono wako kuelekea angani, nalo giza litakuja juu ya nchi ya Misri, giza zito kiasi kwamba watu wataweza kulipapasa.” 22Basi Musa aliinua mkono wake kuelekea angani, na giza zito likatanda katika nchi yote ya Misri kwa siku tatu. 23Kwa siku tatu hakuna mtu aliyeweza kumwona mwenzake, wala hakuna aliyetoka mahali alipokuwa. Lakini Waisraeli wote walikuwa na mwanga katika nyumba zao. 24Farao alimwita Musa, akamwambia, “Nendeni mkamtumikie BWANA. Makundi yenu ya kondoo na ng’ombe tu ndiyo yatakayobaki; hata watoto wenu wadogo wanaweza kwenda pamoja nanyi.” 25Musa alijibu, “Wewe mwenyewe itakubidi hata kutupa dhabihu na sadaka za kuteketezwa ili tumtolee BWANA Mungu wetu. 26Wanyama wetu nao watakwenda pamoja nasi; haitabaki nyuma hata kwato moja. Ni kutoka kwao ndipo tutachukua tutakachotumia kumtumikia BWANA Mungu wetu, nasi hatuwezi kujua ni wanyama gani tutakaowahitaji kumtumikia BWANA mpaka tufike mahali hapo.” 27Lakini BWANA alimfanya Farao kuwa mkaidi, naye hakukubali kuwaacha waende. 28Farao alimwambia, “Toka mbele yangu! Jihadhari: usije tena mbele yangu kamwe. Siku utakapouona uso wangu tena, siku hiyo utakufa.” 29Musa alijibu, “Umesema kweli. Hii ndiyo mara ya mwisho nitakayouona uso wako.”