Kutoka 38

1Akaitengeneza madhabahu ya sadaka ya kuteketezwa kwa mbao za mshita. Ilikuwa mraba, karibu mita 2.25 kila upande, na kimo cha karibu mita 1.35. 2Akatengeneza pembe kwenye kona zake nne, zikiwa sehemu ya madhabahu yenyewe, akaifunika kwa shaba. 3Akatengeneza vyombo vyote vya madhabahu: vyungu, mabeleshi, mabakuli, nyuma na vyetezo. Vyombo vyake vyote alivifanya kwa shaba. 4Akaifanyia madhabahu wavu wa shaba uliotengenezwa kwa kusukwa, akauweka chini ya ukanda wake, kutoka chini hadi katikati ya madhabahu. 5Akasubu pete nne kwa ajili ya kona nne za wavu wa shaba, ili kushika mipiko. 6Akaitengeneza mipiko kwa mbao za mshita, akaifunika kwa shaba. 7Akaipitisha mipiko katika pete zilizo pande za madhabahu, kwa ajili ya kuibeba. Aliijenga madhabahu kama sanduku la mbao lenye uvungu.

8Akatengeneza beseni na kitako chake kwa shaba. Shaba hiyo ilitoka kwenye vioo vya wanawake waliohudumu kwenye mlango wa Hema la Kukutania.

9Akaufanya ua. Upande wa kusini mapazia ya ua yalikuwa ya kitani safi iliyosokotwa, urefu wa karibu mita 45. 10Kulikuwa na nguzo ishirini juu ya misingi ishirini ya shaba, zenye kulabu na mikanda ya fedha. 11Upande wa kaskazini nao ulikuwa na urefu wa karibu mita 45, wenye nguzo ishirini juu ya misingi ishirini ya shaba, na kulabu na mikanda ya fedha kwenye nguzo. 12Upande wa magharibi kulikuwa na mapazia yenye urefu wa karibu mita 22.5, pamoja na nguzo kumi na misingi kumi, na kulabu na mikanda ya fedha kwenye nguzo. 13Upande wa mashariki, unaoelekea macheo ya jua, nao ulikuwa na upana wa karibu mita 22.5. 14Upande mmoja wa lango kulikuwa na mapazia yenye urefu wa karibu mita 6.75, pamoja na nguzo tatu na misingi mitatu. 15Upande mwingine ulikuwa vivyo hivyo, kwa hiyo kulikuwa na mapazia ya karibu mita 6.75 kila upande wa lango la ua, pamoja na nguzo tatu na misingi mitatu. 16Mapazia yote yaliyozunguka ua yalikuwa ya kitani safi iliyosokotwa. 17Misingi ya nguzo ilikuwa ya shaba, na kulabu na mikanda ya nguzo vilikuwa vya fedha. Vichwa vyake vilifunikwa kwa fedha, na kila nguzo ya ua ilifungwa mikanda ya fedha. 18Kisitiri cha lango la ua kilikuwa kazi ya mtarizi kwa rangi, cha uzi wa samawati, wa zambarau na wa rangi nyekundu, na cha kitani safi iliyosokotwa. Kilikuwa na urefu wa karibu mita 9 na kimo cha karibu mita 2.25, sawa na mapazia ya ua. 19Kilitundikwa kwenye nguzo nne zilizowekwa juu ya misingi minne ya shaba. Kulabu zake zilikuwa za fedha, vivyo hivyo kifuniko cha vichwa vyake na mikanda yake. 20Vigingi vyote vya hema kwa ajili ya maskani na ua ulioizunguka vilikuwa vya shaba.

21Hii ndiyo hesabu ya maskani, maskani ya Ushuhuda, kama ilivyohesabiwa kwa agizo la Musa. Kuhesabu huko kulikuwa kazi ya Walawi, wakiongozwa na Ithamari mwana wa kuhani Haruni. 22Bezaleli mwana wa Uri, mwana wa Huri, wa kabila la Yuda, ndiye aliyefanya yote ambayo BWANA alikuwa amemwamuru Musa. 23Pamoja naye alikuwa Oholiabu mwana wa Ahisamaki, wa kabila la Dani, mchongaji na msanifu, ambaye pia alitarizi kwa rangi kwa uzi wa samawati, wa zambarau na wa rangi nyekundu, na kwa kitani safi.

24Dhahabu yote iliyotumika kwa kazi, kwa kazi yote ya mahali patakatifu, ilikuwa dhahabu iliyotolewa kama sadaka. Ilifikia karibu kilo 1,000, kwa shekeli ya mahali patakatifu. 25Fedha iliyotolewa na wale wa jumuiya waliohesabiwa ilikuwa na uzito wa karibu kilo 3,400, kwa shekeli ya mahali patakatifu. 26Hiyo ilikuwa karibu gramu 5.7 kwa kila mtu, yaani nusu shekeli kwa shekeli ya mahali patakatifu, kutoka kwa kila mwanamume wa miaka ishirini na zaidi aliyevuka kujiunga na waliohesabiwa, wanaume 603,550 kwa jumla. 27Fedha hiyo, karibu kilo 3,400, ilitumika kusubu misingi ya mahali patakatifu na misingi ya pazia la ndani. Kulikuwa na misingi mia moja, na kila msingi ulichukua karibu kilo 34. 28Kwa karibu kilo 20 zilizobaki akatengeneza kulabu za nguzo, akavifunika vichwa vyake, na kuzifunga mikanda. 29Shaba iliyotolewa kama sadaka ilifikia karibu kilo 2,400. 30Kwa shaba hiyo akatengeneza misingi ya mlango wa Hema la Kukutania, madhabahu ya shaba pamoja na wavu wake wa shaba, vyombo vyote vya madhabahu, 31misingi ya ua pande zote, misingi ya lango la ua, na vigingi vyote vya hema vya maskani na vya ua pande zote.