Faarfannaa 51

¹Yaa Waaqayyo, akkuma jaalala kee kan hin geeddaramne sanaatti na maari; akkuma baayʼina araara keetiitti, yakka koo narraa haqi.

²Yakka koo hundumaa narraa dhiqi; cubbuu koo irraas na qulqulleessi.

³Ani yakka koo beekaatii; cubbuun koos yeroo hunda fuula koo dura jira.

⁴Ani sitti, suma qofatti cubbuu hojjedheera; waan fuula kee duratti hamaa taʼes hojjedheera; kanaafuu ati murtii keetiin qajeelaa dha; yommuu murtii kennituttis hin dogoggortu.

⁵Dhuguma iyyuu ani cubbuudhaanan dhaladhe; yeroo haati koo na ulfooftee jalqabees cubbamaan ture.

⁶Ati keessa namaatti dhugaa hawwita; kanaafuu keessa kootti ogummaa na barsiisi.

⁷Hiisophiidhaan cubbuu irraa na qulqulleessi; anis nan qulqullaaʼa; na dhiqi; anis cabbii caalaatti nan addaadha.

⁸Gammachuu fi ilillee na dhageessisi; lafeen ati caccabsites haa ililchu.

⁹Fuula kee cubbuu koo irraa deebifadhu; yakka koo hundas narraa haqi.

¹⁰Yaa Waaqayyo, garaa qulqulluu na keessatti uumi; Hafuura qajeelaas na keessatti haaromsi.

¹¹Fuula kee duraa na hin balleessin; Hafuura kee Qulqulluus narraa hin fudhatin.

¹²Gammachuu fayyina keetii naa deebisi; na jiraachisuudhaafis hafuura sarmu naa kenni.

¹³Anis warra karaa kee irraa jalʼatan nan barsiisa; cubbamoonnis gara kee ni deebiʼu.

¹⁴Yaa Waaqi, Waaqa na Fayyiftu, ati dhiiga dhangalaasuu irraa na oolchi; arrabni koos qajeelummaa kee ni faarfata.

¹⁵Yaa Gooftaa, hidhii koo naa bani; afaan koos galata kee labsa.

¹⁶Ati aarsaatti hin gammaddu malee silaa nan dhiʼeessa ture; aarsaa gubamuttis hin gammaddu.

¹⁷Aarsaan Waaqni fudhatu hafuura cabaa dha; Yaa Waaqi, ati garaa cabaa fi kan gaabbu hin tuffatu.

¹⁸Jaalala keetiin Xiyooniif waan gaarii godhi; dallaa Yerusaalem ijaari.

¹⁹Yoos ati aarsaa qajeelaatti, qalma gubamuu fi qalma akkuma jirutti gubamutti ni gammadda; korommiinis iddoo aarsaa kee irratti ni dhiʼeeffaman.