Faarfannaa 147

¹Haalleluuyaa. Faarfannaadhaan Waaqa galateeffachuun akkam gaarii dha; isa galateeffachuun akkam gammachiisaa fi kan maluu dha!

²Waaqayyo Yerusaalemin ni ijaara; Israaʼeloota boojiʼamanis walitti qaba.

³Warra garaan cabe ni fayyisa; madaa isaaniis walitti hodha.

⁴Inni baayʼina urjiiwwanii ni beeka; tokkoo tokkoo isaaniis maqaa maqaadhaan waama.

⁵Gooftaan keenya guddaa dha; humni isaas jabaa dha; hubannaan isaas dhuma hin qabu.

⁶Waaqayyo warra gad qabaman ni jiraachisa; hamoota garuu lafatti darbata.

⁷Galata galchaa Waaqayyoon faarfadhaa; baganaadhaanis Waaqa keenyaaf weeddisaa.

⁸Inni samiiwwani duumessaan haguuga; lafaafis bokkaa kenna; tulluuwwan irrattis marga biqilcha.

⁹Horiidhaaf waan isaan dheedan, yommuu ilmaan arraagessaa iyyanitti nyaata isaaniif ni kenna.

¹⁰Inni jabina fardaatti hin gammadu; yookaan miilli namaa isa hin gammachiisu;

¹¹Waaqayyo warra isa sodaatanitti, warra araara isaa abdatanitti ni gammada.

¹²Yaa Yerusaalem, Waaqayyoon galateeffadhu; Yaa Xiyoon Waaqa kee galateeffadhu.

¹³Inni danqaraa karra keetii ni jabeessaatii; ijoollee kees si keessatti eebbisa.

¹⁴Daarii keetiif nagaa kenna; qamadii qulqulluudhaanis si quubsa.

¹⁵Inni ajaja isaa gara lafaatti ni erga; dubbiin isaas ni ariifata.

¹⁶Inni cabbii akkuma suufiitti diriirsa; qorras akkuma daaraatti bittinneessa.

¹⁷Dhagaa cabbii akkuma cirrachaa gad darbata. Dhaamocha isaa dura eenyutu dhaabachuu dandaʼa?

¹⁸Inni dubbii isaa ergee isaan baqsa; bubbee isaa ni kaasa; bishaanonnis ni yaaʼu.

¹⁹Inni dubbii isaa Yaaqoobitti, seeraa fi sirna isaa immoo Israaʼelitti mulʼiseera.

²⁰Waan kana saba biraa tokkoof iyyuu hin goone; isaan seera isaa hin beekan. Haalleluuyaa.