Faarfannaa 103

¹Yaa lubbuu ko, Waaqayyoon eebbisi; keessi namummaa koo hundi maqaa isaa qulqulluu sana eebbisaa.

²Yaa lubbuu koo Waaqayyoon eebbisi; tola isaa hundas hin irraanfatin.

³Inni cubbuu kee hundumaa siif dhiisa; dhukkuba kee hundumaa ni fayyisa;

⁴jireenya kee boolla irraa ni baraara; jaalalaa fi gara laafinaan si gonfa;

⁵akka dargaggummaan kee akkuma risaa haaromfamuufis, inni fedhii kee waan gaariidhaan ni guuta.

⁶Waaqayyo warra cunqurfaman hundaaf qajeelummaa fi murtii qajeelaa kenna.

⁷Inni karaa isaa Museetti, hojii isaa immoo saba Israaʼelitti beeksise.

⁸Waaqayyo gara laafessaa fi arjaa dha; inni aaruuf hin ariifatu; jaalalli isaas baayʼee dha.

⁹Inni yeroo hunda hin dheekkamu; aarii isaa illee bara baraan hin kuufatu;

¹⁰inni akka cubbuu keenyaatti nu hin adabne; yookaan akka balleessaa keenyaatti nuuf hin deebifne.

¹¹Akkuma samiiwwan lafa irraa ol fagaatan sana, jaalalli inni warra isa sodaataniif qabu akkasuma guddaa dha;

¹²akkuma baʼi biiftuu lixa biiftuu irraa fagaatu, akkasuma inni balleessaa keenya nurraa haqeera.

¹³Akkuma abbaan ijoollee isaatiif garaa laafu, Waaqayyo warra isa sodaataniif garaa ni laafa;

¹⁴inni akka nu itti uumamne ni beekaatii; akka nu biyyoo taanes ni yaadata.

¹⁵Barri namaa akkuma margaa ti; akka abaaboo dirrees ni misa;

¹⁶inni yeroo bubbeen itti bubbisutti ni bada; iddoon isaas deebiʼee isa hin yaadatu.

¹⁷Jaalalli Waaqayyoo garuu bara baraa hamma bara baraatti warra isa sodaatan wajjin ni jiraata; qajeelummaan isaa immoo ijoollee ijoollee isaaniitti darba;

¹⁸warra kakuu isaa eeganitti, warra ajaja isaatti buluu yaadatanittis ni darba.

¹⁹Waaqayyo teessoo isaa samii keessa dhaabbateera; mootummaan isaas waan hunda bulcha.

²⁰Isin ergamoonni isaa, warri ajaja isaa eegdan jajjaboon, warri dubbii isaatiif ajajamtanis Waaqayyoon eebbisaa.

²¹Raayyaan isaa hundinuu, isin tajaajiltoonni isaa warri fedhii isaa guuttan Waaqayyoon eebbisaa.

²²Uumamawwan bulchiinsa isaa jala lafa hunda jirtan hundi Waaqayyoon eebbisaa. Yaa lubbuu ko, Waaqayyoon eebbisi.