Faarfannaa 102

¹Yaa Waaqayyo, kadhannaa koo naa dhagaʼi; iyyi ani gargaarsaaf iyyadhus si bira haa gaʼu.

²Yeroo ani dhiphadhetti, fuula kee na duraa hin dhoksin. Gurra kee gara kootti deebisi; yommuu ani si waammadhu dafiitii deebii naa kenni.

³Barri koo akkuma aaraatti ni badaatii; lafeen koos akkuma barbadaa ibiddaa bobaʼaa jira.

⁴Garaan koo dhukkubsatee akkuma margaa coollageera; ani nyaata koo nyaachuu irraanfadheera.

⁵Sababii ani guddisee aaduuf, lafeen koo gogaa kootti maxxaneera.

⁶Ani akka urunguu gammoojjii, akka urunguu lafa barbadaaʼe keessaa nan taʼe.

⁷Ani hirriba malee nan bula; akka simbirroo kophaa ishee guutuu manaa irra jirtuus taʼeera.

⁸Diinonni koo guyyaa guutuu na arrabsu; warri natti qoosanis abaarsaaf maqaa kootti fayyadamu.

⁹Ani akkuma buddeenaatti daaraa nyaadheeraattii; dhugaatii koottis imimmaan makadheera;

¹⁰kunis sababii aarii fi dheekkamsa keetiitiif natti dhufe; ati ol na fuutee gad na darbatteertaatii.

¹¹Barri koo akkuma gaaddidduu galgalaa ti; anis akkuma margaa gogeera.

¹²Yaa Waaqayyo, ati bara baraan teessoo irra jirta; yaadannoon kees dhaloota hundatti darba.

¹³Ati kaatee Xiyooniif garaa ni laafta; yeroon itti isheen fudhatama argachuu qabdu ammumaatii; yeroon murteeffame sun gaʼeeraa.

¹⁴Garboonni kee dhagaa isheetti gammaduutii; biyyoo ishees ni mararfatu.

¹⁵Saboonni maqaa Waaqayyoo ni sodaatu; mootonni lafaa hundinuus ulfina kee ni kabaju.

¹⁶Waaqayyo deebisee Xiyoonin ijaaraatii; ulfina isaatiinis ni mulʼata.

¹⁷Inni kadhannaa gadadamtootaa ni dhagaʼa; waammata isaaniis hin tuffatu.

¹⁸Akka sabni hamma ammaatti hin dhalatin Waaqayyoon galateeffatuuf, wanni kun akkana jedhamee dhaloota dhufuuf haa barreeffamu:

¹⁹“ Waaqayyo iddoo qulqullummaa isaa gubbaa irraa gad ilaale; samii irraas gara lafaa gad milʼate;

²⁰kanas aaduu warra hidhamanii dhagaʼuu fi warra duuti itti murame baasuudhaaf hojjete.”

²¹Akkasiin maqaan Waaqayyoo Xiyoon keessatti, galanni isaas Yerusaalem keessatti ni labsama;

²²kunis yommuu saboonnii fi mootummoonni, Waaqayyoon waaqeffachuuf walitti qabamanitti taʼa.

²³Inni jabina koo karaatti hambise; umurii koos ni gabaabse.

²⁴Anis akkanan jedhe: “Yaa Waaqa ko, walakkaa umurii kootti na hin fudhatin; waggoonni kee dhalootaa hamma dhaloota hundaatti itti fufu.

²⁵Ati jalqabatti lafa hundeessite; samiiwwanis hojii harka keetii ti.

²⁶Isaan ni badu; ati garuu ni jiraatta; hundumti isaanii akkuma wayyaa ni dhumu. Ati akkuma uffataa isaan geeddarta; isaanis ni badu.

²⁷Ati garuu sanuma; umuriin kees gonkumaa dhuma hin qabu.

²⁸Ijoolleen garboota keetii sodaa malee jiraatu; sanyiin isaaniis fuula kee dura jiraata.”