Mapisarema 132

¹Haiwa Jehovha, rangarirai Dhavhidhi namatambudziko ake ose aakasangana nawo.

²Akapika mhiko kuna Jehovha, akaita mhiko kuna Wamasimba waJakobho achiti,

³“Handingapindi mumba mangu kana kuenda kundovata pamubhedha wangu,

⁴handingatenderi hope mumaziso angu, kana kutsumwaira mumeso angu,

⁵kusvikira ndawana nzvimbo yaJehovha, nzvimbo yokugara yoWamasimba waJakobho.”

⁶Takazvinzwa muEfurata, takasangana nazvo muminda yeJaari tikati,

⁷“Ngatiendei kunzvimbo yake yokugara; ngatinamatei pachitsiko chetsoka dzake,

⁸haiwa Jehovha, simukai muuye kunzvimbo yenyu yokuzorora, imi neareka yesimba renyu.

⁹Vaprista venyu dai vafukidzwa nokururama; dai vatsvene venyu vaimba nomufaro.”

¹⁰Nokuda kwaDhavhidhi muranda wenyu, musaramba muzodziwa wenyu.

¹¹Jehovha akapika mhiko kuna Dhavhidhi, mhiko yechokwadi yaasingagoni kushandura achiti, “Mumwe wechizvarwa chako ndichamugadza pachigaro chako choushe,

¹²kana vanakomana vako vakachengeta sungano yangu nezvandakatema zvandakavadzidzisa, ipapo vanakomana vavo vachagara pachigaro chako choushe nokusingaperi-peri.”

¹³Nokuti Jehovha akasarudza Zioni, akarida kuti huve ugaro hwake achiti,

¹⁴“Iyi ndiyo nzvimbo yangu yokuzorora nokusingaperi-peri; ipapa ndipo pandichagara samambo, nokuti ndakapada,

¹⁵ndichariropafadza nezvakawanda; ndichagutsa varombo varo nezvokudya.

¹⁶Ndichafukidza vaprista varo noruponeso, uye vatsvene varo vachagara vachiimba nomufaro.

¹⁷“Pano ndipo pandichameresa nyanga yaDhavhidhi, uye ndichatungidza mwenje womuzodziwa wangu.

¹⁸Ndichafukidza vavengi vake nenyadzi, asi korona yake ichabwinya kwazvo.”