Mithali 1

1Hizi ni mithali za Sulemani, mwana wa Daudi, mfalme wa Israeli. 2Ni kwa ajili ya kujifunza hekima na nidhamu, kwa ajili ya kuelewa maneno ya busara, 3kwa kupokea mafunzo yaletayo busara: haki, uadilifu na usawa, 4ili kuwafanya wajinga wawe werevu, na kuwapa vijana maarifa na uwezo wa kupanga kwa hekima. 5Mwenye hekima na asikilize, apate kuongeza elimu; mwenye ufahamu apate ustadi wa kuongoza njia yake, 6ili waelewe mithali na misemo ya picha, maneno ya wenye hekima na mafumbo yao. 7Maarifa huanza kwa kumcha BWANA, lakini wapumbavu huidharau hekima na nidhamu.

8Mwanangu, sikiliza baba yako anapokuonya, wala usiyaache mafundisho ya mama yako. 9Kwa maana yatakuwa shada zuri kichwani pako na mapambo yanayoning’inia shingoni mwako. 10Mwanangu, wenye dhambi wakijaribu kukuvuta, usiende pamoja nao. 11Wakisema, “Njoo pamoja nasi; tuvizie ili tumwage damu; tumwekee mtego asiye na hatia, bila sababu yoyote; 12tuwameze wakiwa hai, kama Kuzimu ifanyavyo, wakiwa wazima, kama watu washukao shimoni; 13tutajipatia mali za kila aina na kuzijaza nyumba zetu vitu tunavyoteka; 14unganisha fungu lako na letu; kutakuwa na mfuko mmoja kwa sisi sote,” 15mwanangu, usiende njia hiyo pamoja nao; iepushe miguu yako na mapito yao. 16Kwa maana miguu yao hukimbia mbio kuelekea uovu, nao huharakisha kuua. 17Ni kazi bure kutandika wavu mbele ya macho ya ndege yeyote. 18Lakini ni damu yao wenyewe wanayoivizia; ni maisha yao wenyewe wanayoyawekea mtego. 19Ndivyo inavyowapata wote wanaonyakua faida ya udanganyifu: faida hiyo huwagharimu maisha yao.

20Hekima anapaza sauti barabarani; katika viwanja vya wazi anafanya sauti yake isikike. 21Katika pembe za njia zenye shughuli nyingi, juu ya makelele, anaita; katika malango ya mji ambapo watu huingia na kutoka, anatoa hotuba yake: 22“Enyi wajinga, mtaendelea kupenda ujinga hadi lini? Wenye dharau watafurahia dharau yao hadi lini, na wapumbavu kuchukia maarifa? 23Rudini ninapowakaripia, nami nitawamiminia moyo wangu na kuwajulisha maneno yangu. 24Lakini kwa kuwa niliita nanyi hamkutaka kuja, kwa kuwa nilinyosha mkono wangu na hakuna aliyejali, 25kwa kuwa mliyaweka kando mashauri yangu yote na hamkutaka kabisa makaripio yangu, 26basi maangamizi yatakapowajia, mimi nami nitacheka; litakapofika jambo mnaloliogopa, nitawazomea, 27hofu itakapowavamia kama dhoruba na maangamizi kama kimbunga, taabu na shida zitakapowazunguka. 28Ndipo watakaponililia, lakini sitawajibu; watanitafuta kwa bidii bila kunipata. 29Haya yote ni kwa sababu walichukia maarifa, na kumcha BWANA hakukuwa chaguo lao. 30Walikataa shauri langu na kudharau kila karipio nililowapa. 31Kwa hiyo watakula yale yaliyotokana na njia yao ya maisha na kushiba hila zao wenyewe kupita kiasi. 32Wajinga hugeuka mbali, nako huwaua; wapumbavu hujiona salama na kustarehe, nako huwaangamiza. 33Lakini kila anisikilizaye ataishi salama, kwa utulivu na bila kuogopa madhara.”