Mithali 10

1Mithali za Sulemani. Mwana mwenye hekima ni furaha ya baba yake, bali mwana mpumbavu ni huzuni kwa mama yake. 2Mali iliyopatikana kwa uovu haifai kitu mwishowe, bali haki huokoa na mauti. 3BWANA hatamwacha mwenye haki afe njaa, bali huyasukuma mbali yale wanayoyatamani waovu. 4Mkono mlegevu huleta umaskini, bali mikono yenye bidii huleta utajiri. 5Mwana anayekusanya mazao wakati wa kiangazi ana busara; mwana anayelala wakati wa mavuno huleta fedheha. 6Wenye haki huvaa baraka kama taji, bali jeuri imejificha nyuma ya maneno ya waovu. 7Wenye haki hukumbukwa kwa baraka, bali jina la waovu huoza. 8Wenye hekima moyoni hupokea mafundisho, bali mpumbavu asiyeacha kuongea ataangamia. 9Anayeishi kwa uaminifu hutembea bila hofu, bali anayefuata njia zilizopotoka atafichuliwa. 10Anayekonyeza kwa jicho huleta taabu, na mpumbavu asiyeacha kuongea ataangamia. 11Maneno ya mwenye haki ni chemchemi ya uzima, bali nyuma ya maneno ya waovu imejificha jeuri. 12Chuki huanzisha ugomvi, bali upendo hutandika pazia juu ya kila kosa. 13Hekima huonekana midomoni mwa mtu mwenye ufahamu, bali fimbo ni kwa ajili ya mgongo wa asiye na akili. 14Wenye hekima huhifadhi maarifa, bali kinywa cha mpumbavu hukaribisha maangamizi. 15Mali ya tajiri ni mji wenye ngome; umaskini ndio unaowaangamiza maskini. 16Anachopata mwenye haki huelekea uzimani; anachojipatia mwovu huelekea dhambini. 17Anayeshika nidhamu yuko katika njia ya uzima, bali anayekataa maonyo huwapotosha wengine. 18Kuficha chuki huzaa midomo ya uongo, na kueneza masingizio humfanya mtu mpumbavu. 19Maneno yakiwa mengi, kosa haliko mbali, bali anayezuia maneno yake ana hekima. 20Ulimi wa mwenye haki ni fedha safi; moyo wa waovu una thamani ndogo sana. 21Maneno ya mwenye haki huwalisha wengi, bali wapumbavu hufa kwa kukosa akili. 22Ni baraka ya BWANA inayotajirisha, na kazi ngumu haiongezi kitu juu yake. 23Kutenda mabaya ni mchezo kwa mpumbavu, bali mtu mwenye ufahamu hufurahia hekima. 24Kile waovu wanachokiogopa ndicho kitakachowapata, bali kile wenye haki wanachokitamani watapewa. 25Kimbunga kikishapita, waovu wametoweka, bali wenye haki wana msingi udumuo milele. 26Kama siki menoni au moshi machoni ndivyo alivyo mjumbe mvivu kwa wale wanaomtuma. 27Kumcha BWANA hurefusha maisha, bali miaka ya waovu hukatizwa mapema. 28Wanachotumainia wenye haki huishia katika furaha, bali matumaini ya waovu huwa bure. 29Kwa wale walio wakamilifu njia ya BWANA ni kimbilio, bali kwa watenda mabaya ni maangamizi. 30Wenye haki hawataondoshwa kamwe, bali waovu hawatabaki katika nchi. 31Hekima huchipuka kinywani mwa mwenye haki kama tunda, bali ulimi uliopotoka utakatwa. 32Wenye haki wanajua jinsi ya kusema yanayopendeza, bali waovu husema tu yaliyopotoka.