Mithali 18

1Anayejitenga na wengine hufuata tamaa zake za ubinafsi na kupinga kila shauri jema. 2Mpumbavu hafurahii ufahamu, ila tu kutoa maoni yake mwenyewe. 3Pamoja na uovu huja dharau, na pamoja na aibu huja fedheha. 4Maneno ya mtu yanaweza kuwa maji ya vilindi, na chemchemi ya hekima ni mto unaobubujika. 5Si vyema kumpendelea mwenye hatia wala kumnyima haki asiye na hatia. 6Midomo ya mpumbavu humwingiza katika magomvi, na kinywa chake hujitakia kipigo. 7Kinywa cha mpumbavu ndicho kinachomwangamiza, na midomo yake huinasa nafsi yake mwenyewe. 8Uchongezi ni kama vipande vitamu vya chakula; hushuka mpaka ndani kabisa. 9Anayelegea katika kazi yake ni ndugu wa karibu wa mharibifu. 10Jina la BWANA ni mnara wa ngome; wenye haki hulikimbilia wakalindwa juu salama. 11Matajiri hudhani mali yao ni mji wenye ngome, ukuta mrefu unaowazunguka, lakini ni mawazoni mwao tu. 12Moyo wa kiburi hutangulia anguko, na unyenyekevu hutangulia heshima. 13Kujibu kabla ya kusikiliza ni upumbavu na aibu. 14Roho ya mwanadamu inaweza kustahimili ugonjwa, bali ni nani awezaye kustahimili roho iliyovunjika? 15Moyo wenye ufahamu hupata maarifa, na wenye hekima hutega sikio wapate zaidi. 16Zawadi humfungulia mtoaji milango na kumfikisha mbele ya wakuu. 17Wa kwanza kueleza kesi yake huonekana yuko sahihi, mpaka upande mwingine unapokuja na kumuuliza maswali. 18Kupiga kura humaliza mabishano na kuwatenganisha wapinzani wenye nguvu. 19Ndugu aliyekosewa ni mgumu kumrudisha kuliko mji wenye ngome; magomvi ni kama malango ya ngome yaliyofungwa kwa makomeo. 20Watu watashibishwa kwa matunda ya maneno yao; watatoshelezwa kwa mavuno ya midomo yao. 21Ulimi una uwezo wa uzima na wa kifo, na wanaopenda kusema watakula matunda yake. 22Mwanamume apataye mke amepata kitu chema na kupokea kibali kutoka kwa BWANA. 23Maskini hulazimika kuomba huruma; tajiri anaweza kujibu kwa ukali. 24Mtu mwenye marafiki wengi bado anaweza kuangamia, bali kuna marafiki wanaoambatana zaidi kuliko ndugu.