Mithali 12

1Kupenda nidhamu ni kupenda maarifa; kuchukia kuonywa ni kuwa kama hayawani. 2Mtu mwema hujipatia kibali kwa BWANA, bali yeye humhukumu anayepanga maovu. 3Hakuna anayefanywa imara kwa uovu, bali mizizi ya wenye haki haing’oleki. 4Mke hodari ni taji kichwani mwa mumewe, bali mke anayemwaibisha ni uozo katika mifupa yake. 5Mipango ya wenye haki ni ya haki, bali ushauri wa waovu umejaa hila. 6Waovu wanaposema, wanaweka mtego wa kuua, bali maneno ya wanyofu huwaokoa. 7Waovu hupinduliwa wakatoweka, bali nyumba ya wenye haki itasimama imara. 8Watu husifiwa kwa akili zao njema, bali mwenye moyo uliopotoka hudharauliwa. 9Afadhali kuwa mtu wa kawaida mwenye mtumishi kuliko kujifanya mkuu na kukosa chakula. 10Mwenye haki humtunza mnyama wake, bali hata wema wa waovu ni ukatili. 11Wanaolima mashamba yao watapata chakula tele, bali wanaofuata ndoto tupu hawana akili. 12Waovu hutamani walichokinasa watu wabaya, bali mzizi wa wenye haki huzaa matunda. 13Waovu hunaswa na maneno yao ya dhambi, bali wenye haki huepuka taabu. 14Watu hujazwa mema kwa matunda ya maneno yao, na kazi ya mikono yao huwarudia. 15Wapumbavu hudhani njia yao wenyewe ni sahihi, bali wenye hekima husikiliza ushauri. 16Mpumbavu huonyesha kuudhika kwake papo hapo, bali mtu mwerevu hupuuza tusi. 17Shahidi mwaminifu husema yaliyo haki, bali shahidi wa uongo husema uongo. 18Maneno ya haraka hukata kama upanga, bali maneno ya wenye hekima huponya. 19Maneno ya kweli hudumu milele, bali uongo hupita kufumba na kufumbua. 20Mioyoni mwa wapangao maovu mna hila, bali wale wanaotafuta amani wana furaha. 21Hakuna madhara halisi yanayowapata wenye haki, bali waovu wamejaa taabu. 22BWANA huichukia midomo ya uongo, bali watu waaminifu ni furaha yake. 23Watu wenye akili huyaweka moyoni wanayoyajua, bali mioyo ya wapumbavu hubwabwaja upumbavu. 24Wenye bidii hatimaye watakuwa viongozi, bali wavivu watalazimishwa kuwafanyia wengine kazi. 25Wasiwasi huulemea moyo, bali neno la upole huuinua. 26Wenye haki huwapa rafiki zao mwongozo mwema, bali njia wanayoifuata waovu huwapotosha. 27Wavivu hawapiki kamwe walichowinda, bali wenye bidii huthamini walicho nacho. 28Katika njia ya haki kuna uzima; katika mapito hayo hakuna kifo.