Mithali 19

1Afadhali kuwa maskini na kuishi kwa uadilifu kuliko kuwa mpumbavu mwenye ulimi wa uongo. 2Bidii bila maarifa si njema; anayekimbilia mbele hupotea njia. 3Watu huharibu maisha yao kwa upumbavu wao wenyewe, kisha mioyo yao humghadhibikia BWANA. 4Mali huleta marafiki wengi, bali maskini hupoteza hata marafiki alio nao. 5Shahidi wa uongo hataepuka adhabu, naye anayebubujika uongo hatanusurika. 6Wengi hujaribu kupata upendeleo wa mtawala, na kila mtu ni rafiki wa yule anayetoa zawadi. 7Jamaa wote wa maskini huwaepuka; zaidi sana rafiki zao hukaa mbali! Maskini huwafuata kwa maombi, lakini wametoweka. 8Kupata akili ni kujipenda mwenyewe; kushika ufahamu ni kufanikiwa. 9Shahidi wa uongo hataepuka adhabu, naye anayebubujika uongo ataangamia.

10Anasa haimfai mpumbavu; zaidi sana mtumishi asiwatawale wakuu. 11Akili njema humfanya mtu kuwa mvumilivu, na ni heshima yake kupuuza kosa. 12Mfalme mwenye ghadhabu hunguruma kama simba, bali upendeleo wake hushuka kama umande juu ya majani. 13Mwana mpumbavu humwangamiza baba yake, na mke mgomvi ni kama paa linalovuja bila kukoma. 14Nyumba na mali hurithiwa kutoka kwa wazazi, bali mke mwenye busara hutoka kwa BWANA. 15Uvivu huleta usingizi mzito, na mtu mzembe atakaa na njaa. 16Anayeishika amri huyalinda maisha yake, bali asiyejali jinsi anavyoishi atakufa. 17Anayemhurumia maskini anamkopesha BWANA, naye atamlipa kwa yale aliyoyatenda. 18Mwadibishe mwanao wakati bado kuna tumaini; usijifanye mwenye hatia ya kifo chake. 19Mtu mwenye hasira kali lazima alipe adhabu; ukimwokoa, utalazimika kufanya hivyo tena tu. 20Sikiliza ushauri na ukubali maonyo, ili mwishowe uwe na hekima. 21Watu wana mipango mingi mioyoni mwao, bali ni kusudi la BWANA litakalotimia. 22Watu wanachotaka kwa mtu ni uaminifu; afadhali kuwa maskini kuliko mwongo. 23Kumcha BWANA huelekeza kwenye uzima; aliye nako hupumzika ameridhika, bila kuguswa na taabu. 24Wavivu hutumbukiza mkono wao sahanini wala hawataki hata kuuinua kuurudisha vinywani mwao. 25Mchape mwenye dharau, na wajinga watajifunza somo; mrekebishe mwenye ufahamu, naye atapata maarifa. 26Mwana anayemnyang’anya baba yake na kumfukuza mama yake huleta aibu na fedheha. 27Mwanangu, ukiacha kusikiliza maonyo, utapotea mbali na maneno ya maarifa. 28Shahidi mpotovu huifanya haki kuwa mzaha, na waovu humeza ubaya mzima mzima. 29Adhabu ziko tayari kwa wenye dharau, na fimbo kwa migongo ya wapumbavu.