Mithali 24

1Usiwaonee wivu watu waovu wala usitamani kuwa pamoja nao, 2kwa sababu akili zao zimeelekea kwenye jeuri, na maneno yao yote ni ya kuleta madhara. 3Nyumba hujengwa kwa hekima na kuthibitishwa kwa ufahamu; 4kwa maarifa vyumba vyake hujazwa kila aina ya hazina ya thamani na nzuri. 5Watu wenye hekima wana nguvu nyingi, na wenye maarifa huzidi kuwa na nguvu. 6Pigana vita kwa maongozi ya busara; ushindi hutokana na kuwa na washauri wengi. 7Hekima iko mbali, mpumbavu hawezi kuifikia; langoni pa mji, mambo yanapoamuliwa, mpumbavu hana la kusema. 8Yeyote anayepanga kutenda maovu atajulikana kuwa mtu wa hila. 9Kupanga upumbavu ni dhambi, na watu humchukia mwenye dharau. 10Ukikata tamaa nyakati za shida, nguvu zako ni ndogo kweli! 11Waokoe wanaoburutwa kwenda kuuawa; wazuie wale wanaojikokota kuelekea machinjoni. 12Ukisema, “Lakini sisi hatukujua lolote juu ya jambo hili,” je, yeye apimaye mioyo haoni ukweli? Yeye aulindaye uhai wako anajua vizuri, naye atamlipa kila mtu kwa kadiri ya alichotenda. 13Mwanangu, kula asali, kwa sababu ni nzuri; asali ya sega ina ladha tamu. 14Ujue kwamba hekima ni hivyo kwa nafsi yako: ukiipata, utakuwa na wakati ujao, na tumaini lako halitapotea.

15Usivizie kama mhalifu kwenye nyumba ya mtu mwenye haki; usivamie mahali anapoishi. 16Kwa maana mwenye haki anaweza kuanguka mara saba na bado akainuka tena, lakini waovu huangushwa na msiba. 17Adui yako akianguka, usisherehekee; akijikwaa, moyo wako usifurahi, 18BWANA asije akaona na kuchukizwa, akaiondoa hasira yake kwake. 19Usikasirike kwa sababu ya wale wanaotenda maovu wala usiwaonee wivu waovu, 20kwa maana watu waovu hawana wakati ujao; taa ya waovu itazimika. 21Mche BWANA na mfalme, mwanangu, wala usishirikiane na wale wanaotaka kupindua mambo, 22kwa maana maafa yatawapata bila onyo, na nani awezaye kusema maangamizi ambayo BWANA na mfalme wanaweza kuleta?

23Haya pia ni maneno ya wenye hekima: Si haki kupendelea mtu katika kesi mahakamani. 24Yeyote anayemwambia mwenye hatia, “Huna hatia,” atalaaniwa na mataifa na kuhukumiwa na watu wa kila taifa. 25Lakini wale wanaomtia hatiani mwenye hatia wataheshimiwa, na baraka tele itawajia. 26Kutoa jibu lililo wazi ni kama kubusu midomo. 27Kwanza panga vizuri kazi yako ya nje na kuyaandaa mashamba yako; baada ya hapo, jenga nyumba yako.

28Usimshuhudie jirani yako vibaya bila sababu nzuri, wala usitumie midomo yako kupotosha. 29Usiseme, “Nitamtendea kama alivyonitendea; nitamlipa kwa yale aliyoyafanya.” 30Nilipita kando ya shamba la mtu mvivu, kando ya shamba la mizabibu la mtu asiye na akili, 31nikaona miiba imeota kila mahali, magugu yamefunika ardhi, na ukuta wake wa mawe umeanguka. 32Nililitazama na kulitafakari; niliona, nikajifunza somo hili: 33kulala kidogo zaidi, kusinzia kidogo zaidi, kulala kidogo zaidi mikono ikiwa imekunjwa, 34na umaskini utakujia kama mzururaji njiani, na uhitaji kama mtu mwenye ngao.