Mithali 15

1Jibu la upole hutuliza hasira, bali neno la kuumiza huwasha hasira. 2Wenye hekima huyatumia maarifa vizuri wanaposema, bali wapumbavu hutoa upuuzi. 3Hakuna mahali BWANA asipoona; macho yake huwaangalia wabaya na wema pia. 4Maneno ya upole ni mti wa uzima, bali ulimi uliopotoka huiponda roho. 5Mpumbavu hukataa nidhamu ya baba yake, bali anayekubali maonyo huonyesha akili. 6Nyumba ya mwenye haki ina hazina kubwa, bali mapato ya mwovu huleta taabu. 7Wenye hekima hueneza maarifa kwa maneno yao, bali mioyo ya wapumbavu haifanyi hivyo. 8BWANA huchukia dhabihu za waovu, bali maombi ya wanyofu ni furaha yake. 9Njia wanayoishi waovu ni chukizo kwa BWANA, bali humpenda yeyote anayejitahidi kufuata haki. 10Nidhamu kali inamsubiri anayeiacha njia iliyo sawa; anayechukia kuonywa atakufa. 11Ikiwa Kuzimu na Uharibifu viko wazi mbele ya BWANA, si zaidi sana mioyo ya wanadamu! 12Wenye dharau huchukia kurekebishwa; hawaendi kwa wenye hekima kuomba ushauri. 13Moyo wenye furaha hung’arisha uso, bali uchungu wa moyo huiponda roho. 14Moyo wenye ufahamu hutafuta maarifa, bali wapumbavu hujilisha upumbavu. 15Kila siku ni ngumu kwa mnyonge, bali moyo wenye furaha una karamu isiyokoma. 16Afadhali kuwa na kidogo na kumcha BWANA kuliko mali nyingi pamoja na taabu. 17Afadhali sahani ya mboga za majani palipo na upendo kuliko ndama aliyenona akiandaliwa kwa chuki. 18Mtu mwenye hasira kali huanzisha ugomvi, bali mvumilivu hutuliza mabishano. 19Kwa mvivu, njia ni ua wa miiba, bali kwa wanyofu ni barabara kuu iliyo laini. 20Mwana mwenye hekima humfurahisha baba yake, bali ni mpumbavu tu anayemdharau mama yake. 21Upumbavu humfurahisha mtu asiye na akili, bali mwenye ufahamu hushika njia iliyonyooka. 22Mipango huharibika kwa kukosa ushauri, bali kwa washauri wengi hufanikiwa. 23Kutoa jibu zuri ni furaha, na neno kwa wakati unaofaa, jinsi lilivyo jema! 24Kwa wenye hekima, njia ya uzima hupanda juu, mbali na Kuzimu huko chini. 25BWANA huibomoa nyumba ya wenye kiburi mpaka chini, bali huyalinda mawe ya mpaka wa mjane yasihamishwe. 26BWANA huichukia mipango mibaya, bali maneno ya upole ni safi machoni pake. 27Wenye tamaa ya faida isiyo halali huziletea jamaa zao taabu, bali wanaochukia rushwa wataishi. 28Wenye haki hufikiri kabla ya kujibu, bali waovu hutema maovu. 29BWANA hukaa mbali na waovu, bali huyasikiliza maombi ya wenye haki. 30Uso unaong’aa huleta furaha moyoni, na habari njema hutia nguvu mifupani. 31Anayesikiliza maonyo yanayoleta uzima atakaa nyumbani pamoja na wenye hekima. 32Wanaopuuza nidhamu hujidharau wenyewe, bali wanaopokea maonyo hupata ufahamu. 33Kumcha BWANA hufundisha hekima, na unyenyekevu hutangulia heshima.