Mithali 9

1Hekima amejijengea nyumba na kuichongea nguzo saba. 2Amechinja wanyama wake kwa ajili ya karamu, amechanganya divai yake na kuandaa meza yake. 3Amewatuma wasichana wake na mwaliko; anaita kutoka mahali palipoinuka mjini: 4“Yeyote aliye mjinga, na aingie hapa!” Kwa yeyote asiye na akili husema, 5“Njooni, mle chakula changu na kuonja divai niliyoichanganya. 6Acheni njia zenu za ujinga mpate kuishi; nendeni moja kwa moja katika njia ya ufahamu. 7Mwonye mwenye dharau nawe utatukanwa; mkaripie mwovu nawe utaumizwa. 8Usimkaripie mwenye dharau, la sivyo atakuchukia; mkaripie mwenye hekima, naye atakupenda. 9Mpe shauri mwenye hekima naye atazidi kuwa na hekima; mfundishe mwenye haki naye ataongeza yale anayoyajua.

10Hekima huanza kwa kumcha BWANA, na kumjua Mtakatifu ndio ufahamu. 11Kwa maana kupitia kwangu siku zako zitakuwa nyingi, na miaka ya maisha yako itaongezeka. 12Ukiwa na hekima, hekima yako itakufaidia wewe; ukidharau, gharama ni yako peke yako.” 13Mwanamke Upumbavu hupiga kelele nyingi; ni mjinga wala hana maarifa. 14Huketi mlangoni pa nyumba yake, juu ya kiti mahali palipoinuka mjini, 15akiwaita wanaopita, wanaoendelea moja kwa moja na safari yao: 16“Yeyote aliye mjinga, na aingie hapa!” Na kwa yeyote asiye na akili husema, 17“Maji yaliyoibwa yana ladha tamu, na chakula kinacholiwa mahali pasipoonekana ni furaha.” 18Lakini wanaoingia hawajui kwamba wafu wamo nyumbani mle, kwamba wageni wake wamelala ndani kabisa ya Kuzimu.