Mithali 8

1Sikilizeni! Je, si Hekima anayeita, na Ufahamu anayepaza sauti yake? 2Juu ya mahali palipoinuka kando ya barabara, mahali njia zinapokutana, anasimama; 3kando ya malango mahali watu wanapoingia mjini, kwenye milango, anaita kwa sauti kuu: 4“Ninawaita ninyi, watu wote; sauti yangu inawafikia wote walio duniani. 5Enyi wajinga, jifunzeni kuwa werevu; ninyi wapumbavu, pateni akili. 6Sikilizeni, kwa maana ninayosema yanamfaa mkuu, na midomo yangu hutoa yaliyo sawa. 7Kwa maana kinywa changu husema kweli; midomo yangu haiwezi kuvumilia uovu. 8Kila neno la kinywa changu ni la haki; hakuna lililopindika wala lililopotoka hata moja. 9Yote ni wazi kwa kila mwenye ufahamu, na sawa kwa wale waliopata maarifa. 10Chagueni nidhamu yangu badala ya fedha, na maarifa kuliko dhahabu iliyo bora. 11Kwa maana hekima ina thamani kuliko marijani nyekundu; hakuna kitu unachoweza kutamani kinachokaribia kuwa kama yeye. 12Mimi, Hekima, ninaishi nyumba moja na Werevu, nami ninapata maarifa na mipango mizuri. 13Kumcha BWANA ni kuchukia uovu. Kiburi, majivuno, mwenendo mbaya na maneno ya upotovu ndivyo ninavyovichukia. 14Shauri na busara njema ni mali yangu; mimi ni Ufahamu, nami nina nguvu. 15Kupitia kwangu wafalme hutawala, na watawala hutunga sheria za haki. 16Kupitia kwangu wakuu huongoza, na watu wenye vyeo, wote wanaohukumu kwa haki. 17Wale wanaonipenda nami nawapenda, na wale wanaonitafuta kwa bidii wataniona. 18Utajiri na heshima ni vyangu kuvitoa, mali ya kudumu na haki. 19Ninachozaa ni bora kuliko dhahabu, dhahabu iliyo safi kabisa, na mavuno yangu yanazidi fedha iliyo bora. 20Natembea katika barabara ya haki, sawasawa katika mapito ya uadilifu, 21nikiwapa wale wanaonipenda mali halisi kuwa urithi wao na kuzijaza ghala zao.

22BWANA aliniumba niwe wa kwanza wa njia zake, kabla ya kazi zake za zamani. 23Zamani za kale niliwekwa mahali pangu, mwanzo kabisa, kabla dunia haijaanza. 24Kabla bahari hazijakuwapo nilizaliwa, kabla chemchemi zilizojaa maji hazijakuwapo. 25Kabla milima haijawekwa juu ya misingi yake, kabla ya vilima, nilizaliwa, 26kabla hajaifanya nchi na mbuga, wala chembe za kwanza za udongo wa ulimwengu. 27Nilikuwepo alipoziweka mbingu mahali pake, alipochora duara juu ya uso wa kilindi, 28alipoyaweka mawingu juu angani na kuzifanya chemchemi za kilindi zibubujike kwa nguvu, 29alipoipa bahari mpaka wake ili maji yasipite zaidi ya agizo lake, alipoipanga misingi ya dunia, 30Nilikuwa karibu naye, fundi mkuu, nami nilikuwa furaha yake siku baada ya siku, nikicheza mbele yake siku zote, 31nikicheza katika ulimwengu wote alioufanya, na kuwafurahia wanadamu.

32Basi sasa, wana, nisikilizeni: heri wale wanaodumu katika njia zangu! 33Sikilizeni maonyo mpate hekima; msiyaweke kando. 34Heri yule anayenisikia, anayekesha kwenye milango yangu kila siku na kungoja karibu na miimo ya milango yangu. 35Kwa maana anayenipata amepata uzima na kupata kibali cha BWANA. 36Lakini yeyote asiyenipata hujidhuru maisha yake mwenyewe; wote wanaonichukia wanapenda mauti.”