Mithali 25

1Hizi pia ni mithali za Sulemani, zilizokusanywa na kunakiliwa na maafisa wa Hezekia, mfalme wa Yuda. 2Mungu huheshimiwa kwa kuficha mambo, na wafalme huheshimiwa kwa kuchunguza mambo mpaka mwisho. 3Kama mbingu zilivyo juu na nchi ilivyo na kina, ndivyo akili ya mfalme isivyoweza kuchunguzwa na mtu yeyote. 4Toa uchafu katika fedha, naye mfua fedha atapata madini ya kutengenezea chombo kizuri. 5Waondoe waovu mbele ya mfalme, na kiti chake cha enzi kitaimarishwa kwa haki. 6Usijipandishe mbele ya mfalme wala usijiweke miongoni mwa wakuu, 7kwa maana ni afadhali kuambiwa, “Njoo huku juu,” kuliko kushushwa chini mbele ya mkuu uliyemwona kwa macho yako mwenyewe. 8Usiharakishe kupeleka shauri mahakamani, kwa maana utafanya nini mwishowe jirani yako akikuthibitishia kosa na kukuaibisha? 9Jadiliana na jirani yako ana kwa ana juu ya shauri lako, wala usitoe siri ya mtu mwingine, 10la sivyo, yeyote atakayesikia atakuaibisha, na sifa yako mbaya haitaondoka kamwe. 11Kama matofaa ya dhahabu yaliyowekwa katika fedha, ndivyo lilivyo neno linalosemwa wakati unaofaa kabisa. 12Karipio la mtu mwenye hekima, kwa sikio linalosikiliza, ni hereni ya dhahabu, kito cha dhahabu iliyo bora kabisa. 13Kama ubaridi wa theluji wakati wa mavuno ndivyo alivyo mjumbe mwaminifu kwa wale wanaomtuma; huiburudisha roho ya mabwana zake.

14Kama mawingu na upepo visivyoleta mvua ndivyo alivyo mtu ajisifuye kwa zawadi asizozitoa kamwe. 15Kwa uvumilivu unaweza kumshawishi mtawala, na ulimi wa upole unaweza kuvunja mfupa. 16Ukipata asali, kula tu kiasi unachohitaji, la sivyo utakula kupita kiasi na kuitapika. 17Usikanyage nyumbani kwa jirani yako mara nyingi mno, la sivyo atakuchoka na kuanza kukuchukia. 18Mtu yeyote anayetoa ushahidi wa uongo dhidi ya jirani yake ni rungu la vita, upanga, mshale ulionolewa. 19Kama jino bovu au mguu uliolemaa ndivyo lilivyo tumaini kwa msaliti wakati wa taabu. 20Kama kumvua mtu koti siku ya baridi, au kama kumimina siki juu ya magadi, ndivyo kilivyo kuimba nyimbo za furaha kwa moyo mzito.

21Adui yako akiwa na njaa, mpe chakula ale; akiwa na kiu, mpe maji anywe, 22kwa maana utakuwa unampalia makaa ya moto kichwani pake, na BWANA atakupa thawabu. 23Kama upepo wa kaskazini uletavyo mvua, ndivyo ulimi wa kusengenya uletavyo nyuso zenye hasira. 24Ni afadhali kuishi juu katika pembe ya dari kuliko kushiriki nyumba na mke mgomvi. 25Kama maji baridi kwa mtu aliyechoka na mwenye kiu ndivyo ilivyo habari njema kutoka mbali. 26Mwenye haki akilegea mbele ya mwovu, ni chemchemi iliyokanyagwa, kisima kilichochafuliwa. 27Kula asali kupita kiasi hakuna faida, na kujitafutia heshima hakuleti heshima. 28Mtu asiyeweza kujizuia ni mji uliobomolewa, ulioachwa bila kuta.