Mithali 17

1Afadhali ukoko mkavu unaoliwa kwa amani kuliko nyumba iliyojaa karamu na magomvi. 2Mtumishi mwenye akili atakuwa juu ya mwana aletaye fedheha, naye atapata sehemu ya urithi pamoja na ndugu. 3Fedha hujaribiwa kalibuni na dhahabu tanuruni, bali ni BWANA anayeujaribu moyo. 4Watenda maovu huyasikiliza maneno maovu; waongo husikiliza kwa hamu maneno ya kudhuru. 5Anayemdhihaki maskini humtukana yule aliyemuumba; anayefurahia maafa hataepuka adhabu. 6Wajukuu ni taji la wazee, na watoto hujivunia wazazi wao. 7Maneno mazuri hayamfai mshenzi; zaidi sana uongo haumfai kiongozi. 8Rushwa huonekana kama hirizi kwa yule anayeitoa; popote anapogeuka, inafanya kazi. 9Anayesamehe kosa hujenga upendo, bali anayeendelea kulirudia huwatenganisha marafiki. 10Karipio moja hufanya kazi zaidi kwa mtu mwenye ufahamu kuliko viboko mia kwa mpumbavu. 11Waovu wamenuia uasi tu, kwa hiyo mjumbe asiye na huruma atatumwa dhidi yao. 12Ni salama zaidi kukutana na dubu jike aliyenyang’anywa watoto wake kuliko kukutana na mpumbavu katikati ya upumbavu wake. 13Mtu akilipa mema kwa mabaya, mabaya hayataiacha kamwe nyumba yake. 14Kuanzisha ugomvi ni kama kubomoa bwawa; basi acha kabla vita havijalipuka. 15Kumwachilia mwenye hatia na kumhukumu asiye na hatia: BWANA huyachukia yote mawili. 16Fedha mkononi mwa mpumbavu inafaa nini kununulia hekima, ikiwa hana nia ya kujifunza? 17Rafiki huonyesha upendo katika kila majira, na ndugu huzaliwa ili asimame nawe katika taabu. 18Ni mtu asiye na akili tu anayepeana mikono kwa ahadi na kuwa mdhamini wa jirani yake. 19Anayependa ugomvi hupenda dhambi; anayejenga lango refu hujitakia maangamizi. 20Moyo uliopotoka haupati jema lolote, na ulimi wa udanganyifu huishia taabuni. 21Kumlea mpumbavu ni kuhuzunika; baba wa mshenzi hajui furaha. 22Moyo wenye furaha ni kama dawa ya kuponya, bali roho iliyovunjika humaliza nguvu za mwili. 23Waovu hupokea rushwa iliyotolewa kwa siri ili kupotosha mwenendo wa haki. 24Wenye ufahamu huiweka hekima mbele ya macho yao, bali macho ya mpumbavu huzurura mpaka miisho ya dunia. 25Mwana aliye mpumbavu ni huzuni kwa baba yake na uchungu mkali kwa mama aliyemzaa. 26Ni vibaya kumtoza faini asiye na hatia, au kuwachapa viongozi kwa sababu ya uaminifu wao. 27Anayeyazuia maneno yake ana maarifa, na mwenye roho iliyotulia ana ufahamu. 28Hata wapumbavu hudhaniwa kuwa wenye hekima wakinyamaza; wakifunga midomo yao, huonekana wenye ufahamu.