Mithali 17

¹Afadhali kula ukoko mkavu ukiwa na amani na utulivu kuliko kukaa kwenye nyumba ya karamu kukiwa na magomvi.

²Mtumishi mwenye hekima atatawala juu ya mwana aaibishaye, naye atashirikiana katika urithi kama mmoja wa hao ndugu.

³Kalibu ni kwa ajili ya fedha na tanuru ni kwa ajili ya dhahabu, bali Bwana huujaribu moyo.

⁴Mtu mwovu husikiliza midomo mibaya; mwongo husikiliza kwa makini ulimi wa madhara.

⁵Yeye anaye mdhihaki maskini huonyesha dharau kwa Muumba wake; yeyote afurahiaye maafa hataepuka kuadhibiwa.

⁶Wana wa wana ni taji la wazee, nao wazazi ni fahari ya watoto wao.

⁷Midomo yenye uwezo wa ushawishi haimfai mpumbavu: je, ni mibaya kiasi gani zaidi midomo ya uongo kwa mtawala!

⁸Kipawa ni kama kito cha thamani machoni pake yeye aliye nacho; kokote kigeukiapo, hufanikiwa.

⁹Yeye anayesamehe kosa hudumisha upendo, bali yeyote arudiaye jambo hutenganisha marafiki wa karibu.

¹⁰Karipio humwingia sana mtu mwenye kutambua kuliko mapigo mia kwa mpumbavu.

¹¹Mtu mbaya hupenda kuasi tu; mjumbe asiye na huruma atatumwa dhidi yake.

¹²Ni afadhali ukutane na dubu aliyenyangʼanywa watoto wake, kuliko mpumbavu katika upumbavu wake.

¹³Ikiwa mtu atalipa baya kwa jema, kamwe ubaya hautaondoka katika nyumba yake.

¹⁴Kuanzisha ugomvi ni kama kutoboa bwawa la maji; kwa hiyo acha jambo hilo kabla mabishano hayajaanza.

¹⁵Yeye asemaye kuwa asiye na haki ana haki, naye asemaye kuwa mwenye haki hana haki: Bwana huwachukia sana wote wawili.

¹⁶Fedha ina faida gani mikononi mwa mpumbavu, wakati yeye hana haja ya kupata hekima?

¹⁷Rafiki hupenda wakati wote naye ndugu amezaliwa kwa ajili ya wakati wa shida.

¹⁸Mtu mjinga hupana mkono ili kuweka rehani, naye huweka dhamana kwa jirani yake.

¹⁹Yeye apendaye ugomvi apenda dhambi; naye ainuaye sana lango lake hutafuta uharibifu.

²⁰Mtu mwenye moyo mpotovu hawezi kufanikiwa; naye ambaye ulimi wake ni mdanganyifu huanguka kwenye taabu.

²¹Kuwa na mwana mpumbavu huleta huzuni; hakuna furaha kwa baba wa mpumbavu.

²²Moyo wenye furaha ni dawa nzuri, bali roho iliyopondeka hukausha mifupa.

²³Mtu mwovu hukubali rushwa kwa siri ili kupotosha njia ya haki.

²⁴Mtu wa ufahamu huitazama hekima, lakini macho ya mpumbavu huhangaika hadi kwenye miisho ya dunia.

²⁵Mwana mpumbavu huleta huzuni kwa baba yake na uchungu kwa yeye aliyemzaa.

²⁶Si vizuri kumwadhibu mtu asiye na hatia, au kuwapiga sana maafisa kwa ajili ya uadilifu wao.

²⁷Mtu mwenye maarifa hutumia maneno kwa kujizuia, naye mtu mwenye ufahamu ana moyo wa utulivu.

²⁸Hata mtu mpumbavu hudhaniwa kuwa na hekima kama akinyamaza, na mwenye ufahamu kama akiuzuia ulimi wake.