Mithali 20

1Divai huwafanya watu wadharau na kileo huwafanya wafanye fujo; hakuna anayeyumbishwa navyo aliye na hekima. 2Ghadhabu ya mfalme ni kama ngurumo ya simba; anayemkasirisha huyaweka maisha yake hatarini. 3Kukaa mbali na ugomvi huleta heshima, bali kila mpumbavu yuko tayari kuuanzisha. 4Mvivu hatalima wakati wa baridi; wakati wa mavuno hutafuta mazao na kukosa kitu. 5Nia halisi za mtu ziko chini sana, kama maji kisimani, bali mwenye ufahamu anaweza kuzichota. 6Watu wengi husema juu ya uaminifu wao wenyewe, bali ni nani awezaye kumpata mtu aliye mwaminifu kweli? 7Wenye haki huishi kwa uadilifu; heri watoto wao baada yao! 8Mfalme aliyeketi katika kiti chake cha hukumu huchuja kila ubaya kwa kutazama tu. 9Ni nani awezaye kusema, “Moyo wangu ni safi; nimetakaswa dhambi yangu”? 10Mawe mawili ya kupimia, vipimo viwili tofauti: BWANA huvichukia vyote viwili. 11Hata vijana huonyesha walivyo kwa wanayoyatenda, kama mwenendo wao ni safi na wa haki. 12Sikio linalosikia na jicho linaloona: BWANA ndiye aliyevifanya vyote viwili. 13Usipende usingizi, usije ukaishia kuwa maskini; kaa macho, nawe utakuwa na chakula cha kutosha. 14“Hakifai, hakifai,” asema mnunuzi, kisha huenda zake na kujisifu kwa bei aliyopata. 15Kuna dhahabu, na johari kwa wingi, bali midomo inayosema maarifa ni hazina adimu zaidi. 16Chukua koti la yule anayemdhamini mgeni; akifanya hivyo kwa ajili ya mwanamke mgeni, lishike kama rehani. 17Mkate uliopatikana kwa hila huonekana mtamu mwanzoni, bali baadaye hujaza kinywa mchanga. 18Imarisha mipango yako kwa kutafuta shauri, na upigane vita kwa mwongozo wa hekima tu. 19Mchongezi huzunguka akitoa siri, basi usijihusishe na mtu asiyeweza kufunga kinywa chake. 20Wanaomlaani baba au mama yao taa yao itazimwa katika giza nene. 21Urithi unaonyakuliwa mapema mno hautabarikiwa mwishowe. 22Usiseme, “Nitalipiza kosa hili!” Mngoje BWANA, naye atakuokoa. 23BWANA huchukia mawe mawili tofauti ya kupimia; mizani ya kudanganya ni mbaya. 24BWANA huziongoza hatua za kila mtu, basi mtu awezaje kuelewa anakokwenda? 25Ni mtego kutangaza kitu kuwa kitakatifu bila kufikiri na kubadili nia baada tu ya kuweka nadhiri. 26Mfalme mwenye hekima huwachuja waovu kama nafaka na kuwapitishia gurudumu la kupuria. 27Roho aliyopewa mwanadamu ni taa ya BWANA, inayomulika kila sehemu iliyofichika ya mtu. 28Upendo usiokoma na uaminifu humweka mfalme salama; kwa upendo usiokoma huimarisha kiti chake cha enzi. 29Vijana hujivunia nguvu zao; wazee huvaa mvi kama heshima yao. 30Mapigo yanayojeruhi huusugua uovu, na viboko husafisha nafsi ya ndani.