Mithali 23

1Ukiketishwa mezani pa mtawala, zingatia sana kilicho mbele yako, 2na kama una hamu kubwa ya chakula, weka kisu kooni mwako. 3Usivitamani vyakula vizuri vya mtawala, kwa maana chakula hicho ni cha udanganyifu. 4Usijichoshe ili utajirike; uwe na busara ya kuacha. 5Ukiutupia utajiri jicho, umetoweka; unaota mabawa na kuruka angani kama tai.

6Usile mezani pa mwenyeji bahili, wala usivitamani vyakula vyake vizuri, 7Watu wa namna hiyo daima wanahesabu gharama. “Kula na kunywa!” wanakuambia, lakini mioyo yao haiko pamoja nawe. 8Utakitapika kidogo ulichokula, na kupoteza bure maneno yako ya adabu. 9Usizungumze na mpumbavu, kwa maana atayadharau maneno yako ya hekima. 10Usisogeze jiwe la mpaka la zamani, wala usiyavamie mashamba ya yatima, 11kwa maana Mtetezi wao ana nguvu, naye atasimamia shauri lao dhidi yako. 12Elekeza moyo wako kwenye nidhamu na masikio yako kwenye maneno ya maarifa. 13Usimzuilie mtoto nidhamu; ukimwadhibu kwa fimbo, hatakufa. 14Mwadhibu kwa fimbo wewe mwenyewe, nawe utayaokoa maisha yake na Kuzimu. 15Mwanangu, ukiwa na moyo wa hekima, basi mimi mwenyewe nitafurahi moyoni. 16Nitafurahi mpaka ndani kabisa ya utu wangu nikikusikia ukisema yaliyo sawa. 17Moyo wako usiwaonee wivu wenye dhambi; badala yake, ishi katika kumcha BWANA siku nzima. 18Hakika una wakati ujao, na tumaini lako halitakatiliwa mbali. 19Sikiliza, mwanangu, upate hekima; uunyooshe moyo wako katika njia. 20Usiandamane na walevi wa divai wala na wale wanaojishibisha nyama kupita kiasi, 21Kwa maana walevi na walafi huishia kuwa maskini, na usingizi wao huwavika matambara. 22Msikilize baba aliyekupa uhai, wala usimdharau mama yako atakapozeeka. 23Inunue kweli wala usiiuze kamwe; jipatie hekima, nidhamu na ufahamu. 24Baba wa mwana mwenye haki atajaa furaha; mtu aliye na mwana mwenye hekima atamfurahia. 25Baba yako na mama yako wafurahi; yeye aliyekuzaa ashangilie. 26Nipe moyo wako, mwanangu, na macho yako yaziangalie njia zangu. 27Kahaba ni shimo refu; mwanamke mgeni ni kisima chembamba. 28Huvizia kama mnyang’anyi na huwafanya wanaume wengi wasiwe waaminifu. 29Nani ana taabu? Nani ana dhiki? Nani hugombana kila mara? Nani hulalamika kila mara? Nani ana michubuko bila sababu? Nani ana macho mekundu? 30Ni wale wanaokesha wakinywa divai, wanaokwenda kutafuta vinywaji vilivyokolezwa viungo. 31Usiikodolee macho divai nyekundu inapometameta kikombeni na kushuka kooni kwa urahisi. 32Lakini mwishowe inauma kama nyoka na kuchoma kama fira. 33Macho yako yataona maono ya ajabu, na akili yako itasema mambo ya kuchanganyikiwa na yaliyopotoka. 34Utakuwa kama mtu aliyelala katikati ya bahari, kama mtu aliyelala juu kabisa ya mlingoti wa meli. 35“Walinipiga,” utasema, “lakini sikuumia; walinichapa, lakini sikuhisi. Nitaamka lini? Nitakwenda kutafuta kinywaji kingine.”