Mithali 2

1Mwanangu, ukiyashika ninayokuambia na kuzificha amri zangu kama hazina, 2hata sikio lako likaitegea hekima na moyo wako ukaelekea ufahamu; 3ukiililia busara kwa kweli na kupaza sauti yako kuuita ufahamu, 4ukiitafuta kama vile ungetafuta fedha, na kuiwinda kama hazina iliyozikwa, 5ndipo utakapotambua kumcha BWANA ni nini, nawe utagundua maana ya kumjua Mungu. 6Kwa maana ni BWANA atoaye hekima; maarifa na ufahamu hutoka kinywani mwake. 7Huwawekea wanyofu hekima ya kweli; huwakinga wale wanaoishi kwa ukamilifu, 8akiyaangalia mapito ya haki na kuilinda njia ya wale walio waaminifu kwake. 9Ndipo utakapoelewa haki, uadilifu na usawa, na kila njia njema ya kufuata. 10Kwa maana hekima itaingia moyoni mwako, na kujua kutakuwa furaha kwako. 11uwezo wa kuona mbele utakusimamia, na ufahamu utakuweka salama, 12ikikuokoa na njia ya uovu, na watu ambao maneno yao hupotosha ukweli, 13wanaoiacha njia ya unyofu ili kwenda katika njia za giza, 14wanaofurahia kutenda mabaya na kusherehekea njia zilizopotoka za uovu, 15watu ambao njia zao zimepinda na kujipinda, wanaopotea kila wanapogeuka. 16Itakuokoa pia na mwanamke mgeni, ambaye si halali yako, mgeni ambaye maneno yake ni laini ya kubembeleza, 17aliyemwacha mume aliyemwoa alipokuwa msichana, akalisahau agano la Mungu wake. 18Nyumba yake inateleza kushuka mautini, na mapito yake yanaishia kwa wafu. 19Hakuna hata mmoja aingiaye kwake arudiye, wala hawayafikii tena mapito ya uzima. 20Hivyo utakwenda katika njia wanayoiendea watu wema na kudumu katika mapito ya wenye haki. 21Kwa maana ni wanyofu watakaoishi katika nchi, na wale walio wakamilifu ndio watakaobaki humo, 22lakini waovu wataondolewa katika nchi, na wadanganyifu watang’olewa humo.