Mithali 3

1Mwanangu, usiache mafundisho yangu yakutoke akilini; zishike amri zangu moyoni mwako, 2kwa maana zitazirefusha siku zako, zitaiongezea miaka maisha yako, na kukuletea amani. 3Usiache kamwe upendo usiokoma na uaminifu vikuondokee: vivae kama mkufu, na uvichore moyoni mwako kama juu ya kibao, 4Hivyo utapata kibali na kuheshimiwa, na Mungu na watu pia.

5Mwamini BWANA kwa moyo wako mzima, wala usijiegemeze kwenye busara yako mwenyewe. 6Mkumbuke yeye katika kila unalofanya, naye atakutengenezea njia iliyonyooka mbele yako. 7Usijione kuwa mwenye hekima; mche BWANA na ukae mbali na uovu. 8Itakuwa dawa kwa mwili wako na nguvu mpya kwa mifupa yako. 9Mheshimu BWANA kwa vitu ulivyo navyo, kwa vya kwanza na vilivyo bora vya kila kitu kinachotoka shambani mwako; 10ndipo kutakuwa na zaidi ya kutosha kujaza ghala zako, na divai mpya itafurika kutoka mapipani mwako.

11Mwanangu, usiipuuze nidhamu ya BWANA, wala usichoke na maonyo yake, 12kwa maana BWANA humrekebisha yule ampendaye, kama baba amrekebishavyo mwana aliye furaha yake. 13Heri mtu aliyeipata hekima, yule aliyejipatia ufahamu, 14kwa maana anachokuletea kina thamani kuliko fedha, na faida yake ni bora kuliko dhahabu. 15Thamani yake inazidi marijani nyekundu; hakuna kitu unachokitamani kinachokaribia kuwa kama yeye. 16Ameshika maisha marefu katika mkono wake wa kuume, na mali na heshima katika mkono wake wa kushoto. 17Njia zake zinapendeza, na kila pito analopita huelekea amani. 18Kwa wale wanaomshika, yeye ni mti wa uzima; kila amshikaye kwa nguvu anaitwa heri.

19Ni kwa hekima BWANA aliiweka dunia juu ya misingi yake, na kwa ufahamu alizisimika mbingu mahali pake; 20kwa maarifa yake maji ya vilindi yalipasuka, na mawingu yakadondosha umande. 21Mwanangu, usiache mambo haya yaondoke mbele ya macho yako; shika hekima iliyo thabiti na uwezo wa kuona mbele, 22navyo vitakuwa uzima kwako na pambo zuri shingoni mwako. 23Ndipo njia yako itakuwa salama kuitembea, na mguu wako hautagonga kitu chochote. 24Unapokwenda kulala, hutakuwa na kitu cha kuogopa; utalala na kupata usingizi mzuri. 25Huna haja ya kuogopa hofu ya ghafla, wala dhoruba inayowapata waovu inapokuja, 26kwa maana BWANA ndiye utakayemtegemea, naye ataulinda mguu wako usinaswe mtegoni. 27Ukiwa na uwezo wa kuwatendea mema wale wanaostahili, usiyazuie. 28Usimwambie jirani yako, “Nenda, urudi baadaye; nitakupa kesho,” wakati unacho sasa hivi. 29Usipange njama za kumdhuru jirani yako, anayeishi karibu nawe na kukuamini. 30Usianzishe ugomvi bila sababu na mtu ambaye hajakukosea chochote. 31Usiwaonee wivu watu wa jeuri, wala usifuate njia zao zozote, 32kwa maana wapotovu ni chukizo kwa BWANA, bali wanyofu ni rafiki zake wa karibu. 33Nyumba ya mwovu iko chini ya laana ya BWANA, bali makao wanamoishi wenye haki hupokea baraka zake. 34Wenye dharau huwajibu kwa dharau, bali wanyenyekevu huwapa neema. 35Heshima ndiyo urithi wa wenye hekima, bali wapumbavu huinuliwa ili waaibishwe.