Mithali 11

1BWANA huchukia mizani ya udanganyifu, bali uzito wa haki humpendeza. 2Kiburi kinapofika, fedheha hufuata nyuma yake, bali wanyenyekevu wana hekima. 3Wanyofu huongozwa na uaminifu wao, bali wadanganyifu huangamizwa na hila zao wenyewe. 4Utajiri haufai kitu siku ya ghadhabu, bali haki huokoa na mauti. 5Haki ya wakamilifu huisafisha njia yao, bali waovu huangushwa na uovu wao wenyewe. 6Haki ya wanyofu huwaweka huru, bali wadanganyifu hunaswa na uchoyo wao wenyewe. 7Waovu wanapokufa, tumaini lao hufa pamoja nao, na yote waliyotarajia kutokana na nguvu zao yametoweka. 8Wenye haki huokolewa na taabu, na waovu huangukia humo badala yao. 9Kwa maneno yao wasiomcha Mungu huwaletea jirani zao maangamizi, bali wenye haki huepuka kwa sababu wanajua zaidi. 10Wenye haki wanapofanikiwa, mji wote husherehekea; waovu wanapoangamia, kuna vigelegele. 11Mji hujengwa na baraka ya wanyofu, bali maneno ya waovu huubomoa. 12Anayemdharau jirani yake hana akili, bali mtu mwenye ufahamu huuzuia ulimi wake. 13Mmbea huzunguka akitoa siri, bali mtu mwaminifu hutunza siri. 14Bila maongozi ya hekima taifa huanguka, bali kwa washauri wengi huja ushindi. 15Anayedhamini deni la mgeni ataumia vibaya, bali anayekataa kupeana mikono kwa mapatano kama hayo yuko salama. 16Mwanamke mwenye neema hupata heshima, na wanaume wakatili hupata mali tu. 17Watu wenye fadhili hujitendea mema, bali wakatili huiletea miili yao wenyewe madhara. 18Waovu hupata malipo yasiyodumu, bali anayepanda haki huvuna thawabu ya hakika. 19Haki ya kweli huelekea uzimani, bali kufuatia uovu huelekea mautini. 20BWANA huwachukia watu wenye mioyo iliyopotoka, bali watu walio wakamilifu ni furaha yake. 21Uwe na hakika na hili: waovu hawataepuka adhabu, bali watoto wa wenye haki wataachwa huru. 22Mwanamke mzuri asiye na busara ni pete ya dhahabu iliyochomekwa katika pua ya nguruwe. 23Wanachokitamani wenye haki huishia katika mema tu, bali wanachokitumainia waovu huishia katika ghadhabu. 24Mtu mmoja hutoa kwa ukarimu na kupata zaidi; mwingine huzuia kinachopaswa kutolewa na kuishia katika uhitaji. 25Mtu mkarimu atafanikiwa, na anayewaburudisha wengine ataburudishwa. 26Watu humlaani anayeficha nafaka, bali humbariki anayeiuza. 27Anayejitahidi kwa ajili ya mema hupata kibali, bali taabu humjia yeyote anayeitafuta. 28Wale wanaotumainia utajiri wataanguka, bali wenye haki watastawi kama majani mabichi. 29Anayeiletea jamaa yake taabu atarithi upepo tu, na mpumbavu ataishia kuwa mtumishi wa mwenye hekima. 30Kile wanachozaa wenye haki ni mti wa uzima, na anayewavuta watu kwake ana hekima. 31Ikiwa hata wenye haki hulipwa wanachostahili duniani, si zaidi sana waovu na wenye dhambi!