Mithali 21

1Moyo wa mfalme ni kama vijito vya maji mkononi mwa BWANA, anayeuelekeza popote apendapo. 2Watu hudhani kila njia wanayoifuata ni sahihi, bali BWANA huupima moyo. 3BWANA hupenda zaidi kuona watu wakitenda yaliyo sawa na ya haki kuliko kutoa dhabihu. 4Macho ya majivuno na moyo wa kiburi, taa inayoangaza njia ya waovu, ni dhambi. 5Mipango ya wenye bidii huleta faida tupu, bali wote wanaokimbilia mambo kwa haraka huishia katika uhitaji tu. 6Mali zilizopatikana kwa ulimi wa uongo ni ukungu unaopeperushwa, na wanaozitafuta wanatafuta kifo. 7Waovu hufagiliwa mbali na jeuri yao wenyewe, kwa kuwa hawataki kutenda yaliyo haki. 8Njia ya mwenye hatia imepinda, bali mwenendo wa aliye safi umenyooka. 9Ni afadhali kukaa juu katika pembe ya dari kuliko kuishi nyumba moja na mke mgomvi. 10Waovu wana njaa ya ubaya; majirani zao hawapati huruma yoyote kwao. 11Mwenye dharau anapoadhibiwa, wajinga hujifunza hekima; wenye hekima wanapofundishwa, hupokea maarifa. 12Mwenye Haki huitazama nyumba ya mwovu na kuwaangusha waovu hadi maangamizi. 13Anayeziba masikio yake asisikie kilio cha maskini naye pia atalia siku moja wala hatajibiwa. 14Zawadi iliyotolewa kwa siri hutuliza hasira, na rushwa iliyofichwa ndani ya vazi hutuliza ghadhabu kali. 15Haki inapotendeka, wenye haki hufurahi, bali watenda maovu hujawa na hofu. 16Anayepotea mbali na njia ya akili njema atapumzika pamoja na wafu. 17Wanaopenda anasa wataishia kuwa maskini; wanaopenda divai na mafuta mazuri hawatakuwa matajiri kamwe. 18Waovu huwa fidia kwa ajili ya wenye haki, na wadanganyifu huenda mahali pa wanyofu. 19Ni afadhali kuishi nyikani kuliko pamoja na mke mgomvi na mwenye kununa. 20Hazina ya thamani na mafuta huwekwa nyumbani mwa mwenye hekima, bali mpumbavu huvimaliza vyote kwa pupa. 21Anayefuatilia yaliyo haki na upendo usiokoma hupata uzima, kuthibitishwa kuwa mwenye haki, na heshima. 22Mtu mwenye hekima anaweza kuupanda mji unaolindwa na mashujaa na kuibomoa ngome waliyoitegemea. 23Anayechunga kinywa chake na ulimi wake hujilinda asiingie taabuni. 24Wenye kiburi na majivuno hupewa jina la wenye dharau; hutenda kwa kiburi kisicho na mipaka. 25Tamaa za mvivu zitamletea kifo, kwa sababu mikono yake inakataa kufanya kazi. 26Mchana kutwa mvivu hutamani zaidi tu, bali mwenye haki hutoa bila kuzuia. 27Dhabihu ya waovu ni chukizo, na zaidi sana inapotolewa kwa nia mbaya. 28Shahidi wa uongo ataangamia, bali anayesikiliza kwa makini atasema maneno yanayodumu. 29Waovu hujifanya wajasiri usoni, bali wanyofu huifikiria njia wanayoiendea. 30Hakuna hekima, hakuna ufahamu, hakuna mpango unaoweza kusimama dhidi ya BWANA.

31Watu humwandaa farasi kwa ajili ya siku ya vita, lakini ushindi ni wa BWANA.