Mithali 13

1Mwana mwenye hekima hupokea maonyo ya baba yake, bali mwenye dharau hatasikiliza onyo. 2Watu hufurahia mema kwa matunda ya maneno yao, bali wadanganyifu wana njaa ya jeuri. 3Wanaochunga maneno yao hulinda maisha yao, bali wanaoropoka huishia kuangamia. 4Mvivu hutamani na kutamani lakini hapati kitu, bali wenye bidii hushibishwa kikamilifu. 5Wenye haki huuchukia uongo, bali waovu huleta machukizo na fedheha. 6Haki humlinda mtu mwadilifu, bali uovu humwangusha mwenye dhambi. 7Wengine hujifanya matajiri lakini hawana kitu; wengine hujifanya maskini lakini wana mali nyingi. 8Matajiri huenda wakalazimika kulipa fidia kwa ajili ya maisha yao, bali maskini hawasikii hata tishio. 9Nuru ya wenye haki huwaka kwa mwangaza, bali waovu wana taa itakayozimwa. 10Majivuno huchochea ugomvi tu, bali wanaopokea ushauri wana hekima. 11Fedha ipatikanayo kwa urahisi hupungua upesi, bali anayeikusanya kidogo kidogo huiongeza. 12Tumaini linapoahirishwa tena na tena, moyo huugua, bali hamu iliyotimia ni mti wa uzima. 13Anayedharau mafundisho atalipa gharama, bali anayeheshimu amri atapewa thawabu. 14Mafundisho ya wenye hekima ni chemchemi ya uzima, yakiwaepusha watu na mitego ya kifo. 15Akili njema huleta upendeleo, bali njia ya wadanganyifu ni ya kukwaruza. 16Wenye akili hutenda kwa maarifa, bali wapumbavu huonyesha upumbavu wao hadharani. 17Mjumbe asiyeaminika hujikuta taabuni, bali mjumbe mwaminifu huleta uponyaji. 18Umaskini na fedheha humjia anayepuuza nidhamu, bali anayepokea maonyo huheshimiwa. 19Hamu iliyotimia ni tamu kwa nafsi, bali wapumbavu huchukia kuacha uovu. 20Kaa na wenye hekima nawe utakuwa na hekima; shirikiana na wapumbavu nawe utaumia. 21Taabu huwafukuza wenye dhambi, bali wenye haki hupewa mema kama thawabu. 22Mtu mwema huwaachia wajukuu wake urithi, bali mali ya mwenye dhambi huishia kwa mwenye haki. 23Mashamba ya maskini huenda yakatoa chakula tele, bali dhuluma huyafagilia mbali. 24Anayeizuia fimbo humchukia mwanawe, bali anayempenda huwahi kumwadibisha. 25Wenye haki wana chakula cha kutosha, bali matumbo ya waovu hukaa matupu.