Mithali 4

1Sikilizeni, enyi wana, maonyo ya baba; tegeni sikio, nanyi mtapata ufahamu. 2Ninachowapa ni mafundisho ya kweli; msiyaache mafundisho yangu. 3Nilipokuwa mvulana nyumbani kwa baba yangu, mdogo na mwororo, mtoto mpendwa wa mama yangu, 4alinifundisha akaniambia, “Yashike maneno yangu kwa moyo wako wote; zishike amri zangu nawe utaishi. 5Pata hekima, pata ufahamu; usisahau niliyosema, wala usiyaache. 6Usimwache, naye atakuangalia; mpende, naye atakulinda. 7Hekima huanzia hapa: pata hekima. Tumia vyote ulivyo navyo, ikibidi, ili upate ufahamu. 8Mpende sana, naye atakupandisha juu; mkumbatie, naye atakuletea heshima. 9Atakuvika kichwani shada zuri na kukupa taji la fahari.” 10Sikiliza, mwanangu, uyapokee ninayokuambia, nawe utakuwa na miaka mingi ya maisha. 11Nimekufundisha njia ya hekima na kukuongoza katika mapito yaliyonyooka. 12Unapotembea, hakuna kitakachozibana hatua zako; unapokimbia, hutajikwaa. 13Ishike nidhamu kwa nguvu wala usiiachilie; uilinde vizuri, kwa maana ndiyo uzima wako. 14Usikanyage njia wanayoipita waovu, wala usitembee kwa hatua katika njia ya watu wabaya. 15Kaa mbali nayo, wala usisafiri humo; geuka uiache na uendelee na safari yako. 16Kwa maana hawawezi kulala mpaka wamefanya madhara fulani; hukesha macho mpaka wamemwangusha mtu. 17Uovu ndio mkate wanaoula, na jeuri ndiyo divai wanayoinywa. 18Bali njia wanayoiendea wenye haki ni kama mwanga wa alfajiri, unaozidi kung’aa zaidi na zaidi mpaka mchana kweupe. 19Njia ya waovu ni kama giza nene; hata hawajui ni nini kinachowaangusha.

20Mwanangu, sikiliza kwa makini ninayokuambia; tega sikio lako kwa maneno yangu. 21Usiyaache yatoke mbele ya macho yako; yaweke ndani kabisa ya moyo wako. 22Kwa wale wanaoyapata ni uzima, na afya kwa mwili wao wote. 23Kuliko kitu kingine chochote unachokilinda, ulinde moyo wako, kwa sababu mwenendo wote wa maisha yako hububujika kutoka humo. 24Jiepushe na kinywa kilichopotoka; weka midomo ya uongo mbali nawe. 25Macho yako yakae juu ya kilicho mbele yako, na uelekeze macho yako katika njia iliyo mbele. 26Ifanye sawa njia ya miguu yako, na kila njia utakayoifuata itakuwa imara. 27Usipotoke kwenda upande wowote; iepushe miguu yako na uovu.