Mithali 22

1Sifa njema inafaa kuchaguliwa kuliko utajiri mwingi; kuheshimiwa ni bora kuliko fedha na dhahabu. 2Tajiri na maskini wanashiriki jambo moja: BWANA ndiye aliyewaumba wote. 3Wenye akili huona hatari ikija wakajificha, bali wajinga hujitumbukiza ndani yake wakaumia. 4Unyenyekevu na kumcha BWANA huleta thawabu yake: utajiri, heshima, na uzima. 5Miiba na mitego imetandazwa katika njia ya mpotovu; anayethamini maisha yake hukaa mbali nayo. 6Mwanzishe mtoto katika njia anayopaswa kuiendea, naye hata akiwa mzee hatatoka katika njia hiyo. 7Matajiri huwatawala maskini kwa mabavu, na anayekopa huwa mtumwa wa anayemkopesha. 8Wanaopanda udhalimu watavuna maafa, na fimbo wanayoipunga kwa hasira itashindwa. 9Watu wakarimu watabarikiwa, kwa sababu huwagawia maskini chakula chao. 10Mtoe nje mwenye dharau, na mafarakano yataondoka pia; magomvi na matusi yatakwisha. 11Anayependa moyo safi na kusema kwa neema atakuwa na mfalme kama rafiki. 12Macho ya BWANA huyalinda maarifa, bali huyabatilisha maneno ya wasio waaminifu. 13Mvivu husema, “Kuna simba huko nje! Nitauawa barabarani!” 14Maneno ya wanawake wa watu wengine ni shimo refu; yeyote ambaye BWANA amemkasirikia ataanguka humo. 15Upumbavu umefungwa kwa nguvu moyoni mwa mtoto, bali fimbo ya nidhamu itaufukuza mbali. 16Anayewadhulumu maskini ili atajirike, au anayewapa matajiri zawadi, ataishia katika uhitaji tu. 17Inamisha sikio lako usikie yale waliyosema wenye hekima, na uweke moyo wako kwenye maarifa ninayokupa, 18kwa maana ni vyema kuyaweka ndani kabisa mwako, kila moja likiwa tayari midomoni mwako. 19Ninakufundisha leo, naam, wewe, ili uweke tumaini lako kwa BWANA. 20Je, sikukuandikia methali thelathini zilizojaa shauri na maarifa, 21ili kukufundisha yaliyo sawa na ya kutegemewa, upate kuwapelekea jibu la kweli wale wanaokutuma?

22Usiwaibie maskini kwa sababu tu ni maskini, wala usiwaponde wahitaji mahakamani, 23kwa maana BWANA atasimama kuwatetea na kuwaondolea uhai wale wanaowateka nyara. 24Usifanye urafiki na mtu mwenye hasira za haraka, wala usishirikiane na watu wepesi wa ghadhabu, 25usije ukajifunza njia zao na kujitegea mtego wa maisha yako mwenyewe. 26Usiwe mmoja wa wale wanaopeana mikono kwa ahadi na kuwadhamini wengine katika mikopo yao. 27Ikiwa huwezi kulipa, kwa nini wakuchukulie hata kitanda unacholalia? 28Usilihamishe jiwe la mpaka la zamani ambalo babu zako walilisimika. 29Je, wamwona mtu aliye stadi katika kazi yake? Atawatumikia wafalme, si watu wasiojulikana.