Mithali 28

1Waovu hukimbia hata wakati hakuna anayewafukuza, lakini wenye haki husimama kwa ujasiri kama simba. 2Nchi ikiasi, huwa na mtawala mmoja baada ya mwingine, lakini mtu mwenye ufahamu na maarifa hudumisha utaratibu. 3Mwanamume maskini anayewanyonya maskini ni kama mvua kubwa isiyoacha mazao yoyote. 4Watu wanaoyaacha mafundisho ya Mungu huwasifu waovu, lakini wanaoyashika husimama dhidi yao.

5Watu waovu hawawezi kuelewa haki ni nini, lakini wanaomtafuta BWANA huielewa kikamilifu. 6Ni afadhali kuwa maskini na kuishi kwa uadilifu kuliko kuwa tajiri na mnafiki katika kila ulitendalo. 7Mwana anayeshika mafundisho huonyesha busara, lakini anayeandamana na walafi humwaibisha baba yake. 8Yeyote anayetajirika kwa kutoza riba na kujipatia faida anajiwekea tu akiba kwa ajili ya mtu atakayewakarimu maskini. 9Mtu akikataa kusikiliza mafundisho ya Mungu, hata sala yake ni chukizo. 10Yeyote anayewashawishi wanyofu waingie katika njia mbaya atatumbukia katika shimo lake mwenyewe, lakini wasio na lawama watapokea mema. 11Matajiri wanaweza kudhani wana hekima, lakini maskini mwenye ufahamu huwaona walivyo hasa. 12Wenye haki wanaposhinda, kuna sherehe kubwa, lakini waovu wanapopata mamlaka, watu hujificha. 13Yeyote anayeficha dhambi zake hatafanikiwa, lakini yeyote anayezikiri na kuziacha atapokea rehema. 14Heri mtu aliye na uchaji siku zote, lakini yeyote anayeufanya moyo wake kuwa mgumu ataanguka katika maafa. 15Kama simba anayenguruma au dubu anayeshambulia ndivyo alivyo mtawala mwovu juu ya watu wanyonge. 16Mtawala asiye na akili ni mdhalimu mkali, lakini anayechukia mapato ya udanganyifu atatawala muda mrefu.

17Mtu anayeteswa na hatia ya kumwaga damu atakuwa mkimbizi mpaka kufa; mtu yeyote asimzuie. 18Yeyote anayeishi kwa uadilifu atalindwa salama, lakini mtu yeyote mwenye hila ataanguka ghafula. 19Wanaolima mashamba yao watakuwa na chakula tele, lakini wanaofuata ndoto tupu watakuwa na umaskini tele. 20Mtu mwaminifu atabarikiwa sana, lakini anayeharakisha kutajirika hataepuka adhabu. 21Upendeleo kamwe si haki, hata hivyo wengine watakosa kwa ajili ya kipande kidogo cha mkate. 22Mtu bahili huharakisha kutajirika, bila kujua kwamba umaskini unamjia. 23Mwishowe, mtu anayemrekebisha mwenzake atathaminiwa zaidi kuliko yule anayejipendekeza. 24Yeyote anayemwibia baba yake au mama yake na kusema, “Hakuna ubaya wowote katika jambo hili,” si bora kuliko mharibifu. 25Watu wenye tamaa huchochea mafarakano, lakini yeyote anayemtumaini BWANA atafanikiwa. 26Yeyote anayeitumainia akili yake mwenyewe ni mpumbavu, lakini yeyote anayeenenda kwa hekima atalindwa salama. 27Yeyote anayewapa maskini hatakosa kitu, lakini yeyote anayegeuza macho yake mbali nao atapata laana nyingi. 28Waovu wanapopata mamlaka, watu hujificha, lakini waovu wanapoangamizwa, wenye haki hustawi.