Mithali 27

1Usijivune kuhusu kesho; hujui hata siku moja italeta nini. 2Mtu mwingine na akusifu, si kinywa chako mwenyewe; mtu wa nje, si midomo yako mwenyewe. 3Jiwe ni zito na mchanga ni mzigo, lakini kero anayoleta mpumbavu ni nzito kuliko vyote viwili. 4Ghadhabu ni katili na hasira ni kama mafuriko, lakini ni nani awezaye kustahimili wivu? 5Karipio la wazi ni bora kuliko upendo unaobaki umejificha. 6Majeraha ya rafiki yanaweza kuaminiwa, lakini mabusu ya adui huja kwa wingi. 7Aliyeshiba hudharau hata asali, lakini kwa mwenye njaa kila kitu kichungu ni kitamu. 8Kama ndege anayetangatanga mbali na kiota chake ndivyo alivyo mtu yeyote anayetangatanga mbali na nyumbani. 9Mafuta yenye harufu nzuri na ubani huufurahisha moyo; shauri la dhati la rafiki ni tamu vivyo hivyo. 10Kamwe usimwache rafiki yako wala rafiki wa baba yako; na taabu inapokuja, huhitaji kukimbilia nyumbani kwa ndugu yako. Afadhali jirani aliye karibu kuliko ndugu aliye mbali. 11Mwanangu, pata hekima uufurahishe moyo wangu, ili niwe na jibu kwa yeyote anayenidhihaki. 12Wenye busara huona taabu ikija na kujificha; wajinga huendelea mbele na kulipia. 13Chukua vazi la yeyote anayedhamini deni la mgeni; lishike kama dhamana akifanya hivyo kwa ajili ya mwanamke mgeni. 14Yeyote ambarikiaye jirani yake kwa sauti kubwa alfajiri na mapema atahesabiwa kuwa amemlaani. 15Mke mgomvi ni kama matone yasiyokoma ya paa linalovuja siku ya mvua. 16Kujaribu kumzuia ni kama kujaribu kuzuia upepo au kushika mafuta mkononi. 17Kama chuma kinavyonolewa kwa chuma, ndivyo mtu mmoja anavyomnoa mwingine. 18Wanaoutunza mtini watafurahia tini zake, na wanaomtunza bwana wao watapata heshima. 19Kama maji yanavyoonyesha sura ya uso, ndivyo moyo unavyomwonyesha mtu alivyo. 20Kuzimu na Uharibifu havijai kamwe, na macho ya wanadamu hayatosheki kamwe. 21Kalibu hupima fedha na tanuru dhahabu, nazo sifa humpima mtu. 22Hata ukiwaponda wapumbavu katika kinu kwa mchi pamoja na nafaka, hutautoa upumbavu wao ndani yao.

23Ujue jinsi kondoo wako walivyo, na uweke akili yako kwa ng’ombe wako, 24kwa maana mali haidumu milele, na taji haipitishwi katika kila kizazi. 25Majani yanapokatwa na machipukizi mapya yanapoonekana, na nyasi za vilimani zinapokusanywa, 26wana-kondoo watakupa mavazi, na mbuzi watanunua shamba. 27Kutakuwa na maziwa ya mbuzi ya kutosha kwa chakula chako na chakula cha watu wa nyumbani mwako, na kuwalisha wajakazi wako.