Mithali 30

1Maneno ya Aguri mwana wa Yake, ujumbe mzito. Mtu huyu anamtangazia Ithieli, Ithieli na Ukali: 2Hakika mimi ndiye mjinga kuliko watu wote; sina ufahamu wa kawaida wa mwanadamu. 3Sijajifunza hekima, wala sina maarifa ya Aliye Mtakatifu. 4Ni nani aliyepanda mpaka mbinguni na kushuka tena? Ni nani aliyeukamata upepo katika viganja vya mikono yake? Ni nani aliyeyafunga maji katika joho? Ni nani aliyeiweka mipaka yote ya dunia? Jina lake ni nani, na jina la mwana wake? Niambie, kama unajua! 5Kila neno asemalo Mungu limethibitika kuwa kweli; yeye ni ngao kwa wote wanaokimbilia kwake. 6Usiongeze chochote kwa maneno yake, la sivyo atakurekebisha na kukuonyesha kuwa mwongo.

7Ninakuomba wewe mambo mawili; nijalie kabla sijafa: 8Uweke mbali nami udanganyifu na uongo; usinipe umaskini wala mali, bali unilishe mkate ninaohitaji kila siku, 9nisije nikawa na vingi mno nikakukana, nikisema, “BWANA ni nani?” au nikawa na kidogo mno nikaiba, na hivyo nikaliletea aibu jina la Mungu wangu.

10Usimseme vibaya mtumishi kwa bwana wake, la sivyo mtumishi huyo atakulaani, nawe utapatikana na hatia. 11Kuna watu wanaowalaani baba zao na kamwe hawawasemi mama zao vizuri. 12Kuna watu wanaodhani ni safi, lakini uchafu wao haujaoshwa kamwe. 13Kuna watu ambao macho yao yana kiburi kingi mno, ambao mitazamo yao imejaa dharau! 14Kuna watu ambao meno yao ni panga na magego yao ni visu, ili kuwala wanyonge watoweke duniani na wahitaji watoweke katika jamii ya wanadamu.

15Ruba ana binti wawili, wote wanaitwa “Nipe!” Kuna vitu vitatu visivyoweza kujazwa kamwe; vinne visivyosema kamwe, “Inatosha!”: 16Kuzimu, tumbo lisilozaa, ardhi isiyotosheka kamwe na maji, na moto usiosema kamwe, “Inatosha!” 17Jicho linalomdharau baba na kukataa kumtii mama litadonolewa na kunguru wa bondeni na kuliwa na makinda ya tai.

18Kuna mambo matatu yanayonishangaza, manne yaliyo juu ya ufahamu wangu: 19Tai anavyopita angani, nyoka anavyoteleza juu ya mwamba, meli inavyopata njia yake katika bahari kuu, na jinsi mwanamume na msichana wanavyoungana. 20Hivi ndivyo mwanamke mzinzi anavyotenda: hula, hupangusa kinywa chake, na kusema, “Sikufanya kosa lolote.”

21Dunia hutikisika chini ya mambo matatu; kuna manne isiyoweza kuyavumilia: 22mtumishi anayekuwa mfalme, mpumbavu aliye na chakula kupita kiasi, 23mwanamke asiyependwa anayepata mume hatimaye, na mjakazi anayechukua nafasi ya bibi yake.

24Duniani kuna viumbe vinne vidogo vilivyo na hekima kuliko wenye hekima: 25chungu ni jamii isiyo na nguvu, hata hivyo huweka akiba ya chakula chao wakati wa kiangazi; 26wibari ni jamii dhaifu, hata hivyo hujenga makao yao katikati ya miamba; 27nzige hawana mfalme, hata hivyo wote huenda mbele kwa safu zilizopangwa; 28mjusi anaweza kukamatwa kwa mkono, hata hivyo anaishi katika majumba ya wafalme.

29Kuna vitu vitatu vinavyotembea kwa heshima, vinne vyenye mwendo wa fahari: 30simba, mwenye nguvu kuliko wanyama wote, asiyerudi nyuma kwa chochote; 31jogoo anayetamba, beberu, na mfalme akiongoza majeshi yake. 32Ikiwa umefanya upumbavu kwa kujitanguliza, au ikiwa umekuwa ukipanga hila, weka mkono wako juu ya kinywa chako! 33Kwa maana kama kusukasuka maziwa kunavyotoa siagi, na kubana pua kunavyotoa damu, ndivyo kuchochea hasira kunavyoleta ugomvi.