Mithali 29

1Yeyote anayeonywa tena na tena lakini akaendelea kuwa mkaidi atavunjika mara moja, bila dawa yoyote. 2Wenye haki wanapoongezeka, watu hufurahi; waovu wanapotawala, watu huugua. 3Mwanamume anayependa hekima humletea baba yake furaha, lakini anayeshinda na makahaba hufuja mali yake. 4Kwa haki mfalme huipa nchi uthabiti, lakini anayetamani kodi kubwa huiletea maangamizi. 5Yeyote anayembembeleza jirani yake anatega wavu kwa miguu ya jirani huyo. 6Mtu mwovu hunaswa na makosa yake mwenyewe, lakini wenye haki huimba na kushangilia. 7Wenye haki hujali haki ya maskini, lakini waovu hawajali jambo hilo. 8Wenye dharau huutia mji katika ghasia, lakini wenye hekima hutuliza hasira yake. 9Mtu mwenye hekima anapompeleka mpumbavu mahakamani, mpumbavu hukasirika au kucheka, wala hakuna amani. 10Watu wenye kiu ya damu huwachukia wasio na lawama, lakini wanyofu hujali maisha yao. 11Wapumbavu humwaga hasira yao yote, lakini wenye hekima huizuia kwa utulivu. 12Mtawala akisikiliza uongo, maafisa wake wote watakuwa waovu. 13Maskini na wale wanaowaonea hukutana mahali pamoja: BWANA huwapa wote wawili nuru ya macho yao. 14Mfalme anapowahukumu maskini kwa haki, kiti chake cha enzi kitasimama imara daima. 15Nidhamu na maonyo huleta hekima, lakini mtoto anayeachwa afanye apendavyo humwaibisha mama yake. 16Waovu wanapozidi kuwa wengi, dhambi nayo huzidi, lakini wenye haki watawaona wakianguka. 17Mrudi mwanao, naye atakupa amani ya moyo; atauletea moyo wako furaha.

18Pasipo ufunuo wa kinabii, watu hutupilia mbali kila kizuizi; lakini heri wale wanaoshika mafundisho ya Mungu! 19Mtumishi hawezi kurekebishwa kwa maneno peke yake; hata akielewa, hataitikia. 20Je, unamwona mtu anayesema bila kufikiri? Mpumbavu ana tumaini zaidi kuliko mtu huyo. 21Ukimdekeza mtumishi tangu utotoni, mwishowe utapata taabu. 22Mtu mwenye hasira huchochea mafarakano, na mwenye hamaki hutenda dhambi nyingi. 23Kiburi humwangusha mtu chini, lakini wanyenyekevu wa roho hupata heshima. 24Yeyote anayeshirikiana na mwizi ni adui yake mwenyewe; husikia laana inayotamkwa juu ya mashahidi asiseme neno. 25Kuogopa yale ambayo watu wanaweza kufanya ni mtego, lakini yeyote anayemtumaini BWANA hulindwa salama. 26Wengi hutafuta kuonana na mtawala, lakini ni kwa BWANA watu hupata haki. 27Wenye haki huwachukia wadhalimu, na waovu huwachukia wale ambao njia yao ni nyoofu.