Mithali 7

1Mwanangu, shika ninayokuambia, na uzihifadhi amri zangu salama kama hazina. 2Shika amri zangu nawe utaishi; yalinde mafundisho yangu kwa uangalifu kama mboni ya jicho lako. 3Zifunge kuzunguka vidole vyako; uzichore moyoni mwako kama juu ya kibao. 4Iambie hekima, “Wewe ni dada yangu,” na ufahamu uupe jina la rafiki mpendwa, 5ili zikulinde na mwanamke mgeni, asiye halali yako, yule mgeni mwenye maneno ya kubembeleza. 6Siku moja, kutoka dirishani mwa nyumba yangu, nilichungulia chini kupitia kimia, 7nikaona miongoni mwa wajinga, nikamtambua miongoni mwa vijana, kijana mmoja asiye na akili, 8akitembea barabarani karibu na pembe ya mtaa wake, akipiga hatua katika njia iendayo nyumbani kwake, 9wakati wa magharibi, mchana ulipogeuka kuwa jioni, giza nene la usiku lilipoingia. 10Ndipo mwanamke akatoka kumlaki, amevaa kama kahaba, na moyo wake umejaa hila. 11Yeye ni mwenye kelele na asiyetawalika; miguu yake haikai nyumbani kamwe. 12Mara yuko nje barabarani, mara katika viwanja, akivizia katika kila pembe. 13Akamkamata na kumbusu, na kwa uso usio na haya akamwambia, 14“Nilikuwa na sadaka za amani za kutoa, na leo nimetimiza nadhiri zangu. 15Ndiyo sababu nimetoka kukutafuta; nilitamani sana kukuona, na tazama, uko hapa! 16Nimetandika kitanda changu kwa matandiko, kwa shuka za rangi za kitani ya Misri. 17Nimekitia kitanda changu harufu ya manemane, udi na mdalasini. 18Njoo, tunywe mapenzi kwa wingi mpaka asubuhi, tujifurahishe kwa mahaba. 19Mwenye nyumba hayupo; amekwenda safari ndefu. 20Alichukua mfuko wa fedha pamoja naye, wala hatarudi nyumbani mpaka mwezi mpevu.” 21Kwa ustadi wake wote wa kushawishi anamshinda; kwa maneno yake laini anamsukuma aendelee. 22Ghafla anamfuata, kama ng’ombe anayepelekwa kuchinjwa, kama mpumbavu aliyefungwa pingu akipelekwa kuadhibiwa, 23mpaka mshale upasue ini lake; kama ndege anayekimbilia mtegoni, hajui hata kidogo kwamba utamgharimu uhai wake.

24Basi sasa, wana, nisikilizeni; sikilizeni kwa makini ninayosema. 25Usiache moyo wako uelekee njia zake, wala usipotee ukaingia katika mapito yake, 26kwa maana amewaangusha watu wengi, na wale aliowaua hawahesabiki. 27Nyumba yake ni barabara kuu iendayo Kuzimu, inayoshuka hadi vyumba vya mauti.