Mithali 31

1Maneno ya Mfalme Lemueli, ujumbe mzito ambao mama yake alimfundisha: 2“Nikuambie nini, mwanangu? Nini, ewe mtoto wa tumbo langu? Nini, ewe mwana niliyemwekea nadhiri? 3Usimwagie wanawake nguvu zako, wala maisha yako kwa yale yanayowaangamiza wafalme. 4Si kwa wafalme, Lemueli, si kwa wafalme kunywa divai, wala kwa watawala kutamani kileo, 5la sivyo watakunywa, wakasahau sheria, na kupotosha haki ya kila mtu anayeteseka. 6Mpeni kileo mtu anayekufa, na divai wale ambao mioyo yao ina uchungu. 7Na wanywe wausahau umaskini wao wala wasiikumbuke tena dhiki yao. 8Fungua kinywa chako kwa ajili ya wale wasio na sauti, kwa ajili ya shauri la wote walioachwa waangamie. 9Sema waziwazi na uhukumu kwa haki; chukua shauri la maskini na la mhitaji.”

10Mke hodari, ni nani awezaye kumpata? Thamani yake ni kubwa sana kuliko marijani. 11Mume wake humwamini kabisa; hakosi kamwe mapato. 12Ni mwema kwake, kamwe hamdhuru, muda wote anaoishi. 13Hutafuta sufu na kitani na hufanya kazi kwa mikono yake kwa moyo mkunjufu. 14Yeye ni kama meli za mfanyabiashara, akileta chakula chake kutoka mbali. 15Huamka kungali giza ili kuwaandalia watu wa nyumbani mwake chakula na wajakazi wake sehemu yao. 16Hulikagua shamba na kulinunua; kwa mapato yake hupanda shamba la mizabibu. 17Hujifunga nguvu kama mshipi, na mikono yake ni imara kwa kazi. 18Huona kwamba biashara yake inaleta faida nzuri; taa yake huendelea kuwaka usiku. 19Hunyoosha mikono yake kwenye kisokotea, na vidole vyake hushika kibia. 20Mkono wake uko wazi kwa maskini; hunyoosha mkono kumsaidia mhitaji. 21Theluji haimtii hofu anapowafikiria watu wa nyumbani mwake, kwa maana kila mmoja wao amevaa nguo nyekundu. 22Hujitengenezea matandiko ya kitanda; mavazi yake ni kitani safi na zambarau. 23Mume wake huheshimiwa katika malango ya mji, anapoketi pamoja na wazee wa nchi. 24Hushona mavazi ya kitani na kuyauza; huwapa wafanyabiashara mikanda. 25Nguvu na fahari ni vazi lake, naye huucheka wakati ujao. 26Maneno yake ni ya hekima, na mafundisho anayotoa yamejaa upendo usiokoma. 27Huchunga kwa makini yote yanayoendelea nyumbani mwake; kamwe hali chakula asichokifanyia kazi. 28Watoto wake huinuka na kumtaja kuwa mbarikiwa; mume wake pia humpa sifa: 29“Wanawake wengi wameonyesha uhodari na thamani, lakini wewe unawazidi wote.” 30Haiba inaweza kudanganya na uzuri hupita kama pumzi, lakini mwanamke amchaye BWANA ndiye anayestahili kusifiwa. 31Mpeni sehemu ya kile mikono yake imezalisha, na matendo yake yamletee sifa katika malango ya mji.