Mathayo 28

1Sabato ilipokwisha, siku ya kwanza ya juma ilipoanza kupambazuka, Mariamu Magdalene na yule Mariamu mwingine walikwenda kuliangalia kaburi. 2Ghafla ardhi ilitetemeka kwa nguvu, kwa sababu malaika wa Bwana alikuwa ameshuka kutoka mbinguni. Alilikaribia jiwe, akalivingirisha kando, akaketi juu yake. 3Alionekana kama mmweko wa umeme, na mavazi yake yalikuwa meupe pe kama theluji. 4Walinzi walimwogopa kiasi kwamba walitetemeka, wakawa kama watu waliokufa. 5Lakini malaika aliwaambia wale wanawake, “Ninyi hamna sababu ya kuogopa. Ninajua kwamba mnamtafuta Yesu, yule aliyesulubiwa. 6Hayuko hapa. Amefufuliwa, kama alivyokuwa ametabiri. Njooni mpaone mahali alipokuwa amelala. 7Nendeni haraka mkawape wanafunzi wake ujumbe huu: ‘Amefufuliwa kutoka kwa wafu! Yuko njiani kwenda Galilaya mbele yenu, na huko ndiko mtakakomwona.’ Huo ndio ujumbe wangu kwenu.” 8Wanawake waliondoka kaburini haraka. Wakiwa wamejawa na hofu na furaha kubwa, walikimbia kwenda kuwaeleza wanafunzi wake. 9Ghafla Yesu alisimama njiani mbele yao. Akawaambia, “Salamu!” Wakamwendea, wakashika miguu yake, wakainama mbele yake kumwabudu. 10Ndipo Yesu aliwaambia, “Msiwe na hofu. Nendeni mkawape ndugu zangu habari hii: waondoke kwenda Galilaya, na huko wataniona.”

11Wanawake walipokuwa bado njiani, baadhi ya askari wa kikosi cha ulinzi walifika mjini, wakawapa wakuu wa makuhani taarifa kamili ya yote yaliyotukia. 12Baada ya kukutana na wazee na kuamua la kufanya, wakuu wa makuhani waliwalipa askari kiasi kikubwa cha fedha 13na kuwapa habari ya kusema: “Waambieni watu, ‘Wanafunzi wake walikuja usiku tulipokuwa tumelala, wakamchukua kwa kuiba.’ 14Mkuu wa mkoa akisikia habari hizi, sisi tutamshawishi, na tutahakikisha kwamba hamtapata taabu yoyote.” 15Askari walichukua fedha, wakafuata maagizo waliyopewa. Na hii ndiyo habari ambayo imeenea miongoni mwa Wayahudi mpaka leo.

16Wanafunzi kumi na mmoja walikwenda Galilaya, kwenye mlima ambao Yesu alikuwa amewaonyesha. 17Walipomwona huko, waliinama kumwabudu, lakini baadhi yao walikuwa na mashaka. 18Yesu aliwakaribia, akasema, “Mamlaka yote mbinguni na duniani yamewekwa mikononi mwangu. 19Basi nendeni, mkawafanye watu wa mataifa yote kuwa wanafunzi: wabatizeni katika jina la Baba na la Mwana na la Roho Mtakatifu, 20na kuwafundisha kushika kila kitu nilichowaamuru. Na kumbukeni hili: mimi mwenyewe niko pamoja nanyi kila siku, mpaka mwisho wa enzi.”