Mathayo 2

1Yesu alipokuwa amezaliwa katika Bethlehemu ya Uyahudi, wakati wa utawala wa Mfalme Herode, mamajusi kutoka mashariki walifika Yerusalemu 2wakiwa na swali: “Yuko wapi mfalme wa Wayahudi aliyezaliwa karibuni? Tuliiona nyota yake ilipochomoza, nasi tumekuja kumwabudu.” 3Mfalme Herode aliposikia habari hii, alishtuka, na vivyo hivyo Yerusalemu yote. 4Akawaita pamoja wakuu wote wa makuhani na waandishi wa watu, akawauliza ni wapi Kristo angezaliwa. 5“Katika Bethlehemu ya Uyahudi,” wakamjibu, “kwa sababu haya ndiyo aliyoandika nabii: 6‘Nawe, Bethlehemu, katika nchi ya Yuda, hakika wewe si duni kati ya miji inayoongoza ya Yuda, kwa maana kutoka kwako atakuja kiongozi atakayekuwa mchungaji wa watu wangu Israeli.’”

7Basi Herode aliwaita mamajusi kwa siri, akawahoji ili ajue wakati halisi nyota ilipoonekana. 8Akawatuma Bethlehemu akisema, “Nendeni mkapate habari zote mnazoweza kuhusu mtoto huyo. Mkishampata, mniletee habari, ili nami nije nimwabudu.” 9Walimsikiliza mfalme, wakaondoka. Na kumbe, nyota ile waliyoiona ikichomoza iliwatangulia, mpaka ikafika ikasimama juu ya mahali mtoto alipokuwa. 10Kuiona nyota hiyo kuliwajaza furaha kubwa sana. 11Walipoingia ndani ya nyumba, walimkuta mtoto pamoja na Mariamu mama yake. Wakainama mpaka chini wakamwabudu, kisha wakafungua masanduku yao ya hazina, wakampa zawadi: dhahabu, ubani na manemane. 12Kwa kuwa walikuwa wameonywa katika ndoto wasirudi kwa Herode, walirudi nchini kwao kwa barabara tofauti.

13Mamajusi walipokwisha kuondoka, malaika wa Bwana alimtokea Yusufu katika ndoto, akamwambia, “Amka, ukimbilie Misri pamoja na mtoto na mama yake. Kaa huko mpaka nitakapokupa habari, kwa sababu Herode anakusudia kumsaka mtoto huyo ili amwue.” 14Yusufu aliamka, akawachukua mtoto na mama yake wakati bado ni usiku, akaondoka kwenda Misri. 15Akakaa huko mpaka Herode alipokufa, ili neno ambalo Bwana alilisema kupitia nabii litimie: “Nilimwita mwana wangu kutoka Misri.”

16Herode alipoona kwamba mamajusi wamemchezea, alikasirika sana. Akatuma askari, akawaua wavulana wote wenye umri wa miaka miwili na chini yake huko Bethlehemu na eneo lote la kandokando, kulingana na wakati aliokuwa amegundua kutoka kwa mamajusi. 17Hapo likatimia lile neno lililosemwa kupitia nabii Yeremia: 18“Kelele ilisikika huko Rama, kilio na vilio vikuu: ni Raheli anayewalilia watoto wake, akikataa faraja yoyote, kwa maana wametoweka.”

19Herode alipokwisha kufa, malaika wa Bwana alimtokea Yusufu katika ndoto huko Misri 20akamwambia, “Amka, uwachukue mtoto na mama yake, urudi katika nchi ya Israeli, kwa sababu wale waliotaka mtoto afe wamekufa.” 21Yusufu aliamka, akawachukua mtoto na mama yake, akaenda katika nchi ya Israeli. 22Lakini aliposikia kwamba Arkelao amerithi utawala wa Uyahudi kutoka kwa baba yake Herode, aliogopa kwenda huko. Baada ya kuonywa katika ndoto, alikwenda badala yake katika eneo la Galilaya, 23akaishi katika mji unaoitwa Nazareti. Hili lilitokea ili yale waliyosema manabii yatimie, kwamba yeye angeitwa Mnazareti.