Mathayo 22

1Yesu aliwajibu tena kwa kusema nao kwa mifano: 2“Yanayotokea katika ufalme wa mbinguni yanaweza kulinganishwa na hili: mfalme mmoja aliandaa karamu ya arusi ya mwana wake. 3Aliwatuma watumishi wake kuwaita wageni waliokuwa wamekwisha kualikwa, lakini walikataa kuja. 4Akatuma tena watumishi wengine na ujumbe huu: ‘Waambieni walioalikwa, “Tazameni, karamu yangu iko tayari. Mafahali wangu na ndama wangu walionona wamechinjwa. Kila kitu kiko tayari, basi njooni arusini.”’ 5Wageni hao hawakulijali jambo hilo. Waliondoka, mmoja akaenda kwenye shamba lake, mwingine kwenye shughuli zake za biashara. 6Waliobaki waliwakamata watumishi wa mfalme, wakawadhalilisha, kisha wakawaua. 7Mfalme alikasirika mno. Akatuma vikosi vyake vya askari, akawaangamiza wauaji hao, akauteketeza mji wao kwa moto. 8Kisha aliwaambia watumishi wake, ‘Arusi iko tayari, lakini wale niliowaalika hawakustahili kuja. 9Basi nendeni mahali njia zinapotoka mjini, mkamwalike arusini kila mtu mtakayemkuta.’ 10Watumishi hao walitoka, wakaenda barabarani, wakawakusanya wote waliowakuta, wabaya na wema pia. Basi karamu ya arusi ikajaa watu walioketi kula. 11Mfalme alipoingia kuwaangalia wageni wake, alimwona mtu mmoja kati yao ambaye hakuwa amevaa mavazi ya arusi. 12Akamwuliza, ‘Rafiki, imekuwaje ukaingia humu bila kuvaa nguo za arusi?’ Yule mtu hakuwa na la kusema. 13Kisha mfalme akawaamuru wahudumu wake, ‘Mfungeni miguu na mikono, mkamtupe nje gizani, ambako watu watalia na kusaga meno.’ 14Kwa maana walioalikwa ni wengi, lakini waliochaguliwa ni wachache.”

15Kisha Mafarisayo waliondoka, wakapanga njama jinsi ya kumkamata Yesu kwa maneno yake mwenyewe. 16Waliwatuma wanafunzi wao kwake pamoja na wafuasi wa Herode. Wakamwambia, “Mwalimu, tunajua kwamba wewe ni mtu wa kweli, na kwamba unafundisha njia ya Mungu kulingana na kweli. Maoni ya mtu yeyote hayakuyumbishi, kwa sababu huwapimi watu kwa vyeo vyao. 17Basi tupe maoni yako. Je, sheria inaruhusu kulipa kodi ya kichwa kwa Kaisari, au hairuhusu?” 18Yesu aliutambua ubaya wa nia yao, akasema, “Ninyi wanafiki, kwa nini mnanijaribu namna hii? 19Nionyesheni sarafu inayotumika kulipa kodi hiyo.” Wakamletea sarafu ya fedha yenye thamani ya mshahara wa siku moja. 20Kisha akawauliza, “Sura hii ni ya nani? Na maandishi haya ya cheo ni ya nani?” 21“Ya Kaisari,” wakajibu. Naye akawaambia, “Basi, kile mnachodaiwa na Kaisari mlipeni Kaisari, na kile mnachodaiwa na Mungu mlipeni Mungu.” 22Jibu lake liliwashangaza, nao wakamwacha, wakaondoka.

23Siku hiyo hiyo baadhi ya Masadukayo, wanaosema kwamba hakuna ufufuo, walimjia na swali. 24Wakasema, “Mwalimu, Musa alitoa agizo hili: ‘Mtu akifariki bila kuacha watoto, ndugu yake anapaswa kumwoa mjane huyo ili ampatie ndugu yake aliyekufa wazao.’ 25Katika jamii yetu palikuwa na ndugu saba. Wa kwanza alioa kisha akafariki. Kwa kuwa hakuwa na watoto, mjane wake akawa mke wa ndugu yake. 26Jambo hilo hilo lilimtokea ndugu wa pili, na wa tatu, na hivyo hivyo mpaka wote saba. 27Hatimaye, baada ya wote, yule mwanamke naye akafariki. 28Basi wafu watakapofufuliwa, ni yupi kati ya wale saba atakayekuwa naye kama mke wake? Wote walikuwa wamemwoa.”

29Yesu akawajibu, “Mmepotoka, kwa sababu hamyaelewi Maandiko wala uwezo wa Mungu. 30Kwa maana wafu wakishafufuliwa, wanaume hawaoi tena, wala wanawake hawaozwi tena; wao ni kama malaika wa Mungu mbinguni. 31Na kuhusu wafu kufufuliwa, je, hamjasoma yale ambayo Mungu aliwaambia: 32‘Mimi ndimi Mungu wa Ibrahimu, Mungu wa Isaka, na Mungu wa Yakobo’? Yeye si Mungu wa wafu, bali ni Mungu wa wanaoishi.” 33Mafundisho yake yaliwashangaza sana watu wengi waliomsikia.

34Mafarisayo waliposikia kwamba Yesu amewanyamazisha Masadukayo, walikutanika mahali pamoja. 35Mmoja wao, mtaalamu wa sheria, alimwuliza swali ili kumjaribu: 36“Mwalimu, katika sheria ni amri gani inayotangulia zote?” 37Yesu akamjibu, “’Mpende Bwana Mungu wako kwa moyo wako mzima, kwa nafsi yako nzima, na kwa akili yako nzima.’ 38Amri hii ndiyo kuu, ya kwanza kuliko zote.

39Amri ya pili ni ya aina hiyo hiyo: ‘Mpende jirani yako kama unavyojipenda mwenyewe.’ 40Sheria yote, na manabii pia, imesimama juu ya amri hizi mbili.”

41Mafarisayo walipokuwa bado wamekusanyika hapo, Yesu aliwauliza swali: 42“Maoni yenu ni yapi kuhusu Kristo? Ni mwana wa nani?” “Wa Daudi,” wakajibu. 43Akawauliza, “Basi kwa nini Daudi, akiongozwa na Roho, anamwita ‘Bwana’? Kwa maana Daudi anasema, 44‘Bwana alimwambia Bwana wangu, “Kaa kitini upande wa kulia wangu hadi nitakapowaweka adui zako chini ya miguu yako.”’ 45Basi, kama Daudi anamwita ‘Bwana,’ yeye anawezaje kuwa mwana wa Daudi?” 46Hakuna hata mmoja wao aliyeweza kumpa jibu lolote. Na tangu siku hiyo hakuna mtu aliyekuwa na ujasiri wa kumwuliza swali jingine.