Mathayo 7

1Acheni kuwahukumu wengine, ili ninyi msihukumiwe. 2Jinsi mnavyowahukumu wengine ndivyo mtakavyohukumiwa, na kipimo mnachotumia kwa wengine ndicho kitakachotumiwa kwenu. 3Kwa nini unakikodolea macho kibanzi katika jicho la ndugu yako, na hulitambui kamwe gogo lililo katika jicho lako mwenyewe? 4Unawezaje kumwambia ndugu yako, ‘Acha nikutoe kibanzi hicho jichoni,’ wakati wote huo kuna gogo katika jicho lako mwenyewe? 5Wewe mnafiki! Kwanza ondoa gogo katika jicho lako mwenyewe. Ndipo utaona vizuri vya kutosha kukitoa kibanzi katika jicho la ndugu yako.

6Msiwape mbwa vitu vitakatifu, wala msiwarushie nguruwe lulu zenu. Huenda wakazikanyaga, kisha wakawageukia na kuwararua.

7Endeleeni kuomba, nanyi mtapokea. Endeleeni kutafuta, nanyi mtapata. Endeleeni kubisha hodi, nanyi mtafunguliwa mlango. 8Kwa maana kila anayeomba hupokea, yeyote anayetafuta hupata, na anayebisha hodi hufunguliwa mlango. 9Je, yupo mmoja wenu ambaye angempa mtoto wake jiwe alipomwomba mkate? 10Au angempa nyoka alipomwomba samaki? 11Basi ikiwa ninyi, pamoja na kuwa wenye dhambi, mnajua kuwapa watoto wenu zawadi nzuri, Baba yenu aliye mbinguni atawapa mambo mema zaidi sana wale wanaomwomba!

12Kwa hiyo, katika kila jambo, wafanyieni wengine kama mnavyotaka wao wawafanyie ninyi, kwa maana hilo ndilo kiini cha sheria na manabii.

13Ingieni kupitia lango jembamba. Lango linaloelekea kwenye maangamizi ni pana, na njia yake ni rahisi, na wengi hupita hapo. 14Lakini lango linaloelekea kwenye uzima ni jembamba, na njia yake ni ngumu, na ni wachache tu wanaoipata.

15Kaeni macho na manabii wa uongo. Wanakuja kwenu wakionekana kama kondoo, lakini ndani yao ni mbwa mwitu wenye njaa. 16Mtawajua kwa yale ambayo maisha yao huzaa. Je, watu huchuma zabibu kwenye vichaka vya miiba, au tini kwenye mibaruti? 17Vivyo hivyo, kila mti wenye afya huzaa matunda mazuri, na mti wenye ugonjwa huzaa matunda mabaya. 18Mti wenye afya hauwezi kuzaa matunda mabaya, na mti wenye ugonjwa hauwezi kuzaa matunda mazuri. 19Mti wowote usiozaa matunda mazuri hukatwa, ukatupwa motoni. 20Kwa hiyo mtawajua kwa yale ambayo maisha yao huzaa.

21Si kila mtu anayeniita ‘Bwana, Bwana’ ataingia katika ufalme wa mbinguni, ila wale tu wanaofanya yale ambayo Baba yangu wa mbinguni anataka. 22Siku hiyo wengi wataniambia, ‘Bwana, Bwana, je, hatukutoa unabii kwa jina lako, tukafukuza pepo kwa jina lako, na kufanya miujiza mingi kwa jina lako?’ 23Ndipo nitawaambia wazi, ‘Sikuwahi kuwajua ninyi. Ondokeni mbele yangu, ninyi mnaovunja sheria ya Mungu.’

24Kwa hiyo, kila anayesikiliza maneno niliyosema hapa na kuyatekeleza atakuwa kama mtu mwenye busara aliyejenga nyumba yake juu ya mwamba imara. 25Mvua ilinyesha kwa nguvu, mafuriko yakaja, na upepo ukavuma na kuipiga nyumba ile. Lakini haikuanguka, kwa sababu msingi wake ulikuwa juu ya mwamba. 26Na kila anayesikiliza maneno niliyosema hapa na asiyeyatekeleza atakuwa kama mtu mjinga aliyejenga nyumba yake juu ya mchanga. 27Mvua ilinyesha kwa nguvu, mafuriko yakaja, na upepo ukavuma na kuipiga nyumba ile kwa nguvu, nayo ikaanguka. Na anguko lake lilikuwa kubwa mno!”

28Yesu alipomaliza kusema maneno haya, umati wa watu ulishangazwa na mafundisho yake. 29Aliwafundisha kama mtu mwenye mamlaka yake mwenyewe, si kama waandishi wao.