Mathayo 9

1Basi Yesu alipanda tena mashua, akavuka ziwa, akafika katika mji alimokuwa akiishi.

2Watu fulani walimletea mtu aliyepooza, akiwa amelala juu ya machela. Yesu alipoona imani yao, alimwambia yule mtu, “Jipe moyo, mwanangu. Dhambi zako zimesamehewa.” 3Ndipo baadhi ya waandishi walisema mioyoni mwao, “Mtu huyu anamtukana Mungu!” 4Yesu alijua walichokuwa wakiwaza, akasema, “Mbona mnawaza mambo mabaya namna hii mioyoni mwenu? 5Ni lipi lililo rahisi zaidi: kusema, ‘Dhambi zako zimesamehewa,’ au kusema, ‘Simama utembee’? 6Lakini nataka mjue kwamba Mwana wa Adamu ana mamlaka duniani ya kusamehe dhambi.” Kisha alimwambia yule aliyepooza, “Simama, beba machela yako, uende nyumbani.” 7Basi yule mtu aliinuka, akaenda nyumbani kwake. 8Umati wa watu ulipoona hayo, ulijawa na hofu na heshima, ukamtukuza Mungu kwa kuwapa wanadamu mamlaka kama hayo.

9Yesu alipokuwa akiondoka hapo, alimwona mtu mmoja jina lake Mathayo, ameketi mahali pake pa kazi katika ofisi ya ushuru. Yesu akamwambia, “Nifuate.” Mathayo akasimama, akamfuata.

10Baadaye Yesu alipokuwa ameketi mezani nyumbani, watoza ushuru wengi na wenye dhambi walikuja, wakajumuika naye pamoja na wanafunzi wake katika chakula. 11Mafarisayo walipoona hivyo, waliwauliza wanafunzi wake, “Kwa nini mwalimu wenu hula na watoza ushuru na wenye dhambi?” 12Yesu aliwasikia, akasema, “Watu walio wazima hawahitaji daktari; wagonjwa ndio wanaomhitaji. 13Nendeni mkajifunze maana ya maneno haya: ‘Ninataka rehema, si dhabihu.’ Kwa maana sikuja kuwaita watu wenye haki, bali wenye dhambi.”

14Kisha wanafunzi wa Yohana walimjia, wakamwuliza, “Sisi tunafunga mara kwa mara, na Mafarisayo pia. Kwa nini wanafunzi wako hawafungi?” 15Yesu aliwajibu, “Je, wageni wa harusi wanaweza kukaa katika maombolezo wakati bwana harusi yuko kati yao? Lakini wakati unakuja ambapo bwana harusi atachukuliwa kutoka kwao, na ndipo watafunga. 16Hakuna mtu anayeshona kiraka cha kitambaa kipya, ambacho hakijasinyaa, juu ya vazi kuukuu. Kiraka hicho kitajivuta kutoka kwenye vazi, na tundu litakuwa kubwa zaidi. 17Tena watu hawamimini divai mpya ndani ya viriba vya zamani. Wakifanya hivyo, viriba vitapasuka, divai itamwagika, na viriba vitaharibika. Hapana, divai mpya humiminwa ndani ya viriba vipya, na hivyo vyote viwili hubaki salama.”

18Yesu alipokuwa bado anazungumza, kiongozi mmoja alifika, akapiga magoti mbele yake. Akasema, “Binti yangu amefariki hivi punde. Lakini njoo umwekee mkono wako, naye ataishi.” 19Yesu aliinuka, akaenda pamoja naye, na wanafunzi wake pia.

20Kisha mwanamke mmoja alimjia kwa nyuma. Kwa miaka kumi na miwili alikuwa ameugua ugonjwa wa kutokwa damu. Akagusa kishada cha joho lake. 21Alifikiri, “Hata nikigusa joho lake tu, nitapona.” 22Yesu aligeuka, na alipomwona, akasema, “Uwe hodari, binti yangu! Imani yako imekufanya mzima.” Na tangu wakati huo mwanamke yule akawa mzima. 23Yesu alipofika nyumbani kwa yule kiongozi, aliwaona wapiga filimbi na kundi la watu likipiga kelele. 24Akasema, “Tokeni nje. Msichana hajafa; amelala tu.” Lakini wakamcheka. 25Watu walipokwisha kutolewa nje, aliingia ndani, akamshika msichana mkono, naye akaamka. 26Habari za tukio hili zilienea katika eneo lote.

27Yesu alipoondoka mahali pale, vipofu wawili walimfuata. Walikuwa wakipiga kelele, “Mwana wa Daudi, tuonee huruma!” 28Alipoingia nyumbani, wale vipofu walimjia, naye Yesu akawauliza, “Je, mnaamini kwamba nina uwezo wa kufanya jambo hili?” “Ndiyo, Bwana,” wakajibu. 29Kisha akayagusa macho yao, akasema, “Kwa sababu ya imani yenu, na iwe hivyo kwenu.” 30Nao wakapata kuona tena. Yesu aliwaonya kwa ukali, “Hakikisheni kwamba hakuna mtu anayesikia habari hii.” 31Lakini walitoka, wakasambaza habari zake kila mahali katika eneo lile.

32Walipokuwa wakiondoka, watu walimletea mtu mmoja ambaye hakuweza kusema kwa sababu alikuwa ametawaliwa na pepo. 33Pepo alipofukuzwa, mtu yule aliyekuwa bubu alianza kusema. Watu wakashangaa sana, wakasema, “Israeli haijawahi kuona jambo kama hili!” 34Lakini Mafarisayo waliendelea kusema, “Anawafukuza pepo kwa nguvu za mkuu wa pepo.”

35Yesu alipita katika miji yote na vijiji, akifundisha katika sinagogi zao, akitangaza Injili ya ufalme, na kuponya kila aina ya ugonjwa na maradhi.

36Alipoyaona makundi ya watu, aliwahurumia kutoka moyoni, kwa sababu walikuwa wamechoshwa na kutelekezwa, kama kondoo bila mchungaji. 37Kisha akawaambia wanafunzi wake, “Mavuno ni makubwa, lakini wafanyakazi ni wachache. 38Kwa hiyo mwombeni Bwana wa mavuno awatume wafanyakazi kwenye mavuno yake.”