Mathayo 11

1Yesu alipomaliza kuwapa wanafunzi wake kumi na wawili maagizo hayo, aliondoka mahali hapo, akaenda kufundisha na kutangaza ujumbe katika miji yao.

2Wakati huo Yohana alikuwa gerezani, akasikia habari za kazi za Kristo. Akatuma ujumbe kupitia wanafunzi wake, 3akamwuliza, “Je, wewe ndiye yule anayekuja, au tumsubiri mtu mwingine?” 4Yesu aliwajibu, “Rudini mkamweleze Yohana mambo mnayoyasikia na kuyaona: 5vipofu wanaweza kuona, viwete wanatembea, wenye ukoma wanafanywa safi, viziwi wanaweza kusikia, wafu wanafufuliwa wakawa hai, na maskini wanasikia habari njema. 6Na heri yule asiyekwazika kwa sababu yangu.”

7Walipokuwa njiani, Yesu alianza kuzungumza na umati wa watu kuhusu Yohana. “Mlipokwenda nyikani, mlikwenda kutazama nini? Mwanzi unaoyumbayumba kwa upepo? 8Kama sivyo, mlikwenda kuona nini? Mtu aliyevaa mavazi laini ya thamani? Watu wanaovaa mavazi ya anasa hupatikana katika majumba ya wafalme. 9Basi mlikwenda kwa sababu gani? Kumwona nabii? Ndiyo kweli, nawaambia, na yeye ni zaidi hata ya nabii. 10Huyu ndiye mtu ambaye Maandiko yanasema habari zake, ‘Ninamtuma mjumbe wangu akutangulie; yeye ataiandaa njia yako mbele yako.’ 11Kweli nawaambia, kati ya wote waliozaliwa na wanawake hajatokea mtu aliye mkuu kuliko Yohana Mbatizaji. Hata hivyo, hata yule aliye mdogo kabisa katika ufalme wa mbinguni ni mkuu kuliko yeye. 12Tangu wakati wa Yohana Mbatizaji hadi sasa, ufalme wa mbinguni umekuwa ukitendewa jeuri, na watu wenye jeuri wanajaribu kuunyakua. 13Kwa maana manabii wote na sheria walinena juu ya mambo yajayo, mpaka Yohana. 14Na ikiwa mko tayari kulipokea, Yohana ndiye Eliya ambaye kuja kwake kulitabiriwa. 15Yeyote mwenye masikio, na asikilize.

16Nitatumia mfano gani kuwaeleza watu wa kizazi hiki? Wao ni kama watoto wanaokaa viwanjani na kuwaita watoto wenzao, 17‘Tuliwapigia zumari, lakini hamkucheza; tuliimba wimbo wa msiba, lakini hamkujipiga vifua kwa huzuni.’ 18Kwa maana Yohana alipokuja, hakula wala kunywa kama wengine, na watu wanasema, ‘Ana pepo ndani yake.’ 19Mwana wa Adamu alikuja akila na kunywa, nao wanasema, ‘Mwangalieni! Anakula kupita kiasi, anakunywa kupita kiasi, na yeye ni rafiki wa watoza ushuru na wenye dhambi!’ Lakini matendo ya hekima yanaonyesha kwamba hekima iko sahihi.”

20Kisha Yesu alianza kuilaumu miji iliyokuwa imeona matendo yake mengi ya nguvu, kwa kuwa haikutubu. 21“Ole wako, Korazini! Ole wako, Bethsaida! Kama Tiro na Sidoni zingeliona matendo ya nguvu yaliyofanyika kwenu, zingekuwa zimetubu tangu zamani, watu wake wakivaa magunia na kuketi katika majivu. 22Lakini nawaambieni hili: siku ya hukumu Tiro na Sidoni zitakuwa na hali nafuu kuliko ninyi. 23Na wewe, Kapernaumu, je, utatukuzwa juu hadi mbinguni? Hapana, utashuka mpaka Kuzimu. Kama Sodoma ingeliona matendo ya nguvu yaliyofanyika kwako, ingekuwa bado imesimama hadi leo. 24Lakini nawaambieni hili: siku ya hukumu nchi ya Sodoma itakuwa na hali nafuu kuliko wewe.”

25Wakati huo Yesu alisema, “Baba, Bwana wa mbingu na dunia, ninakusifu, kwa sababu mambo haya umeyaweka sirini kwa wenye hekima na wenye elimu, na umeyafanya yajulikane kwa watoto wadogo. 26Ndiyo, Baba, ndivyo ulivyopenda iwe.

27Baba yangu amenikabidhi kila kitu. Hakuna anayemjua Mwana kikamilifu isipokuwa Baba, na hakuna anayemjua Baba kikamilifu isipokuwa Mwana na wale ambao Mwana ameamua kuwafunulia habari zake.

28Njooni kwangu, nyote mliochoshwa na kazi ngumu na kuelemewa na mizigo mizito, nami nitawapa pumziko. 29Vaeni nira yangu shingoni mwenu, mjifunze kutoka kwangu, kwa kuwa ni mpole na moyo wangu ni mnyenyekevu. Ndipo mtakapopata pumziko kwa nafsi zenu. 30Kwa maana nira yangu haiumizi kuivaa, na mzigo ninaowapa ni mwepesi.”