Mathayo 24

1Yesu alipotoka hekaluni na kuendelea na safari yake, wanafunzi wake walimjia ili kumwonyesha majengo ya hekalu. 2Akawajibu, “Mnaviona hivi vyote, sivyo? Kweli nawaambia, kila jiwe la hapa litabomolewa, hata lisibaki jiwe moja juu ya jingine.”

3Baadaye, alipokuwa ameketi juu ya Mlima wa Mizeituni, wanafunzi walimwendea wakiwa peke yao, wakasema, “Tuambie mambo haya yatatokea lini. Na ni ishara gani itakayoonyesha kuja kwako na kufika kwa mwisho wa enzi?” 4Yesu aliwajibu, “Kaeni macho, mtu asije akawapoteza. 5Wengi watakuja wakilitumia jina langu, wakisema, ‘Mimi ndiye Kristo,’ nao watawapoteza wengi. 6Mtasikia juu ya vita na habari za vita. Jihadharini msitikiswe. Mambo hayo lazima yatokee, lakini hiyo haimaanishi kwamba mwisho umefika. 7Taifa litapigana na taifa, na ufalme na ufalme. Mahali pamoja baada ya pengine kutakuwa na njaa na matetemeko ya ardhi. 8Hata hivyo, yote hayo ni mwanzo tu wa utungu wa kuzaa.

9Hapo watawatia mikononi mwa watesi na kuwaua, na mataifa yote yatawachukia kwa sababu ya jina langu. 10Wakati huo wengi wataiacha imani, wakisalitiana na kuchukiana. 11Manabii wa uongo watatokea kwa wingi, nao watawapoteza watu wengi. 12Kadiri dharau kwa sheria ya Mungu inavyoenea, upendo wa watu walio wengi utafifia. 13Lakini yeyote atakayesimama imara mpaka mwisho ataokolewa. 14Injili hii ya ufalme itatangazwa duniani kote, ili kila taifa lisikie ushahidi wake, na hapo ndipo mwisho utakapokuja.

15Basi, mtakapoona machukizo yaletayo maangamizi, ambayo nabii Danieli aliyasema, yamesimama mahali patakatifu (msomaji na azingatie), 16wale walioko Yudea lazima wakimbilie milimani. 17Aliye juu ya paa asishuke kuchukua kitu chochote ndani ya nyumba, 18na aliye shambani asirudi kuchukua joho lake. 19Ole wao wanawake wenye mimba na wale wanaonyonyesha watoto katika siku hizo! 20Salini msije mkalazimika kukimbia wakati wa masika, au siku ya Sabato. 21Kwa maana huo utakuwa wakati wa taabu kubwa, mbaya kuliko yote yaliyotokea tangu ulimwengu ulipoanza, na kitu kama hicho hakitatokea tena kamwe. 22Kama siku hizo zisingepunguzwa, hakuna mtu hata mmoja angetoka hai. Lakini kwa ajili ya wale waliochaguliwa, siku hizo zitapunguzwa. 23Mtu yeyote akiwaambia wakati huo, ‘Tazameni, Kristo yuko hapa!’ au ‘Yuko hapa!’ msiamini. 24Watatokea watu wanaodai kwa uongo kuwa Kristo, pamoja na manabii wa uongo. Watafanya ishara kubwa na maajabu, kiasi cha kuwapoteza hata wale waliochaguliwa, kama jambo hilo lingewezekana. 25Kumbukeni hili: nimewaonya kabla. 26Kwa hiyo wakiwaambia, ‘Tazameni, yuko nyikani,’ msiondoke mlipo. Wakisema, ‘Tazameni, amejificha ndani ya nyumba,’ msiamini. 27Kuja kwa Mwana wa Adamu kutakuwa kama umeme wa radi unaomulika mashariki na kuangaza anga lote hadi magharibi. 28Mahali palipo na mwili uliokufa, ndipo tai hukusanyika.

29Mara tu baada ya taabu ya siku hizo, jua litakuwa giza na mwezi utaacha kutoa mwanga wake. Nyota zitaanguka kutoka angani, na nguvu za mbinguni zitatikiswa. 30Kisha ishara ya Mwana wa Adamu itaonekana angani. Kila kabila duniani litaomboleza, nao watamwona Mwana wa Adamu akija juu ya mawingu ya angani, akiwa na nguvu na utukufu mkuu. 31Tarumbeta kubwa itakapolia, atawatuma malaika wake. Nao watawakusanya wateule wake kutoka pande nne za dunia, kutoka miisho ya mbingu kila upande.

32Jifunzeni somo kutoka kwa mtini: matawi yake yanapoanza kuwa laini na majani kuchipua, mnajua kwamba kiangazi kimekaribia. 33Vivyo hivyo nanyi: mtakapoyaona mambo haya yote, jueni kwamba ni karibu, mlangoni kabisa. 34Kweli nawaambia, mambo haya yote yatatokea kabla kizazi hiki hakijapita. 35Mbingu na dunia zitapita, ila maneno yangu hayatapita kamwe.

36Hakuna mtu anayejua siku wala saa jambo hilo litakapotokea. Malaika walio mbinguni hawajui, wala Mwana hajui. Baba peke yake ndiye anayejua. 37Kuja kwa Mwana wa Adamu kutakuwa kama siku za Nuhu. 38Kabla ya gharika, watu waliendelea kula na kunywa, kuoa na kuwaoza watoto wao, mpaka siku ile Nuhu alipoingia katika safina. 39Hawakujua lililokuwa likija mpaka gharika ilipofika, ikawazoa wote. Kuja kwa Mwana wa Adamu kutakuwa vivyo hivyo. 40Wakati huo watu wawili watakuwa wakifanya kazi shambani: mmoja anachukuliwa, na mwingine anaachwa. 41Wanawake wawili watakuwa wakisaga nafaka kwenye jiwe la kusagia: mmoja anachukuliwa, na mwingine anaachwa. 42Kwa hiyo kaeni macho, kwa kuwa hamjui ni siku gani Bwana wenu atakuja. 43Fikirini jambo hili. Mwenye nyumba ambaye angejua ni saa ngapi za usiku mwizi angekuja, angekaa macho, wala asingemwacha mtu yeyote atoboe ukuta wa nyumba yake. 44Kwa hiyo ninyi pia muwe tayari, kwa maana Mwana wa Adamu anakuja saa msiyoitazamia.

45Basi ni nani mtumishi anayeaminika na mwenye busara, ambaye bwana wake amemweka kusimamia watumishi wa nyumba yake, ili awape chakula chao wakati unaofaa? 46Heri mtumishi huyo ambaye bwana wake atakaporudi atamkuta akifanya kazi hiyo hasa. 47Kweli nawaambia, bwana wake atamweka kusimamia mali yake yote. 48Lakini huenda mtumishi huyo akawa mwovu. Akajisemea moyoni, ‘Bwana wangu anakawia sana kurudi,’ 49akaanza kuwapiga watumishi wenzake, huku akila na kunywa pamoja na walevi. 50Ikiwa hivyo, bwana wake atakuja siku ambayo hamtazamii, na saa ambayo hajui. 51Bwana huyo atamkata vipande vipande na kumweka pamoja na wanafiki, mahali ambapo watu watalia na kusaga meno.