Mathayo 12

1Wakati huo Yesu alikuwa akipita katika mashamba ya nafaka siku moja ya Sabato. Wanafunzi wake walikuwa na njaa, kwa hiyo wakaanza kuchuma masuke na kuyala. 2Mafarisayo walipoona hivyo, wakamwambia, “Angalia! Wanafunzi wako wanafanya jambo ambalo sheria inakataza siku ya Sabato.” 3Yesu akawajibu, “Je, hamkumbuki kusoma alichofanya Daudi wakati yeye na watu aliokuwa nao walipoona njaa? 4Aliingia katika nyumba ya Mungu, nao wakala mikate mitakatifu iliyowekwa mbele za Mungu. Daudi na watu wake hawakuruhusiwa kuila; ni makuhani tu walioruhusiwa. 5Au hamjasoma katika sheria kwamba kila Sabato makuhani wanaofanya kazi hekaluni huivunja Sabato, na bado hawana hatia? 6Nawaambia, hapa kuna kitu kikubwa kuliko hekalu. 7Kama mngekuwa mmeelewa maana ya maneno haya, ‘Nataka huruma, si dhabihu,’ msingewahukumu watu ambao hawajafanya kosa lolote. 8Kwa kuwa Mwana wa Adamu ni Bwana wa Sabato.”

9Yesu aliondoka mahali pale, akaingia katika sinagogi lao. 10Palikuwa na mtu mmoja ambaye mkono wake ulikuwa umesinyaa. Wakamwuliza swali, “Je, inaruhusiwa kuponya siku ya Sabato?” Walitaka kupata sababu ya kumshtaki. 11Akawajibu, “Tuseme mmoja wenu ana kondoo mmoja tu, naye akatumbukia shimoni siku ya Sabato. Je, hatamshika na kumtoa? 12Na binadamu ana thamani kubwa zaidi kuliko kondoo! Kwa hiyo sheria inaruhusu kutenda mema siku ya Sabato.” 13Kisha akamwambia yule mtu, “Nyoosha mkono wako.” Akaunyoosha, nao ukawa mzima tena, sawa kabisa na mkono wake mwingine. 14Mafarisayo walitoka nje, wakakutana kupanga njama dhidi yake, wakitafuta njia ya kumwua.

15Yesu alijua walichokuwa wakipanga, akaondoka mahali pale. Watu wengi walimfuata, naye akawaponya wote. 16Lakini akawaagiza wasiwaambie wengine yeye ni nani. 17Hii ilikuwa ili litimie neno lililosemwa kupitia nabii Isaya: 18“Huyu hapa mtumishi wangu, yule niliyemchagua, mpendwa wangu, ambaye nafsi yangu inapendezwa naye sana. Nitaweka Roho wangu juu yake, naye atawajulisha watu wa mataifa haki. 19Hatagombana wala hatapiga kelele; hakuna atakayemsikia akipaza sauti yake barabarani. 20Hatalivunja tete lililopindika, wala hatauzima utambi unaowaka kwa shida, mpaka atakapoiongoza haki hadi ishinde. 21Na watu wa mataifa wataweka tumaini lao katika jina lake.”

22Kisha mtu mmoja aliyekuwa chini ya nguvu za pepo aliletwa kwake. Mtu huyo alikuwa kipofu, tena hakuweza kusema. Yesu akamponya, na sasa mtu huyo akaweza kusema na kuona. 23Makutano wote wakastaajabu kupita kiasi. Wakauliza, “Je, yawezekana huyu ndiye Mwana wa Daudi?” 24Lakini Mafarisayo waliposikia hivyo wakasema, “Mtu huyu anafukuza pepo kwa msaada wa Beelzebuli tu, mkuu wa pepo.” 25Yesu aliyajua mawazo yao, akawaambia, “Ufalme wowote uliogawanyika katika makundi yanayopigana huanguka na kuwa magofu, na mji wowote au jamaa yoyote inayojipiga yenyewe haitadumu. 26Basi ikiwa Shetani anamfukuza Shetani, amejigeuka dhidi yake mwenyewe. Kama ni hivyo, ufalme wake ungewezaje kudumu? 27Na kama mimi nawafukuza pepo kwa msaada wa Beelzebuli, je, watu wenu wenyewe huwafukuza kwa msaada wa nani? Kwa hiyo wao ndio watakaowahukumu. 28Lakini kama nawafukuza pepo kwa Roho wa Mungu, basi ufalme wa Mungu tayari umefika kwenu. 29Au mtu angewezaje kuvunja na kuingia katika nyumba ya mtu mwenye nguvu na kuchukua mali yake, bila kumfunga kwanza mtu huyo mwenye nguvu? Hapo tu ndipo anaweza kuipora nyumba yote. 30Mtu yeyote asiyesimama upande wangu anasimama dhidi yangu. Mtu yeyote asiyenisaidia kukusanya anatawanya. 31Ndiyo sababu nawaambia kwamba watu wanaweza kusamehewa kila dhambi na kila kashfa, lakini hakuna atakayesamehewa kwa kumkufuru Roho. 32Mtu anayesema jambo dhidi ya Mwana wa Adamu anaweza kusamehewa. Lakini mtu anayesema dhidi ya Roho Mtakatifu hatapata msamaha, si katika zama hizi za sasa wala katika zama zinazokuja.

33Ama mhesabu mti kuwa mzuri na tunda lake kuwa zuri, ama mhesabu mti kuwa mbovu na tunda lake kuwa bovu. Kwa maana tunda huonyesha mti ni wa aina gani. 34Ninyi ukoo wa nyoka! Maneno mema yangewezaje kutoka kwenu, ilhali ninyi ni waovu? Kinywa husema yale yanayofurika kutoka moyoni. 35Mtu mwema hutoa vitu vyema kutoka katika ghala lake la mema; mtu mwovu hutoa vitu viovu kutoka katika ghala lake la maovu. 36Nami nawaambia hivi: kila neno la ovyo ambalo watu husema ni neno watakalolazimika kulijibia siku ya hukumu. 37Maneno yako mwenyewe yatakutangaza kuwa huna hatia, au maneno yako mwenyewe yatakuhukumu.”

38Hapo baadhi ya waandishi na Mafarisayo wakasema, “Mwalimu, tungependa utuonyeshe ishara.” 39Akawajibu, “Kizazi kiovu kisicho na uaminifu kinatafuta ishara, lakini ishara pekee kitakayopewa ni ishara ya nabii Yona. 40Yona alikaa siku tatu mchana na usiku ndani ya kiumbe mkubwa wa baharini, na vivyo hivyo Mwana wa Adamu atakaa siku tatu mchana na usiku ndani kabisa ya ardhi. 41Siku ya hukumu watu wa Ninawi watasimama pamoja na kizazi hiki na kukitia hatiani, kwa sababu wao walitubu Yona alipowahubiria. Na bado hapa kuna kitu kikubwa kuliko Yona. 42Siku ya hukumu malkia wa kusini atasimama pamoja na kizazi hiki na kukitia hatiani, kwa sababu yeye alisafiri kutoka pembe za mbali za dunia ili aisikilize hekima ya Sulemani. Na bado hapa kuna kitu kikubwa kuliko Sulemani.

43Pepo mchafu anapomtoka mtu, huzurura katika nchi kavu akitafuta mahali pa kupumzika, lakini hapapati. 44Basi husema, ‘Nitarudi kwenye makao niliyotoka.’ Hurudi na kukuta mahali pale pako tupu, pamefagiwa na kupangwa vizuri. 45Kisha huenda na kuleta pepo wengine saba walio waovu zaidi kuliko yeye, nao huingia na kufanya makao yao pale. Mwishowe mtu huyo huwa katika hali mbaya kuliko alivyokuwa mwanzoni. Na kizazi hiki kiovu kitapatwa na hayo hayo.”

46Yesu alikuwa bado anazungumza na umati wa watu, mama yake na ndugu zake walipofika. Wakasimama nje, wakitumaini kupata kuzungumza naye. 47Mtu mmoja akamwambia, “Tazama, mama yako na ndugu zako wamesimama pale nje. Wanaomba kuzungumza nawe.” 48Yesu akamjibu yule aliyemletea habari, “Mama yangu ni nani hasa? Na ndugu zangu ni kina nani?” 49Alinyoosha mkono wake kuwaelekea wanafunzi wake, akasema, “Tazameni! Hawa ndio mama yangu na ndugu zangu. 50Kwa maana kila mtu anayefanya mapenzi ya Baba yangu aliye mbinguni ni kaka na dada na mama kwangu.”