Mathayo 5

1Yesu alipoyaona makundi ya watu, alipanda mlimani. Akaketi, nao wanafunzi wake wakaja kwake. 2Naye akaanza kuwafundisha: 3“Heri wale walio maskini rohoni: ufalme wa mbinguni ni mali yao. 4Heri wale wanaoomboleza: watafarijiwa. 5Heri walio wapole: watairithi dunia. 6Heri wale wanaoona njaa na kiu ya haki: watatoshelezwa. 7Heri walio na huruma: watahurumiwa. 8Heri wenye mioyo safi: watamwona Mungu. 9Heri wale wanaoleta amani: wataitwa wana wa Mungu. 10Heri wale wanaoteswa kwa sababu ya haki: ufalme wa mbinguni ni mali yao. 11Heri yenu watu wanapowatukana, wanapowatesa, na kueneza kila aina ya uongo mbaya juu yenu kwa ajili yangu. 12Furahini na msherehekee, kwa sababu thawabu kubwa inawangoja mbinguni. Ndivyo walivyowatesa manabii waliokuja kabla yenu.

13Ninyi ni chumvi kwa ajili ya dunia. Lakini chumvi ikipoteza ladha yake, ni nini kitakachoirudishia uchumvi wake? Haifai tena kwa chochote ila kutupwa nje na kukanyagwa.

14Ninyi ni nuru ya ulimwengu. Mji uliojengwa juu ya kilima hauwezi kufichika. 15Hakuna mtu anayewasha taa na kuificha chini ya kikapu; huiweka juu ya kinara, nayo huwaangazia wote walio nyumbani. 16Vilevile, nuru yenu inapaswa kung’aa mahali ambapo watu wanaweza kuiona, ili waone matendo yenu mazuri na kumtukuza Baba yenu wa mbinguni.

17Msidhani kwamba nimekuja kuiondoa sheria au manabii. Sikuja kuviondoa, bali kuvitimiza. 18Kweli nawaambia, maadamu mbingu na dunia zipo, hakuna herufi ndogo kabisa wala sehemu ndogo ya herufi itakayotoweka katika sheria mpaka yote yatimie. 19Basi mtu yeyote anayelegeza hata amri iliyo ndogo kuliko zote na kuwafundisha wengine wafanye vivyo hivyo, ataitwa mdogo kuliko wote katika ufalme wa mbinguni. Lakini yeyote anayezitii na kuzifundisha ataitwa mkubwa katika ufalme wa mbinguni. 20Kwa maana nawaambia, kama haki yenu haitapita kwa mbali ile ya waandishi na Mafarisayo, hamtaingia kamwe katika ufalme wa mbinguni.

21Mmesikia yale waliyoambiwa wazee wetu wa zamani: ‘Usiue. Yeyote atakayeua atapaswa kujibu mahakamani.’ 22Lakini mimi nawaambia kwamba yeyote anayemkasirikia ndugu yake atapaswa kujibu mahakamani. Yeyote atakayemwambia ndugu yake, ‘Wewe mtu bure!’ atapaswa kujibu mbele ya Baraza Kuu. Na yeyote atakayesema, ‘Wewe mpumbavu!’ yuko hatarini kutupwa katika moto wa jehanamu. 23Basi ukiwa unaleta sadaka yako madhabahuni, na pale ukakumbuka kwamba ndugu yako ana kinyongo nawe, 24iache sadaka yako hapo mbele ya madhabahu. Nenda kwanza ukapatane naye, kisha urudi utoe sadaka yako. 25Ikiwa mtu anakupeleka mahakamani, patana naye haraka mngali njiani kwenda huko. La sivyo, mshtaki wako anaweza kukukabidhi kwa hakimu, naye hakimu akakukabidhi kwa mlinzi, nawe ukatupwa gerezani. 26Kweli nakuambia, hutaondoka huko mpaka umelipa senti ya mwisho.

27Mmesikia ile amri, ‘Usizini.’ 28Lakini mimi nawaambia, mwanamume anayemtazama mwanamke kwa nia ya kumtaka kwa ajili yake mwenyewe, tayari amezini naye moyoni. 29Jicho lako la kulia likikuongoza dhambini, liondoe na kulitupa. Ni afadhali kwako kupoteza kiungo kimoja cha mwili kuliko mwili wako wote kutupwa jehanamu. 30Na mkono wako wa kulia ukikuongoza dhambini, ukate na kuutupa. Ni afadhali kwako kupoteza kiungo kimoja cha mwili kuliko mwili wako wote kwenda jehanamu.

31Pia ilisemwa, ‘Mwanamume anayemwacha mke wake ni lazima ampe taarifa ya talaka kwa maandishi.’ 32Lakini mimi nawaambia kwamba mwanamume anayempa mke wake talaka kwa sababu yoyote isipokuwa ukosefu wa uaminifu katika ndoa, anamsababisha azini; na yeyote anayemwoa mwanamke aliyepewa talaka anazini.

33Pia mmesikia yale waliyoambiwa wazee wetu wa zamani: ‘Usiape kwa uongo. Fanya yale uliyomwahidi Bwana kwa kiapo.’ 34Lakini mimi nawaambia, msiape kiapo chochote, wala kwa mbingu, kwa sababu ni kiti cha enzi cha Mungu, 35wala kwa dunia, kwa sababu ni mahali pa kuweka nyayo zake, wala kwa Yerusalemu, kwa sababu ni mji wa Mfalme mkuu. 36Usiape hata kwa kichwa chako mwenyewe, kwa kuwa huwezi kugeuza unywele hata mmoja ukawa mweupe au mweusi. 37Ndiyo yenu iwe ndiyo, na hapana yenu iwe hapana. Chochote mnachoongeza zaidi ya hapo kinatoka kwa yule mwovu.

38Mmesikia msemo huu: ‘Jicho kwa jicho, jino kwa jino.’ 39Lakini mimi nawaambia, msimlipize kisasi mtu mwovu. Mtu akikupiga kofi kwenye shavu la kulia, mgeuzie na shavu lingine pia. 40Mtu akitaka kukupeleka mahakamani ili achukue shati lako, mwache achukue na koti lako pia. 41Mtu akikulazimisha kumbebea mzigo maili moja, mbebee maili mbili. 42Mpe kila anayekuomba, wala usimkwepe mtu anayetaka kukopa kwako.

43Mmesikia msemo huu: ‘Mpende jirani yako na umchukie adui yako.’ 44Lakini mimi nawaambia: wapendeni maadui wenu, na muwaombee watu wanaowatesa, 45ili muwe wana wa Baba yenu wa mbinguni. Yeye hulifanya jua lake lichomoze juu ya watu waovu na watu wema pia, na hunyesha mvua juu ya wale wanaotenda haki na wale wanaotenda maovu. 46Ikiwa mnawapenda watu wanaowapenda, kuna ujira gani katika hilo? Hata watoza ushuru hufanya hivyo, sivyo? 47Na ikiwa mnawasalimu ndugu zenu wenyewe tu, mnafanya nini cha kipekee? Hata watu wa mataifa hufanya hivyo, sivyo? 48Kwa hiyo ninyi mnapaswa kuwa wakamilifu, sawa na Baba yenu wa mbinguni alivyo mkamilifu.