Mathayo 17

1Siku sita baadaye, Yesu aliwachukua Petro, Yakobo na Yohana ndugu yake Yakobo, akawapeleka juu ya mlima mrefu, mahali walipokuwa peke yao. 2Huko, mbele ya macho yao, alibadilishwa sura. Uso wake uling’aa kama jua, na nguo zake zikawa nyeupe kama nuru. 3Ghafla Musa na Eliya waliwatokea, wakizungumza na Yesu. 4Petro alimwambia Yesu, “Bwana, ni vizuri kama nini kwamba tuko hapa! Ukipenda, nitajenga vibanda vitatu hapa: kimoja kwa ajili yako, kimoja kwa ajili ya Musa, na kimoja kwa ajili ya Eliya.” 5Petro alipokuwa bado anasema, wingu lililojaa nuru liliwafunika kwa kivuli chake, na sauti kutoka katika wingu ikasema, “Huyu ni Mwana wangu mpendwa, ninayefurahishwa naye. Msikilizeni yeye.” 6Wanafunzi waliposikia sauti hiyo, walianguka kifudifudi wakiwa na hofu kuu. 7Kisha Yesu alikuja, akaweka mkono wake juu yao, akasema, “Inukeni, na acheni kuogopa.” 8Walipoinua macho, hawakumwona mtu mwingine yeyote ila Yesu tu.

9Walipokuwa wakishuka mlimani, Yesu aliwapa agizo hili: “Msimweleze mtu yeyote kuhusu maono haya mpaka Mwana wa Adamu atakapokuwa amefufuliwa kutoka kwa wafu.” 10Basi wanafunzi walimwuliza, “Ikiwa ndivyo, kwa nini waandishi husema kwamba Eliya lazima aje kwanza?” 11Akajibu, “Ni kweli, Eliya anakuja, naye atayaweka mambo yote sawa. 12Lakini nawaambia kwamba Eliya amekwisha fika. Hawakumtambua, na walimfanyia walivyotaka. Vivyo hivyo watamtesa Mwana wa Adamu.” 13Hapo wanafunzi walitambua kwamba alikuwa anamaanisha Yohana Mbatizaji.

14Walipofika kwenye umati wa watu, mtu mmoja alimjia, akapiga magoti mbele yake. 15Akasema, “Bwana, mwonee huruma mwanangu. Ana kifafa, na anateseka sana. Mara kwa mara huanguka motoni, na mara kwa mara majini. 16Nilimleta kwa wanafunzi wako, lakini hawakuwa na uwezo wa kumponya.” 17Yesu alijibu, “Kizazi kisicho na imani na kilichopotoka! Nitakaa nanyi mpaka lini? Itanibidi niwavumilie hadi lini? Mleteni kijana huyo hapa kwangu.” 18Yesu alimkemea yule pepo kwa ukali, naye akamtoka mvulana. Tangu wakati huo mvulana alikuwa mzima.

19Baadaye, walipokuwa peke yao pamoja na Yesu, wanafunzi walimwuliza, “Ni nini kilichotuzuia sisi kumfukuza?” 20Aliwaambia, “Ni kwa sababu imani yenu ni ndogo mno. Kweli nawaambia, kama mna imani hata iliyo ndogo kama mbegu ya haradali, mnaweza kuuambia mlima huu, ‘Toka hapa uende pale,’ nao utakwenda. Hakuna jambo ambalo hamtaweza kulifanya.”

22Walipokuwa wakikusanyika Galilaya, Yesu aliwaambia, “Mwana wa Adamu atatolewa katika mamlaka ya wanadamu. 23Watamuua, na siku ya tatu atafufuliwa.” Wanafunzi wakajawa na huzuni kubwa.

24Walipofika Kapernaumu, watu waliokuwa wakikusanya kodi ya hekalu walimjia Petro, wakamwuliza, “Mwalimu wenu hulipa kodi ya hekalu, sivyo?” 25“Ndiyo, yeye hulipa,” Petro alijibu. Petro alipoingia nyumbani, Yesu alimwahi kabla hajasema neno. Akasema, “Simoni, niambie unavyofikiri. Wafalme wa dunia wanapotoza ushuru au kodi, ni nani anayelipa? Kwa wana wao wenyewe, au kwa watu wasio wa familia yao?” 26Petro alijibu, “Kutoka kwa watu wa nje.” Yesu akamwambia, “Basi wana hawadaiwi kitu. 27Hata hivyo, hatutaki kuwapa sababu ya kuchukizwa. Kwa hiyo nenda ziwani, utupe ndoano. Mvue samaki wa kwanza atakayenaswa, umfungue mdomo, nawe utakuta sarafu ya fedha yenye thamani ya mshahara wa siku nne. Ichukue, uwape kwa ajili yangu na kwa ajili yako.”