Mathayo 6

1Jihadharini msiionyeshe haki yenu hadharani ili watu wawaone. Mkifanya hivyo, Baba yenu wa mbinguni hatakuwa na ujira kwa ajili yenu.

2Kwa hiyo unapowapa maskini msaada, usitangaze kwa tarumbeta, kama wanafiki wanavyofanya katika masinagogi na barabarani ili wasifiwe na watu. Kweli nawaambia, wamekwisha kulipwa kikamilifu. 3Lakini wewe unapotoa, fanya kimya kimya hivi kwamba mkono wako wa kushoto usijue kile ambacho mkono wa kulia unafanya. 4Msaada wako utabaki umefichika, na Baba yako, anayeona yaliyofichika, atakulipa.

5Na mnapoomba, msiwe kama wanafiki. Wao hupenda kusimama na kuomba katika masinagogi na kwenye pembe za barabara, mahali ambapo watu wanaweza kuwaona. Kweli nawaambia, wamekwisha kulipwa kikamilifu. 6Lakini unapoomba, ingia katika chumba cha ndani, ufunge mlango, umwombe Baba yako aliye pale kwa siri. Baba yako huona yaliyofichika, naye atakulipa.

7Mnapoomba, msirundike maneno matupu kama watu wa mataifa wanavyofanya. Wao hudhani kwamba watasikiwa kwa sababu wanasema mengi. 8Kwa hiyo msiwaige. Baba yenu anajua tayari mnachohitaji kabla hamjamwomba.

9Basi ombeni hivi: ‘Baba yetu wa mbinguni, jina lako lihesabiwe kuwa takatifu. 10Ufalme wako na uje. Mapenzi yako na yatendeke duniani kama yanavyotendeka mbinguni. 11Utupe leo mkate tunaouhitaji. 12Utusamehe deni tunalodaiwa nawe, kama sisi pia tumewasamehe wale wanaodaiwa nasi. 13Usitulete katika majaribu, bali utuokoe kutoka kwa yule mwovu.’ 14Kwa maana mkiwasamehe wengine wanapowakosea, Baba yenu wa mbinguni atawasamehe ninyi pia. 15Lakini mkikataa kuwasamehe wengine, Baba yenu naye hatawasamehe makosa yenu.

16Mnapofunga, msijifanye wenye huzuni kama wanafiki. Wao hukunja nyuso zao ili wengine waone kwamba wanafunga. Kweli nawaambia, wamekwisha kulipwa kikamilifu. 17Lakini wewe unapofunga, paka mafuta kichwani na uoshe uso, 18ili mtu yeyote asijue kwamba unafunga ila Baba yako, aliye pale kwa siri. Baba yako huona yaliyofichika, naye atakulipa.

19Msijilimbikizie hazina hapa duniani, ambako nondo na kutu huziharibu, na wezi hutoboa kuta na kuziiba. 20Badala yake, jilimbikizieni hazina mbinguni, ambako nondo wala kutu haziwezi kuziharibu, na hakuna wezi wa kutoboa kuta na kuziiba. 21Moyo wako utakuwa daima pale ilipo hazina yako.

22Jicho ni taa ya mwili. Kwa hiyo, jicho lako likiwa zima, mwili wako wote utajaa nuru. 23Lakini jicho lako likiwa baya, mwili wako wote utajaa giza. Kwa hiyo, ikiwa nuru iliyo ndani yako kwa kweli ni giza, giza hilo ni zito mno!

24Hakuna mtu anayeweza kuwatumikia mabwana wawili. Atamchukia mmoja na kumpenda mwingine, au atakuwa mwaminifu kwa mmoja na kumdharau mwingine. Hamwezi kumtumikia Mungu na fedha pia.

25Ndiyo sababu nawaambia: msiwe na wasiwasi kuhusu uhai wenu, kwamba mtakula nini, wala kuhusu miili yenu, kwamba mtavaa nini. Je, uhai si wa thamani kuliko chakula, na mwili kuliko mavazi? 26Tazameni ndege wanaoruka angani. Hawapandi wala hawavuni, wala hawahifadhi chakula ghalani, na bado Baba yenu wa mbinguni huwalisha. Je, ninyi hamna thamani kubwa kuliko wao? 27Je, kuna yeyote kati yenu anayeweza kuongeza hata saa moja kwenye maisha yake kwa kuwa na wasiwasi? 28Na kwa nini mnakuwa na wasiwasi juu ya mavazi? Fikirieni jinsi maua ya porini yanavyoota. Hayajitaabishi kwa kazi wala hayasokoti nyuzi. 29Lakini nawaambia, Sulemani pamoja na utukufu wake wote hakuwahi kuvaa mavazi mazuri kama ua mojawapo kati ya hayo. 30Ikiwa Mungu huyavalisha hivyo majani ya porini, ambayo leo yapo na kesho yanatupwa tanuruni, je, hatawavalisha ninyi zaidi sana, enyi wenye imani ndogo? 31Kwa hiyo msiwe na wasiwasi na kusema, ‘Tutakula nini?’ au, ‘Tutakunywa nini?’ au, ‘Tutavaa nini?’ 32Watu wa mataifa huhangaikia mambo hayo yote, na Baba yenu wa mbinguni anajua kwamba mnayahitaji yote. 33Zaidi ya yote, utafuteni ufalme na haki yake, nanyi mtapewa mambo haya yote pia. 34Kwa hiyo msiwe na wasiwasi kuhusu kesho; kesho itashughulikia mahangaiko yake yenyewe. Taabu za leo zinatosha kwa leo.