Mathayo 8

1Yesu aliposhuka kutoka mlimani, umati mkubwa wa watu ulimfuata. 2Mara mtu mmoja mwenye ukoma alikuja, akainama mbele yake, akasema, “Bwana, ukipenda, unaweza kunifanya safi.” 3Yesu alinyoosha mkono wake, akamgusa, akasema, “Ndiyo, nataka. Uwe safi!” Mara ukoma wake ukatoweka. 4Kisha Yesu akamwambia, “Hakikisha humwambii mtu yeyote. Badala yake, nenda kwa kuhani ili akuchunguze, na utoe sadaka ambayo Musa aliamuru, iwe uthibitisho kwao.”

5Yesu alipoingia Kapernaumu, akida mmoja alimwendea, akamsihi sana. 6Akasema, “Bwana, mtumishi wangu amelala nyumbani, amepooza, na anateseka sana.” 7Yesu akamjibu, “Nitakuja na kumponya.” 8Akida akajibu, “Bwana, mimi sistahili uingie nyumbani mwangu. Toa amri tu, na mtumishi wangu atapona. 9Mimi mwenyewe ni mtu aliye chini ya mamlaka, na nina askari chini yangu. Nikimwambia mmoja, ‘Nenda,’ anakwenda; na mwingine, ‘Njoo,’ anakuja. Nikimwambia mtumishi wangu, ‘Fanya hivi,’ anafanya.” 10Yesu aliposikia hayo alishangaa, akawaambia wale waliokuwa wakimfuata, “Kweli nawaambia, sijaona imani kubwa kama hii popote katika Israeli. 11Nawaambia, wengi watakuja kutoka mashariki na magharibi, nao watakaa kula karamu pamoja na Ibrahimu, Isaka na Yakobo katika ufalme wa mbinguni. 12Lakini wale waliozaliwa kuwa warithi wa ufalme watatupwa nje gizani, ambako watu watalia na kusaga meno yao.” 13Kisha Yesu akamwambia akida, “Nenda. Itatendeka kwako kama ulivyoamini.” Na mtumishi wake akapona saa hiyo hiyo.

14Yesu aliingia nyumbani kwa Petro, akamwona mama mkwe wa Petro amelala kitandani, ana homa. 15Akamgusa mkono, na homa ikamwacha. Akainuka, akaanza kumhudumia.

16Jioni ile walimletea watu wengi waliotawaliwa na pepo. Akazifukuza roho hizo kwa neno, akawaponya wagonjwa wote. 17Hili lilitokea ili kitimie kile kilichosemwa kupitia nabii Isaya: “Alichukua udhaifu wetu na kubeba magonjwa yetu.”

18Yesu alipoona umati ukikusanyika kumzunguka, aliagiza wavuke kwenda ng’ambo ya ziwa. 19Mwandishi mmoja alimjia, akamwambia, “Mwalimu, nitakufuata kila mahali utakapokwenda.” 20Yesu alimwambia, “Mbweha wana mashimo yao, na ndege wa angani wana viota vyao, lakini Mwana wa Adamu hana mahali pa kupumzisha kichwa chake.” 21Mwanafunzi mwingine alimwambia, “Bwana, kwanza uniachie niende kumzika baba yangu.” 22Lakini Yesu alimwambia, “Nifuate. Wafu waachie kazi ya kuwazika wafu wao wenyewe.”

23Kisha Yesu aliingia katika mashua, na wanafunzi wake wakamfuata. 24Ghafla dhoruba kali ilizuka ziwani, na mawimbi yakawa yanaifunika mashua. Lakini yeye alikuwa amelala usingizi. 25Walikuja, wakamwamsha, wakilia, “Bwana, tuokoe! Tunakaribia kufa!” 26Aliwaambia, “Kwa nini mmeogopa namna hii, ninyi wenye imani ndogo hivi?” Kisha aliinuka, akaukemea upepo na mawimbi kwa ukali, na kila kitu kikatulia kabisa. 27Walishangaa, wakasema, “Ni mtu wa aina gani huyu? Hata upepo na bahari vinamtii!” 28Yesu alipofika ng’ambo, katika nchi ya Wagadara, watu wawili waliotawaliwa na pepo walitoka makaburini, wakaja kukutana naye. Walikuwa wakali sana hata hakuna mtu aliyethubutu kupita njia ile. 29Walipiga kelele, “Mwana wa Mungu, una shughuli gani nasi? Je, umekuja hapa kututesa kabla ya wakati uliowekwa?” 30Mahali fulani mbali nao, kundi kubwa la nguruwe lilikuwa likila malisho. 31Pepo hao waliendelea kumsihi, “Ikiwa utatufukuza, tupeleke ndani ya kundi la nguruwe.” 32“Nendeni!” aliwaambia. Pepo hao walitoka, wakaingia ndani ya nguruwe, na mara kundi lote likatimua mbio kuteremka mteremko hadi ziwani, likazama. 33Wachungaji wa nguruwe walikimbia, wakaenda mjini, wakaeleza kila kitu, pamoja na yaliyowapata wale watu wenye pepo. 34Basi mji wote ulitoka kwenda kukutana na Yesu, na walipomwona, wakamsihi aondoke katika eneo lao.