Mathayo 1

1Kumbukumbu ya ukoo wa Yesu Kristo, mwana wa Daudi, mwana wa Ibrahimu. 2Ibrahimu alikuwa baba wa Isaka, Isaka baba wa Yakobo, na Yakobo baba wa Yuda na ndugu zake. 3Yuda alikuwa baba wa Peresi na Zera, ambao mama yao alikuwa Tamari. Peresi alikuwa baba wa Hesroni, na Hesroni baba wa Ramu. 4Ramu alikuwa baba wa Aminadabu, Aminadabu baba wa Nashoni, na Nashoni baba wa Salmoni. 5Salmoni alikuwa baba wa Boazi, ambaye mama yake alikuwa Rahabu. Boazi alikuwa baba wa Obedi, ambaye mama yake alikuwa Ruthu. Obedi alikuwa baba wa Yese, 6na Yese alikuwa baba wa Mfalme Daudi. Daudi alikuwa baba wa Solomoni, ambaye mama yake alikuwa mke wa Uria. 7Solomoni alikuwa baba wa Rehoboamu, Rehoboamu baba wa Abiya, na Abiya baba wa Asa. 8Asa alikuwa baba wa Yehoshafati, Yehoshafati baba wa Yoramu, na Yoramu baba wa Uzia. 9Uzia alikuwa baba wa Yothamu, Yothamu baba wa Ahazi, na Ahazi baba wa Hezekia. 10Hezekia alikuwa baba wa Manase, Manase baba wa Amoni, na Amoni baba wa Yosia. 11Yosia alikuwa baba wa Yekonia na ndugu zake wakati wa uhamisho kwenda Babeli.

12Baada ya uhamisho kwenda Babeli, Yekonia alikuwa baba wa Shealtieli, na Shealtieli baba wa Zerubabeli. 13Zerubabeli alikuwa baba wa Abiudi, Abiudi baba wa Eliakimu, na Eliakimu baba wa Azori. 14Azori alikuwa baba wa Sadoki, Sadoki baba wa Akimu, na Akimu baba wa Eliudi. 15Eliudi alikuwa baba wa Eleazari, Eleazari baba wa Mathani, na Mathani baba wa Yakobo. 16Yakobo alikuwa baba wa Yusufu, mume wa Mariamu, na Mariamu ndiye aliyemzaa Yesu, anayeitwa Kristo.

17Kwa hiyo kulikuwa na vizazi kumi na vinne kwa jumla tangu Ibrahimu hadi Daudi, vizazi kumi na vinne tangu Daudi hadi uhamisho kwenda Babeli, na vizazi kumi na vinne tangu uhamisho kwenda Babeli hadi Kristo.

18Hivi ndivyo Yesu Kristo alivyozaliwa. Mama yake, Mariamu, alikuwa ameposwa na Yusufu. Lakini kabla hawajaanza kuishi pamoja, ilibainika kwamba alikuwa amechukua mimba kutoka kwa Roho Mtakatifu. 19Yusufu mumewe alikuwa mtu mwenye haki, na hakutaka kumwaibisha mbele ya watu, kwa hiyo aliamua kumpa talaka faraghani. 20Alipokuwa bado akilitafakari jambo hili, malaika wa Bwana alimjia katika ndoto, akamwambia, “Yusufu, mwana wa Daudi, usiogope kumchukua Mariamu nyumbani kwako awe mke wako. Mtoto aliyemchukua mimbani ametoka kwa Roho Mtakatifu. 21Atazaa mtoto wa kiume, nawe utampa jina Yesu, kwa sababu ni yeye atakayewaokoa watu wake kutoka katika dhambi zao.” 22Haya yote yalitokea ili neno ambalo Bwana alilisema kupitia nabii litimie: 23“Bikira atapata mimba, naye atazaa mwana, nao watu watamwita Imanueli.” Jina hilo maana yake ni “Mungu yuko pamoja nasi.” 24Yusufu alipoinuka kutoka usingizini, alifanya yale aliyoagizwa na malaika wa Bwana. Akamleta mke wake nyumbani kwake. 25Lakini hakukutana naye kimwili mpaka alipojifungua mtoto wa kiume, naye akampa jina Yesu.