Mathayo 18

1Wakati huo wanafunzi walimjia Yesu na swali: “Basi ni nani aliye na cheo cha juu kabisa katika ufalme wa mbinguni?” 2Alimwita mtoto mdogo, akamsimamisha katikati yao. 3Kisha akasema, “Kweli nawaambia, msipogeuka na kuwa kama watoto, hamtaingia kamwe katika ufalme wa mbinguni. 4Kwa hiyo aliye mkubwa zaidi katika ufalme wa mbinguni ni yeyote anayekubali nafasi ya chini, kama mtoto huyu anavyofanya. 5Na mtu anapomkaribisha mtoto kama huyu kwa ajili yangu, ni mimi anayenikaribisha.

6Lakini mtu akimsababisha mmoja wa wadogo hawa wanaoniamini kuanguka dhambini, ingekuwa heri kwake kuzamishwa mbali baharini akiwa amefungwa jiwe kubwa la kusagia shingoni. 7Ole wa ulimwengu kwa sababu ya mitego inayowanasa watu katika dhambi! Mitego hiyo haina budi kuja, lakini ole wake yeyote anayeileta!

8Mkono wako au mguu wako ukikuongoza kutenda dhambi, ukate na kuutupa mbali. Ni bora kwako kuingia uzimani ukiwa umekatwa kiungo au ukichechemea, kuliko kubaki na mikono yote miwili au miguu yote miwili na kutupwa katika moto wa milele. 9Na jicho lako likikuongoza kutenda dhambi, ling’oe na kulitupa mbali. Ni bora kwako kuingia uzimani ukiwa na jicho moja, kuliko kubaki na macho yote mawili na kutupwa katika moto wa jehanamu.

10Jihadharini msimdharau kamwe hata mmoja wa wadogo hawa. Nawaambia, malaika wao mbinguni husimama daima mbele za Baba yangu aliye mbinguni. 12Niambieni mnavyofikiri. Tuseme mtu ana kondoo mia moja, na mmoja wao akapotea. Je, mwenye kondoo hatawaacha wale tisini na tisa kwenye vilima, aende kumtafuta yule aliyepotea? 13Na mwenye kondoo akimpata, kweli nawaambia, kondoo huyo mmoja humletea furaha kubwa kuliko wale tisini na tisa ambao hawakupotea kamwe. 14Vivyo hivyo, Baba yenu aliye mbinguni hataki kumpoteza hata mmoja wa wadogo hawa.

15Ndugu yako akikutendea dhambi, nenda ukamwonyeshe kosa lake mkiwa ninyi wawili peke yenu. Akikusikiliza, umemrejesha ndugu yako. 16Asipokusikiliza bado, rudi pamoja na mtu mmoja au wawili wengine, ili ‘kila shtaka lithibitishwe kwa maneno ya mashahidi wawili au watatu.’ 17Asipowasikiliza hao pia, lipeleke jambo hilo mbele ya kanisa. Na asipolisikiliza kanisa nalo, umhesabu kuwa mtu wa nje, kama mtu wa mataifa au mtoza ushuru. 18Kweli nawaambia, mtakachofunga duniani kitafungwa mbinguni, na mtakachofungua duniani kitafunguliwa mbinguni.

19Tena, kweli nawaambia, ikiwa wawili kati yenu hapa duniani watapatana juu ya jambo lolote watakaloliomba, Baba yangu aliye mbinguni atawafanyia. 20Kwa kuwa popote wanapokutana wawili au watatu kwa jina langu, nipo hapo pamoja nao.”

21Kisha Petro alimjia Yesu, akamwuliza, “Bwana, ndugu yangu akiendelea kunitendea dhambi, nimsamehe mara ngapi? Je, hata mara saba?” 22Yesu alimjibu, “Si hadi mara saba tu, bali hadi mara sabini na saba.

23Ndiyo maana ufalme wa mbinguni ni kama mfalme mmoja aliyeamua kukagua hesabu za watumishi wake. 24Alipoanza, aliletewa mtu mmoja aliyekuwa akidaiwa naye kiasi ambacho hakuna mfanyakazi angeweza kukipata hata kwa miaka laki moja. 25Kwa kuwa hakuwa na uwezo wa kulipa, bwana wake aliamuru auzwe pamoja na mke wake, watoto wake na vyote alivyokuwa navyo, ili sehemu ya deni ilipwe. 26Basi yule mtumishi alijitupa chini mbele yake, akamsihi, ‘Nipe muda, nami nitalilipa deni lote.’ 27Bwana wake alimwonea huruma mtumishi huyo. Alimwachilia huru, akamsamehe deni. 28Lakini mtumishi huyo alipotoka tu, alikutana na mmoja wa watumishi wenzake aliyekuwa akidaiwa naye mshahara wa siku mia moja hivi. Akamkaba koo, akamwambia, ‘Lipa deni lako!’ 29Mtumishi mwenzake alijitupa chini, akamsihi, ‘Nipe muda, nami nitakulipa.’ 30Lakini yeye hakukubali hata kidogo. Alikwenda, akaamuru atiwe gerezani mpaka atakapolipa deni. 31Watumishi wengine walipoona yaliyotokea, walisikitika sana. Wakaenda kwa bwana wao, wakamweleza habari yote. 32Basi bwana wake alimwita, akamwambia, ‘Mtumishi mwovu wewe! Ulinisihi, nami nikakusamehe deni lile lote. 33Je, hukupaswa kumwonea mtumishi mwenzako huruma ile ile niliyokuonea mimi?’ 34Basi bwana wake, sasa akiwa na hasira, alimtia mikononi mwa watesaji, akae nao mpaka alipe deni lote.

35Baba yangu aliye mbinguni atawatendea vivyo hivyo, ikiwa kila mmoja wenu hatamsamehe ndugu yake kwa moyo wote.”