Mathayo 25

1Wakati huo ufalme wa mbinguni utakuwa kama wasichana kumi waliokuwa wapambe katika harusi. Walichukua taa zao, wakatoka kwenda kumpokea bwana harusi. 2Watano kati yao walikuwa wajinga, na watano walikuwa na busara. 3Wale wajinga walichukua taa zao, lakini hawakuchukua mafuta yoyote pamoja nao. 4Lakini wale wenye busara walibeba chupa za mafuta pamoja na taa zao. 5Bwana harusi alipochelewa kufika, wote walianza kusinzia, wakalala usingizi. 6Usiku wa manane kelele zilisikika: ‘Bwana harusi yuko hapa! Tokeni nje mkampokee.’ 7Kisha wasichana wote waliamka, wakaziandaa taa zao. 8Wale wajinga wakawaambia wale wenye busara, ‘Tugawieni mafuta yenu kidogo; taa zetu zinaanza kuzimika.’ 9Lakini wale wenye busara wakajibu, ‘Hatuwezi; hakika hayatatutosha sisi na ninyi. Ni heri mwende kwa wauzaji wa mafuta mjinunulie yenu wenyewe.’ 10Walipokuwa wameenda kununua, bwana harusi alifika. Wale waliokuwa tayari waliingia pamoja naye kwenye karamu ya harusi, kisha mlango ukafungwa. 11Baadaye wale wasichana wengine nao walifika, wakaita, ‘Bwana, bwana, tufungulie mlango!’ 12Lakini yeye akajibu, ‘Kweli nawaambia, siwajui.’ 13Kwa hiyo kaeni macho, kwa maana hamjui ni siku gani wala ni saa ngapi.

14Ni kama mtu aliyekuwa karibu kusafiri kwenda nchi ya mbali. Aliwaita watumishi wake, akawakabidhi mali yake. 15Mmoja alimpa mifuko mitano ya fedha, mwingine mifuko miwili, na wa tatu mfuko mmoja, kulingana na kile ambacho kila mmoja angeweza kusimamia. Kisha akaondoka. Mara moja 16yule mwenye mifuko mitano alienda akafanya biashara kwa fedha hizo, akapata mifuko mingine mitano. 17Vivyo hivyo yule mwenye mifuko miwili alipata mingine miwili. 18Lakini yule mtumishi aliyepokea mfuko mmoja tu alienda, akachimba shimo ardhini, akazifukia fedha za bwana wake. 19Baada ya muda mrefu bwana wa watumishi hao alirudi, akakagua hesabu pamoja nao. 20Yule aliyepokea mifuko mitano ya fedha alikuja, akaleta mifuko mingine mitano. Akasema, ‘Bwana, uliniachia mifuko mitano ya fedha. Tazama, nimepata faida ya mifuko mingine mitano.’ 21Bwana wake akamjibu, ‘Hongera! Wewe ni mtumishi mwema na mwaminifu. Umeonyesha uaminifu katika mambo madogo; nitakupa madaraka juu ya mambo makubwa. Karibu, ushiriki furaha ya bwana wako.’ 22Yule mwenye mifuko miwili ya fedha naye alikuja. Akasema, ‘Bwana, uliniachia mifuko miwili ya fedha. Tazama, nimepata faida ya mifuko mingine miwili.’ 23Bwana wake akamjibu, ‘Hongera! Wewe ni mtumishi mwema na mwaminifu. Umeonyesha uaminifu katika mambo madogo; nitakupa madaraka juu ya mambo makubwa. Karibu, ushiriki furaha ya bwana wako.’ 24Kisha yule aliyepokea mfuko mmoja wa fedha akaja. Akasema, ‘Bwana, nilijua jinsi ulivyo mtu mgumu. Unavuna mashamba ambayo hukuyapanda, na kukusanya nafaka mahali ambapo hukutawanya mbegu. 25Niliogopa, kwa hiyo nilienda nikafukia ardhini mfuko wako wa fedha. Kilicho chako ni hiki hapa.’ 26Bwana wake akamjibu, ‘Wewe mtumishi mwovu na mvivu! Kumbe ulijua kwamba ninavuna mahali nisipopanda na kukusanya mahali nisipotawanya? 27Basi ingekupasa kuziweka fedha zangu kwa wabadilishaji fedha. Nikirudi, angalau ningepata kilicho changu pamoja na riba. 28Kwa hiyo chukueni mfuko huo wa fedha kutoka kwake, mpeni mtumishi mwenye mifuko kumi. 29Kwa maana kila aliye na kitu atapewa zaidi, naye atakuwa na zaidi ya kutosha. Lakini asiye na kitu, hata alicho nacho kitachukuliwa kutoka kwake. 30Mtupeni mtumishi huyu asiyefaa nje gizani, mahali ambapo watu watalia na kusaga meno.’

31Mwana wa Adamu atakuja katika utukufu wake, na malaika wote pamoja naye. Kisha ataketi juu ya kiti cha enzi cha utukufu wake. 32Mataifa yote yatakusanywa mbele yake. Kisha atawagawa watu katika makundi mawili, kama mchungaji anavyowatenga kondoo na mbuzi. 33Atawaweka kondoo upande wa kulia wake na mbuzi upande wa kushoto wake. 34Kisha Mfalme atawaambia wale walio upande wa kulia wake, ‘Njooni, ninyi ambao Baba yangu amewabariki. Ufalme umekuwa tayari kwa ajili yenu tangu ulimwengu ulipoumbwa; sasa ni urithi wenu. 35Kwa maana nilipokuwa na njaa, mlinipa chakula; nilipokuwa na kiu, mlinipa maji ya kunywa; nilipokuwa mgeni, mlinikaribisha nyumbani kwenu; 36nilipokuwa sina nguo, mlinivalisha; nilipokuwa mgonjwa, mlinihudumia; nilipokuwa gerezani, mlikuja kuniona.’ 37Kisha wenye haki watajibu, ‘Bwana, ni lini tulikuona ukiwa na njaa tukakupa chakula, au ukiwa na kiu tukakupa maji ya kunywa? 38Ni lini tulikuona ukiwa mgeni tukakukaribisha nyumbani, au huna nguo tukakuvalisha? 39Ni lini tulikuona ukiwa mgonjwa au gerezani tukaja kwako?’ 40Mfalme atawajibu, ‘Kweli nawaambia, kila mara mlipomfanyia jambo hilo mmoja wa hawa ndugu zangu, hata yule mdogo kuliko wote, mlinifanyia mimi.’ 41Kisha atawaambia wale walio upande wa kushoto wake, ‘Ondokeni mbele yangu, ninyi mlio chini ya laana, mwende kwenye moto wa milele ambao umeandaliwa kwa ajili ya Ibilisi na malaika zake. 42Kwa maana nilipokuwa na njaa, hamkunipa chakula; nilipokuwa na kiu, hamkunipa maji ya kunywa; 43nilipokuwa mgeni, hamkunikaribisha nyumbani kwenu; nilipokuwa sina nguo, hamkunivalisha; nilipokuwa mgonjwa na gerezani, hamkunihudumia.’ 44Kisha wao nao watajibu, ‘Bwana, ni lini tulikuona ukiwa na njaa au kiu, ukiwa mgeni au huna nguo, ukiwa mgonjwa au gerezani, nasi hatukuja kukusaidia?’ 45Kisha atawajibu, ‘Kweli nawaambia, kila mara mliposhindwa kumfanyia jambo hilo mmoja wa hawa, hata yule mdogo kuliko wote, mlishindwa kunifanyia mimi.’ 46Hawa wataondoka kwenda kwenye adhabu ya milele, na wenye haki wataenda kwenye uzima wa milele.”